¿Imanintaq Biblia qollqepaq pukllaymanta?

TELEVISIONPI otaq peliculakunapi qawaspankum wakinqa piensanku casino nisqanku wasikunapi qollqepaq apuestaqkunaqa reqsisqa otaq qollqeyoq kasqankuta. Ichaqa manam chaynachu.

Kay tiempopiqa qollqepaq apuestaqkunam astawan yapakuchkan, apuestankum lotería nisqankuta rantispa, imapipas pukllaspa hinaspa Internetnintakamapas. Kay asuntomanta estudiaq huk libropa nisqanman hinam Internetnintakama “apuestaspa pukllayqa vicio hina allpantinpi yapakuchkan”. Ejemplopaq, naipes otaq casino nisqankuwanmi yaqa lliw runakuna pukllanku televisionpi otaq Internetpi. Kay asuntomanta estudiaqkunam huk periodicopi ninku Estados Unidospi 18 killallapi chaywan pukllaqkuna iskay kutikama yapakusqanmanta.

Qollqepaq apuestaymanta rimaspaqa rimachkanchikmi pisi qollqellata apuestaspa achka qollqe ganaymanta. Achka runakunam piensanku kikinkupa qollqenkuwan mana viciakuspa apuestaspa pukllayqa allin kasqanta. Católica religionpa Catecismo sutiyoq libronmi nin: “Manam huchachu qollqepaq pukllayqa, huchaqa kanman kikinta otaq familianta mantienenanpaq qollqenta chay pukllaykunapi yanqachaptillanmi”, nispa. Ichaqa chay nisqankuqa manam Bibliapa nisqanman hinachu. Hinaptinqa, ¿imaynatam cristianoqa kaykunamanta tanteanman? ¿Imanintaq Bibliaqa qollqepaq pukllaymanta?

Bibliaqa manam sutillatachu qawachin qollqepaq apuestay allin otaq mana allin kasqantaqa. Ichaqa kanmi kay asuntomanta cuentata qokunapaq consejokuna. Chaymi niwanchik: “[Jehová Diospa] munasqantayá entiendeychik”, nispa (Efesios 5:17). Griego rimaypi ‘entiendenapaq’ nisqan palabraqa “allinta estudiaspa entiendenamantam nichkan” (Carta a los Efesios. Comentario para exégesis y traducción). Chaymi Diospa munasqanman hina kawsay munaq cristianoqa qollqepaq apuestaymanta Bibliapa ima nisqanta allin entiendenanpaq kallpanchakunan. Qatiqninpim qawasunchik Bibliapa ima nisqanmanta. Textokunata leesqaykiman hina tapukuy: “¿Ima nintaq kay texto qollqepaq apuestaymanta? ¿Qollqepaq pukllaspayqa Diospa munaynintachu rurachkayman?”.

Suertepi confiayqa toqllam

Suertepi confiaspam apuestanku. Astawanraqmi qollqepaq pukllaspankuqa suerte yanapananpi confianku. Ejemplopaq, achka runakunam lotería nisqankuta rantinku tanteasqanku numeroyoqkunallata, dadokunatam manaraq choqachkaspa pukunku,  wakinñataqmi pukllanankupaq casinota rakinakuspanku cuidakunku suerte yanqachaq palabrakunata mana rimanankupaq.

Ichaqa, ¿manachu allin kanman suertepi confiayqa? ¿Pitataq dañanman pukllaspalla apuestayqa? Ñawpa tiempopi israelitakunapas chaynatam piensarqaku. Suertepim confiarqaku kusisqa hinaspa kapuqniyoq kanankupaq. Ichaqa, ¿ima nirqam Jehová Diosqa chayna piensasqankumanta? Profeta Isaiasnintakamam nirqa: ‘Ñoqamanta karunchakuspam sapaqchasqay orqota qonqarunkichik, allin suerte apamuq Gad sutiyoq taytachamanmi mikuyta qonkichik, allin destino apamuq Meni sutiyoq mamachamanmi vinota servinkichik’, nispa (Isaias 65:11). Qawasqanchikman hina suertepi confiaytaqa taytacha-mamacha yupaychayta hinam Jehová Diosqa qawan, chaymi cheqap cristianokunaqa manam confianachu suertepiqa. Suertepi confiaqqa Diospim mana confianchu. Ñawpa tiempopi hinam Jehová Diosqa suertepi confiaytaqa mana allinpaq qawan.

Maymantataq premio chaskisqankuqa

Loteriata rantispa, casino nisqanku wasipi otaq Internetnintakama apuestaqkunaqa manam yachankuchu ganasqanku premio maymanta kasqanta. Qollqepaq apuestaywanqa manam igualchu negocio ruraywanqa, apuestaqkunaqa hukkunapa pierdesqantam ganayta munachkan. * Canadá nacionpi vicioyoqkunata yanapaq huk hospitalpim doctorkuna ninku: “Pipas lotería ganaqqa millonnintin runakunapa pierdesqantam ganan”, nispa.

Israelitakunaman Chunka Kamachikuy qosqanpim Dios nirqa: ‘Amam munapayankichu runamasikipa wasinta, [. . .] warminta, sirviententa, sirvientanta, asnonta nitaq runamasikipa imantapas’, nispa (Exodo 20:17). Pipapas warminta munapayayqa hatun hucham karqa, chaynallataqmi kapuqninta otaq qollqenta munapayaypas. Chaymantam pachaknintin wata qepata apostol Pablo cristianokunaman kaynata yuyarichirqa: “Amam munapayankichu”, nispa (Romanos 7:7). Sichum  huk cristiano runamasinpa pierdesqanta ganayta munaspanqa, ¿manachu munapayachkanman?

J. Phillip Vogel sutiyoq periodistam qellqarqa: “Reqsikuptinku otaq mana reqsikuptinkupas [apuestaqkunaqa yaqa llapankum] pisi qollqellawan apuestaspapas achka qollqe ganayta munanku”, nispa. Suertepi confiaspam chaylla apuyaruyta munanku. Chayna piensasqankuqa manam tupanchu Bibliapa nisqanwan, chaymi cristianokunata consejan: “Imatapas allinta ruraspañayá llamkachun chaynapi imallawanpas muchuqkunata yanapaykunanpaq”, nispa (Efesios 4:28). Apostol Pabloqa nirqataqmi: “Pipas llamkayta mana munaspaqa ama mikuchunchu”, nispa. Chaymi cristianokunaqa ‘llamkaspa chaywan mikunanku’ (2 Tesalonicenses 3:10, 12). Apuestaspa ganayqa manam llamkaspa ganaychu.

Ancha allinpaq chay pukllaykunata qawaptinkupas apuestaspa ganasqankuqa manam igualchu llamkasqankumanta pago chaskisqankuwanqa. Apuestaqqa, ganananpaq sasa kasqanta yachaspanpas suertepi confiaspam hinalla apuestan. Apuestaqqa mana llamkaspallam qollqe ganayta munan. Bibliapa nisqanman hinam cristianokunaqa mantienekunankupaq llamkananku. Rey Salomonmi nirqa: ‘Allinmi kanman mikuykunanpaq, tomaykunanpaq [allinta] llamkasqanmanta kusikuyninqa. Tukuy chaykunaqa Diosmantam’, nispa (Eclesiastes 2:24). Yanqa kaqkunapi otaq suertepi confiananmantaqa Jehová Diospim cristianokunaqa confianku.

Apuestayqa toqllam

Apuestaspa ganaqkunaqa tiempopa risqanman hinam sasachakuypi tarikunku chaymi allinta tanteananku. Proverbios 20:21 nisqanpi hinam qollqe kuyaq runaqa allintapaschá qallariypiqa gananqa ichaqa ‘qepa punchawkunapim manaña kusikunqachu’. Apuestaspa ganaqkunam cuentata qokunku qollqeqa cheqap kusikuy mana qosqanta. Chaymi Bibliapa consejasqanta kasukunanchik, ninmi ‘tukuruqlla qori-qollqeman ama hapipakunapaq, [aswanqa] kawsaq Diosman hapipakunapaq, payllam chaninninpiqa llapa imakunatapas kusikunanchikpaq qowanchik’ (1 Timoteo 6:17).

Apuestaspa ganaymantawan pierdeymantaqa kanraqmi huk razonpas imanasqa mana apuestanapaq. Diospa Palabranmi consejawanchik: ‘Apuyaylla munaqkunaqa tentachikuspam [otaq lazowan hapichikuspam] mana valeq kaqkunallaman wichiykunku, chaykunaqa apakun llakillamanmi hinaspa wañuyllamanmi’, nispa (1 Timoteo 6:9). Lazomanta rimaspanqa tupachichkanmi toqllawan hapirachikuymanta. Waranqantin runakunam suerteyoq kasqankuta yachanankuraykulla pisi qollqellawan apuestarqaku ichaqa qollqepaq pukllay viciowanmi toqllarachikurqaku. Qollqepaq pukllay vicioqa educacionniyoq runakunatapas hinaspa familiakunatapas yanqacharunmi.

Kay yachachikuypi Bibliapa textonkunapa nisqanta yachaspayki, ¿ima ninkitaq? ¿Allinpaqchu Diosqa qawan qollqepaq pukllayta? Cristianokunatam apostol Pablo consejarqa: ‘Amayá runakunapa imaynam kunan tiempopi kawsasqallantaqa qatipakuychikchu aswanqa imam piensasqaykichiktayá allinmanña tikraychik [. . .]. Chaynata kawsaspam yachankichik Diospa munasqanta, imam allin rurayta, imam agradonpaq kasqanta’ (Romanos 12:2). Cheqap cristianoqa manam runakunapa piensasqanman hinachu kawsan aswanqa Jehová Diospa munasqanman hinam. Payqa ‘kusisqa Diosmi’ chaymi munan kusisqa kawsananchikta (1 Timoteo 1:11 NM). Diosta kasukuspaqa kusisqam kawsakusunchik manam sasachakusunchu qollqepaq pukllay viciokunawanqa.

[Willakuy]

[19 kaq paginapi suti rikuylla kaq willakuy]

Diosta serviqkunaqa llamkaspam mantienekunku

[18 kaq paginapi recuadro]

Imam pasanman qollqepaq pukllaywanqa

¿Viciakuruchwanchu qollqepaq pukllaywanqa? Apuestaspa ganaqkuna otaq pierdeqkuna imayna sientekusqanta estudiaq Hans Breiter sutiyoq doctormi nirqa: ‘Apuestaspa ganaqkunapa cerebronmi drogakuqpa cerebronman rikchakun, drogakuqkunaqa drogakuspallam hawka tarikunku’, nispa.

[18 kaq paginapi dibujo]

¿Maymantataq apuestaspa ganasqanku qollqeqa?