Pichqa kaq: Mariaqa Diospa mamanmi

¿Imaynatam kay pantay yachachikuy rikuriramurqa? “Diospa mamanta yupaychayqa astawanmi qallaykurqa Constantino runapa kamachikuyninpi, chay tiempopim cristianokunapa religionninqa Roma kamachiqkunapa religionnin rikurirurqa, llaqtapi runakunañataqmi tukuy imata yupaycharqaku. [. . .] Ñawpa tiempokunamantaraq ‘hatun diosa mamachata’ hinaspa ‘virgen mamachata’ yupaychasqankum [cristianoman tikrakuq chay runakunata] inturqa hina chaynallata yupaychanankupaq.” (The New Encyclopædia Britannica, 1988.)

¿Imatam Biblia yachachin? “Wiksayakuspaykim wachakunki qari wawata, paytam sutichanki Jesuswan. Ancha reqsisqa kaspanmi hanaq pachapi Diospa Churinwan sutichasqa kanqa.” (Lucas 1:31-35.)

Kay textopi qawasqanchikman hinaqa, Mariaqa manam Diospa mamanchu karqa, aswanmi karqa ‘Diospa Churinpa’ maman. Bibliaqa ninmi cielokunapa hanayninpipas Dios mana kamasqanta, hinaptinqa ¿imaynatamá kamanman Mariapa wiksanpiqa? (1 Reyes 8:27.) Mariaqa manataqmi haykapipas nirqachu Diospa manam kasqantaqa. Hinaptinqa, ¿imanasqataq Mariamantaqa pantay yachachikuykuna kan? Hukllapi kimsa Dioskuna niq pantay yachachikuyraykum. Mariata yupaychayqa qallaykurqam 431 watapi, chaypim Efeso llaqtapi huñunakuspa (Concilio de Éfeso) tantearurqaku Mariaqa “Diospa Maman” otaq Theotokos nisqa kananpaq (chay palabraqa griego rimaypiqa, “Diosta wachakuq” ninanmi). Admirakunapaqmi, chay huñunakuyta rurasqanku Efeso llaqtapiqa una-unay watakunañam Diana sutiyoq mamachata yupaycharqaku.

Kunan tiempopi Mariata yupaychaspanku procesionta rurasqankupas, hamunmi Diana mamachata imayna yupaychasqankumanta, piensasqankuman hinaqa ‘cielomantas uraykamusqa’ (Hechos 19:35). Chaymantapas pisi-pisimantam cristianokunaqa yupaychayninkupi taytacha-mamachakuna servichikuyta qallaykurqaku.

Qaway kay textokunata: Mateo 13:53-56; Marcos 3:31-35; Lucas 11:27, 28.

CHEQAP KAQ:

Mariaqa Diospa Churinpa mamanmi karqa. Diospa mamanmi niq pantay yachachikuyqa hamunmi hukllapi kimsa Dioskuna niq yachachikuymanta.