México nacionmanta carta

‘¿Kuyawankuchu Jehová Diosqa kay llaqtamanta kaptiykupas?’

O’DAM castamanta Melesiom ciudadman hamuq llamkapakuy maskaq. Chaymi sapa hamuspan Jehová Diospa testigonkunapa huñunakuyninman riq, hinaspam Bibliamanta qellqakunata llaqtamasinkunaman apaq. Ruegakuwarqakutaqmi llaqtanman rispa Bibliamanta yachachinaykupaq.

O’dam castakunaqa yachanku otaq tiyanku Mexicopa norte lawnin Sierra Madre Occidental lawpim. Jehová Diospa testigonkunapa salonninqa karupim kachkan (240 km). Chaymi rinaykupaq tantearqaniku.

Hinaptinmi alistarqaniku carrota, karpata, puñunaykupaq kaqkunata, 3 punchawpaq gasolinatawan mikuyta. Chaymantam Durango ciudadmanta las cuatro tutapayta lloqsirqaniku. 8 horapim orqoman seqarqaniku carretera tukunankama. Chaymantam o’damkunapa allpanku qallarin. Qawarispam rikurqaniku uku wayqota hinaspa huk orqotaraq.

Carroykutam saqerqaniku huk llaqtachapi hinaspam pasarqaniku tukuy imaykuta qepikuykuspa. 3 horapim wayqoman chayarqaniku. Chaypim karpaykuta armarqaniku hinaspam yantakunata huñurqaniku, ima animalpas mana hamunanpaqmi ninata ratachirqaniku. Mana wañurunanpaqmi tukuy tuta turnanakurqaniku kimsa horanka.

Achikyaqtam orqoman seqayta qallaykurqaniku, achka ñankuna kaptinmi panta-pantata rirqaniku. Ichaqa hukniyku o’dam castakunapa idiomanta pisichallatapas yachasqanraykum predicastin rirqaniku. Hinaptinmi Los Arenales sutiyoq llaqtaman richkaptiyku niwarqaku chay llaqtapi Jehová Diospa testigonkuna kasqanmanta hinaspa huñunakusqankumantapas. Chay niwasqankuta llumpayta mana creespaykupas kusirikurqanikum.

Los Arenales llaqtamanmi ñakayta chayarqaniku chakiykupas toqyasqa. Chaypi wasikunam adobemanta hinaspa cartonkunawan techasqa kasqa. Manam kasqachu escuelapas nitaq luzpas, chaypi kaqkunaqa llumpay wakcham kasqaku, ciudadmantapas karupi, yaqa sapa kutim saramanta tortillallata mikusqaku. Melesiota tariruptiykum ancha kusikuywan wasinman  yaykuchiwarqaku. Willawarqakum testigokuna hamuspa familiantawan llaqtamasinkunata Bibliamanta yachachinanpaq Jehová Diosta sapa punchaw mañakusqanmanta. Nirqataqmi tapuptinku imayna kutichiy mana atisqanmantapas.

Chay lawpi kaqkunaqa brujokunapa nisqantam ruranku. Creenciankuraykum tullukunatawan ankapa purunkunata servichikunku, yupaychankum orqokunata, allpa pachata. Brujokunatam manchakunku, paykunañataqmi engañanku. Melesiom willawarqaku ciudadman rispan Jehová Dioslla cheqap Dios kasqanmanta yacharuspan taytachankuna kañasqanmanta. Vecinonkunas nisqaku “taytachakunam wañuchisunki” nispa, imapas mana pasaptinsi cuentata qokurusqaku Jehová Dios aswan atiyniyoq kasqanta. Melesiom familianman testigonkunapa qellqankunawan Bibliamanta yachachirqa chaymansi vecinonkuna risqaku.

Ichaqa Melesios nisqa puntataqa taytachankuta hinaspa creenciankupaq kaqkunata kañanankupaq. Achkas mana manchakuspa chayta rurasqaku, chaysi pisi tiempollapi 80 masnin runakuna Melesiowan Bibliata estudiasqaku. Willawasqankuwan admirakuspaykum chay tarde huñunakuy kananpaq tantearqaniku. Achka runakunam caballopi pasarqaku Melesiopa wasinpi huñunakuqkunaman willamunankupaq. Chawpi semanata hinaspa tiempowan mana willachichkaptiykupas 25 runakunam hamurqaku chakillawan wakinñataq asnopi.

Melesiopa yanapayninwanmi huñunakuypi kaqkunata nirqaniku Bibliapa nisqanmanta tapuwanankupaq. Hinaptinmi paykunaqa kaykunamanta tapuwarqaku: ‘¿Kuyawankuchu Jehová Diosqa kay llaqtamanta kaptiykupas?’, “¿Uyariwankuchu rimasqayku idiomapi mañakuptiykupas?”, “Armagedon chayamuptinpas ¿Jehová Diosqa yuyawanqakuchu ciudadmanta karupi kaptiykupas?”, nispa. Kusikuywanmi Bibliapa nisqanman hina yachachirqaniku maypi kaptinkupas otaq ima idiomata rimaptinkupas llampu sonqo runakunataqa Jehová Dios kuyasqanmanta. Huñunakuy tukuytam ruegakuwarqaku astawan yachachinanpaq pitapas kachamunaykupaq.

Chaymantam paykunawan kuska mikunaykupaq apasqaykuta mikurqaniku. Chaypiqa allintam tutapiqa chirin, samapakunaykupaq niwaptinkum agradecekuspayku chayraq perqasqanku wasipi samapakurqaniku. Achikyaqtam paykunapa purisqan ñanninta carroykupa kasqanman pusawarqaku. Chaymi Durango llaqtaman kutimurqaniku pisipasqa ichaqa kusisqa.

Anchatam kusikuniku chay llampu sonqo runakuna reqsisqaykumanta. Rimasqanku idiomapi qellqanchikkuna mana kaptinpas cheqap Dios reqsiytam hinaspa yupaychaytam munanku. Chaymantapacham 6 testigokuna chay llaqtachaman rispanku 3 semana qeparqaku, chaymi 45 runakunata yanaparqaku Jehová Diosta reqsispa servinankupaq hinaptinmi huñunakuykunaman richkanku.

Kay carta qellqayta manaraq tukuchkaspayku kaytawan willasqaykiku: Los Arenales llaqtachapim huk tiendalla kan chaypim cigarrota vendeqku, ichaqa manañam vendenkuñachu. ¿Imanasqa? Achka runakuna Bibliata estudiasqankurayku manaña pitaptinkum. Servinakuqkunapas casarakurunkuñam.

[26 kaq paginapi foto]

Melesio, señoranwan, tawa warmi churinkunawan hinaspa suegranwan

[27 kaq paginapi fotokuna]

Los Arenales llaqtapim Bibliata estudiachichkan hinaspam huñunakuypi kachkanku

[27 kaq paginapi suti rikuylla kaq willakuy]

Servicio Postal Mexicano, Correos de México