Familiapaq consejokuna

Warmaykichikman allinninpaq kaqkunata yachachiychik

Mexicomanta Loidam * nin: “Escuelapi preservativo nisqankuta aypuptinkum warmakunaqa piensanku cuidakuspa warmiwan otaq qariwan puñuyqa allinpaq kasqanta”, nispa.

Japonmanta Nobukom nin: “Rimapayasqan sipaswan waway sapallanku qepaspa ima rurananmanta tapuptiymi niwarqa: ‘Manam yachanichu’”, nispa.

WARMACHAYKICHIK chayraq puriyta qallaykuptinqa mana imanakunanpaqmi, corriente enchufanapaq kaqta tapaq kankichik, kuchukuq kaqta pakaq kankichik otaq gradastapas harkachiq kankichik.

Mozo-sipasña kaspankuqa astawan sasachakuypim tarikunku, chaymi cuidanaykichikpaq anchata sasachakunkichik. Ichapas piensankichik: “Qalalla kaqkunatachu qawachkan, icha munapayanankupaq hina fotorachikuspachu celularnintakama apachichkan”, nispa. Puñuytapas manapaschá tarinkichikchu kayta piensaspaykichik: “Warmanchikqa huchapakuymanñachu urmachkan”, nispa.

Ichapas allinta controlasqaykichikpaq piensankichik

Wakin tayta-mamaqa piensankum tuta punchaw controlay allin kasqanta. Ichaqa tiempo pasasqanman hinam cuentata qokunku imaynataña controlaptinkupas warmankuqa pakallapi mana allinkuna rurasqanmanta.

Chaymi llumpayta controlayqa manam yanapanchu. Jehová Diospas manam chaynata controlaspachu serviqninkunawanqa kasuchikun (Deuteronomio 30:19). Hinaptinqa, ¿imatataq rurawaqchik warmaykichik allinta tanteakunanpaq chaynataq portakuyninpipas chuya sonqo kananpaq? (Proverbios 27:11.)

Allinmi kanman warmaykichikwan kay yachachikuyman hina sapa kuti rimaynikichikqa. Kaymanta rimayqa allinmi kanman taksachanmantapacha, mozo-sipasyaptinkupas hinallam chaymanta rimana (Proverbios 22:6). * Qamkunam warmaykichikmanqa kaykunamanta willanaykichik. Gran Bretañamanta Aliciam nin: “Wakinmi piensanku qariwan  otaq warmiwan puñuymanta amistadnillaykuwan rimay munasqaykuta ichaqa aswan allinqa tayta-mamapa nisqankum, paykunapa consejonqa confianapaqmi”, nispa.

Yachanankum allin portakuymanta

Warmaykiqa yachanñachá wawakuna imayna rikurisqanta. Ichaqa manam chayllatachu yachanan. Entiendenanmi ‘allin kaqmanta hinaspa mana allin kaqmantapas’ (Hebreos 5:14). Yachanankum allin portakuyta chaynataq chuya sonqo kayninku cuidanankupaq allin tanteakuytapas. ¿Imatataq rurawaqchik chayman hina portakunankupaq?

Yachankichikchá manaraq casarakuchkaspa warmiwan otaq qariwan puñuyqa hucha kasqanta (1 Tesalonicenses 4:3). Warmaykichikpas chayna piensasqaykichiktaqa yachanmi, hucha kasqanta qawachiq textokunatapas umanmantachá yachanku. Huchapakuymanta imam piensasqanta tapuptikichikqa hucham nispachá contestasunkichik.

Ichaqa kaypi reparay, warmiwan otaq qariwan puñuymanta rimaq huk libropa nisqanman hinam warmakunaqa tayta-mamanpa nisqanta rimanku ichaqa “manam convencesqaraqchu kanku allin kaqmanta otaq mana allin kaqmanta”. Chay libroqa nintaqmi: “Warmakuna sasachakuypi chaylla tarikuspaqa manam atinkuchu allin kaqmanta otaq mana allin kaqmanta imayna tanteakuytapas”, nispa. Chaymi warmaykikunaqa imakuna allin kasqanpi tanteakuyta yachananku. ¿Imaynatam chaypaq yanapawaqchik?

Warmi-qari puñuymanta ima piensasqaykichikta niychik. ¿Warmiwan otaq qariwan puñunapaqqa casarasqachu kana? Chayna kaptinqa sapakutim yuyarichinaykichik. Huk librom nin: “Chayllaraq mozo-sipasyaq warmakuna, warmiwan otaq qariwan puñusqankuta tayta-mama mana allinpaq hapisqanta warmankunaman qawachiptinqa yaqa llapanpim paykunaqa kasukunku”, nispa.

Warmi-qari puñuymanta tayta-mamanku imayna piensasqanta yachaspankupas wakinpiqa manam rurayman churankuchu. Chayna kaptinpas yanapanmanmi allin portakuyta yachanankupaq. Kay asuntomanta estudiaq runakunam qawachinku mozo-sipaskunaqa tiempopa risqanman hina tayta-mamanpa nisqanta kasukusqankuta, warmallaraq kaspa mana kasukuspankupas.

KAYTAPAS RURAWAQCHIKMI. Ima noticiatapas servichikuspa rimayta qallariychik chaymanta imayna piensasqaykichikta niychik. Ejemplopaq pi warmitapas abusasqankumanta uyarispaykichikqa kaynatam niwaqchik: “Hukmanyanapaqmi wakin qarikunaqa warmita qawanku puñunallankupaq serviq kasqanta. Piensasqaykiman hina ¿imanasqataq chayna kanku?”.

Warmi-qari puñuymanta imam kaqta willaychik. Warmakunamanqa willanam manaraq casarakuchkaspa warmi-qari puñuyqa sasachakuy apamusqanta (1 Corintios 6:18; Santiago 1:14, 15). Yuyariychik Bibliaqa casado vidapi warmi-qari puñuytam Diospa regalon kasqanta qawachin manam Satanaspa toqllanta hinachu (Proverbios 5:18, 19; Cantares 1:2). Warmi-qari puñuymanta mana allinllata rimaptikichikqa hukmantam qawanqaku manataqmi Bibliapa yachachisqanman hinachu. Franciamanta Annam nin: “Huchapakuyqa mana allin kasqanmantam tayta-mamay sapa kuti niwaqku chaymi warmi-qari puñuytaqa mana allinpaq qawarqani”, nispa.

Chaymi warmi-qari puñuymantaqa imam kaqta willanaykichik. Mexicomanta Nadiam nin: “Sapa kutim kallpanchakurqani casado vidapi warmi-qari puñuyqa Diospa regalon kasqanta wawaykuna entiendenankupaq. Munanim chay regalota imayna servichikusqankuman hina allinpaq otaq mana allinpaq kasqanta entiendenankuta”, nispa.

KAYTAPAS RURAWAQCHIKMI. Warmi-qari puñuymanta yapapi rimaspaqa ama rimaychikchu mana allin kaqmantaqa. Ama iskayrayaychikchu warmi-qari puñuyqa Jehová Diospa regalon kasqanmanta rimanaykichikpaq, aswanqa qawachiychik casarakuspanqa  kusikunanpaq kasqanta. Qawachiychiktaq casarakunankama Diospa kamachisqanman hina portakusqanpi confiasqaykichiktapas.

Mana allinta portakuptinqa imam pasananta qawachiychik. Allinta tanteanapaqqa manam yachayllachu yachana imam allin otaq mana allin kasqanta. Allintam yachana allinninchikpaq kaqmanta otaq mana allinninchikpaq kaqmantapas. Australiamanta Emmam nin: “Warma kaspayqa allintam yacharqani Diospa kamachisqanmanta. Ichaqa manam convencesqachu karqani. Mana allinta tanteasqaymi qawachiwarqa Diosta kasukuyqa allin kasqanta mana kasukuyñataq mana allin kasqanta”, nispa.

Bibliam yanapawanchik Diospa leyninkunamanta yachanapaq, qawachintaqmi mana kasukuptinchik ima pasawananchiktapas. Ejemplopaq Proverbios 5:8, 9 nisqanpim qawachin huchapakuymanta huk mozo imanasqa ayqekunanpaq: “Vidaykitam [otaq honornikitam]” yanqachawaq. Huchapakuqqa allin kaynintawan honornintam yanqachan. Dioswan amistadninta yanqacharuspanpas manataqmi chuya sonqo kaqkunapaqqa allinñachu tarikun. Sichum warmayki yachanqa Diosta mana kasukuyqa mana allinninpaq kasqanta hinaptinqa kallpanchakunqachá Diospa kamachisqanman hina kawsananpaq. *

KAYTAPAS RURAWAQCHIKMI. Tupanachiykunata servichikuspa warmaykichikman entiendechiychik Diospa Palabranpa nisqanta kasukuyqa allin kasqanta. Ichapas kaynata niwaqchik: “¿Yanukunapaq ninata ratachiywan monteta kañaykuywan chaynallachu kanman? Hinaptinqa ¿imataq pasanman Jehová Diospa kamachisqanta mana respetaspa warmiwan otaq qariwan puñuy munasqanchikta mana controlaptinchikqa?”, nispa. Hinaspa Proverbios 5:3-14 nisqanta leepuychik huchapakuyqa mana allin kasqanmanta cuentata qokunanpaq.

Ichaqa allin kaqta rurayta munaspapas yaqa sapa kutim pantanchik. Japón naciomanta chunka pusaq watayoq Takao sutiyoq mozom nin: “Yachanim imayna portakunaypaq kasqanta ichaqa sasam warmiwan puñuy munasqayta controlayqa”, nispa. Warmaykichik chayna sientekuptinqa qawachiychik apostol Pablopas pay hina sientekusqanta, paymi nirqa: “Allin rurayta munaptiypas mana allinllamá ñoqapi kachkan”, nispan (Romanos 7:21).

Chaymantapas, chayna kallpanchakusqanqa mozotam yanapan imayna portakuq runa kananpaq, ima munasqanpipas controlakuq otaq mana controlakuq kananpaqpas. Jehová Diospa yachachikuyninman hina kawsasqanmi yanapanqa allinta tanteakunanpaq.

[Willakuykuna]

YUYAYMANANAPAQ TAPUKUYKUNA

▪ Warmayqa, ¿sutillatachu qawachin allin portakuq kasqanta?

▪ Warmaykunawan warmi-qari puñuymanta rimaspayqa ¿Diospa regalonta hinachu qawachini icha Satanaspa toqllanta hinachu?

[12 kaq paginapi recuadro]

Bibliaqa confianapaqmi

Chayraq mozo-sipasyaq warmakunata imayna uywanapaq consejaq huk librom nin: “Warmi-qari puñuymanta Bibliapa consejasqanqa allinmi hinaspa confianapaqmi. Reparasun, achka mozo-sipaskuna manaraq casarakuchkaspa warmiwan otaq qariwan puñusqankurayku wawayoq kasqankupi otaq sida nisqanku onqoywan hinaspa chayna mana hampiy atina onqoywan hapirachikuspa ñakarisqankupi. Kaykunam clarota qawachin casarakuspaña warmi-qari puñunapaq Bibliapa consejasqanqa kay tiemponchikpaqpas allinpuni kasqanta”, nispa.