Jehová Diospa testigonwan rimaspa: Allin runakunaqa, ¿hanaq pachamanchu rinqaku?

JEHOVÁ DIOSPA TESTIGONKUNAQA anchatam munanku vecinonkuwan Bibliamanta rimayta. ¿Kachkanchu Bibliapa yachachisqanmanta ima tapukuynikipas? ¿Munawaqchu Jehová Diospa testigonkunapa imapi creesqankumanta yachayta? Chayna kaptinqa, ¿imanasqataq paykunawan tupaspayki mana tapunkichu? Paykunaqa kusikuywanmi yanapaykusunki.

Paykunapa yachachisqanku imayna kasqanmanta yachanaykipaq piensariy Marcos sutiyoq Testigopi, paymi Roberto sutiyoq runaman watukunqa.

¿Imatam ruranqaku hanaq pachaman riqkunaqa?

Marcos: Piensasqaykiman hinaqa ¿yaqachu hamuq punchawkunapi tukuy imakunapas allin kanqa icha hina kaqllachu?

Roberto: Ñoqapa piensasqayman hinaqa tukuy imakunapas allinyanqam, llapanchiktaqmi Dioswan hanaq pachapi kawsakusun.

Marcos: Allinmi chayna piensasqaykiqa. Bibliapas ninmi hanaq pachapi kawsayqa ancha allin kasqanmanta. Ichaqa, ¿yachankichu hanaq pachaman riqkuna imata ruranankumanta?

Roberto: Yaqachiki chaypiqa Diosta wiñaypaq alabasunchik.

Marcos: Allinmi chayqa. Bibliam niwanchik hanaq pachaman riyqa ancha allin kasqanmanta, ichaqa imapas rurayninkutam cumplinanku.

Roberto: ¿Ima ruraykunatam cumplinanku?

Marcos: Apocalipsis 5:10 nisqanta qaway, kaypim nin: ‘Diosniykupaqmi munaychakuqtawan sacerdotekunataña rurarurqanki. Kay Pachata gobiernanankupaqmi chaynataqa rurarurqanki’, nispa. Chaynaqa, ¿imatam hanaq pachaman riqkunaqa ruranqaku?

Roberto: Leesqaykiman hinaqa, ‘Kay Pachatam gobiernanqaku’.

Marcos: Ima sumaqmi ¿aw?

¿Pikunatam kamachinqa?

Marcos: Hanaq pachaman riqkuna reykunaña kaptinqa, ¿pikunatam kamachinqaku? ¿Manachu reykunaqa otaq gobiernokunaqa pitapas kamachinan?

Roberto: Arí, chaynamiki.

Marcos: Hinaptinqa, ¿pikunatam kamachinqa?

Roberto: Yaqachiki kay Pachapi mana wañuspa kawsaqkunata.

 Marcos: Hinaptinqa lliw allin runakunachiki hanaq pachaman rinanku. Ichaqa, ¿imataq pasanman allin runakunamanta wakinku hanaq pachaman mana riptinkuqa?

Roberto: Yachasqayman hinaqa manam pi cristianopas chaypiqa creenchu.

Marcos: Ñoqaqa nichkani Salmo 37:29 nisqanman hinam. Ama hina kaspa, ¿leeykuwaqchu?

Roberto: Arí, ninmi: “Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa.

Marcos: Leesqaykiman hinaqa, ¿maypitaq allin runakuna kawsanqaku?

Roberto: Kay Pachapim.

Marcos: Allinmi chayna nisqaykiqa ichaqa ¿hayka watam chaypi kawsanqaku? Qaway kayna nisqanta “paykunaqa chaypimiki wiñaypaqraq kawsakunqaku” nispa.

Roberto: Chaywanqa nichkanchiki haykapipas allin runakuna kay Pachapi kananmanta. Wañukuspa hanaq pachaman riqkunapa rantinpichiki, hukkunaña nacemuspa kawsanqaku.

Marcos: Achkam chaynata piensanmanku. Ichaqa, cheqapta wiñaypaq kay Pachapi allin runakuna kawsananmanta ¿niptinqa?

Roberto: ¿Imayna? Manam entiendekichu.

Kay allpa Pachapim sumaq huerta kanqa

Marcos: Qaway Apocalipsis 21:4 nisqanpi, chaypim nin runakunapaq Dios imata rurananmanta: “Diosmi pichanqa paykunapa weqenta, manañam kanqachu wañuypas, lutokuypas, waqaypas nitaq nanaypas. Ñawpaq kaqkunaqa pasarunñam”. Kay suyakuymi kachkam kay Pachapi kawsaq runakunapaq. ¿Manachu kayqa ancha allin suyakuy?

Roberto: Arí, chaypiqa rimachkanchusmi hanaq pachapi chayna kananmanta.

Marcos: Arí, hanaq pachaman riqkunapas chaynam kawsakunqaku. Ichaqa kay versiculopa nisqanman hinaqa ¿imataq pasanqa wañuqkunawan?

Roberto: Ninmi: “Manañam kanqachu wañuypas”, nispa.

Marcos: Pipas wañunanpaqqa puntataraqmi kawsanan, ¿aw?

Roberto: Awriki.

Marcos: Chaynaqa, ¿nichwanchu hanaq pachapi wañuy kasqanmanta? ¿Manachu kay Pachallapi runakunaqa wañunku?

Roberto: Manam haykapipas chaynataqa piensarqanichu.

Marcos: Bibliaqa willawanchikmi wakin runakuna hanaq pachaman rinanmanta, ichaqa nintaqmi kay Pachapipas wiñaypaq achka runakuna kawsanankumanta. ¿Uyarirqankichu Jesuspa kayna nisqanta? Mayna kusisqam llampu sonqoyoqkunaqa, paykunaqariki herenciapaqmi kay Pachata chaskinqaku niqta (Mateo 5:5).

Roberto: Arí, iglesiaypiqa sapa kutim chaynata rimanku.

Marcos: Llampu sonqoyoqkunaqa kay Pachapim kawsanqaku. Apocalipsis libropa nisqanman hinaqa kawsanqaku, kay Pachapi kaqkunam. Chaypi kawsakuyqa kanqa manam kunan hinañachu, Diosmi chinkachinqa mana allinkunata hinaspa wañuytapas.

Roberto: Entiendenim ima niy munasqaykita, ichaqa manachusmi chaynataqa piensaymanchu iskay-kimsa textokunallawanqa.

Marcos: Arí, Bibliaqa achkatam willawanchik hamuq tiempopi imayna kawsakuy kananmanta. Tiempoyki kaptinqa rimachwanraqmi gustawasqan textomanta.

Roberto: Chaynaqa qawaykusunyá.

 Manañam kanqachu mana allin runakunaqa

Marcos: Salmo 37:29 leesqanchikmanta astawan yachanapaq qawasun 10 hinaspa 11 versiculokunata. ¿Leeykuwaqchu?

Roberto: Ninmi: “Mana allin ruraqkunaqa chayllapunim kanqañachu. Maskaspapas paykunataqa manapunim tarinkichu. Ñakariqmi ichaqariki dueñoyanqa allpatapas. Paykunaqa kusikuywanmi hawkayaypi kawsanqapas”, nispa.

Marcos: Gracias. 11 versiculopa nisqanman hinaqa, ¿maypitaq allin runakunaqa kawsanqaku?

Roberto: Chaypiqa ninmi allpata dueñoyanankumanta. Kayqa kunanchu cumplikuchkan. Icha, ¿manachu kan allin runakuna enteron Pachapi?

Marcos: Kanmi. Ichaqa Bibliam niwanchik ‘hawkayaypi kawsanankumanta’. Chaynaqa, ¿niwaqchu kaypas cumplikusqanmanta?

Roberto: Manam.

Marcos: Chaynaqa, ¿imataq pasanan chay cumplikunanpaqqa? Piensay hatun wasiyoq kasqaykipi. Chay wasikita arriendakusqayki runakunaqa hawkallam yachanku, wasikitapas allintam cuidanku hinaspa vecinonkunawanpas allinmi kawsanku. Ichaqa wakinkum hukmanyachisunki wasikita mana cuidaspanku hinaspa hukkunatapas sasachaspanku. Chay runakuna mana cambiaptinqa ¿imatam rurawaq?

Roberto: Qarqoruymanchiki.

Marcos: Chaynatapunim Diospas ruranqa mana kasukuq runakunawan. Kaqmanta qawasun 10 versiculota. Chaypim nin: “Mana allin ruraqkunaqa chayllapunim kanqañachu”, nispa.

Roberto: Manam chaynataqa haykapipas uyarirqanichu iglesiaypiqa.

Marcos: Nisqaykipi hinapas manam iskay-kimsa versiculollawanqa yacharuchwanchu. Chayta yachanapaqqa qawananchikmi chay versiculopa ñawpaqninpi hinaspa qatiqninpi nisqanta, chaynapi imatawanraq Bibliapa nisqanta yachanapaq. Kay textokunata qawasqanchikman hinaqa, ¿yaqachu hanaq pachaman rinmanku hinaspa wakinñataq kay Pachapi wiñaypaq kawsanmanku?

Roberto: Manam segurochu kani, ichaqa leesqayman hinaqa yaqachusmi. Chaypaqqa allintaraqmi estudianay.

Marcos: Estudiasqaykiman hinaqa achka tapukuykunam rikurimunqa. Huk kaqninmi kanman, allin runakuna wañukuspa mana hanaq pachapi kaspankuqa, ¿maypitaq kachkanku?

Roberto: ¡Allinchus chay tapukuyqa!

Marcos: Munaymanmi wakin textokunata qawanaykipaq saqeyta. * Munaymantaqmi chay textokunata qawananchikpaq kutimuyta. ¿Allinchu kanman?

Roberto: Suyasqaykim.

[Willakuy]