Rosa: Imaynallam, vecinoykikunawanmi qawachkarqani kay qellqata. Ninmi ¿Munawaqchu cheqapmanta yachayta? ¿Saqeykuykimanchu?

Sofia: ¿Religionmantachu rimachkan?

Rosa: Arí. Qawariy qaranpi kay soqta tapukuykunata. ¿Mayqenmanta yachaytataq...?

Sofia: Manaraqmi, ama ñoqawanqa tiempoykita usuchiychu.

Rosa: ¿Imanasqataq chaynata ninki?

Sofia: Manachusmi Diosqa kanchu.

Rosa: Agradecekuykim piensasqaykita niwasqaykimanta. ¿Chaynatachu warma kasqaykimanta piensarqanki?

Sofia: Warma kaspayqa iglesiamanmi riq kani, ichaqa unayñam saqeruni.

Rosa: Chayraykuchiki. Pampachaykullaway manam sutiyta willarqaykichu sutiyqa Rosam.

Sofia: Ñoqapaqa Sofiam.

Rosa: Kusikunim reqsisqaymanta Sofia.

Sofia: Ñoqapas.

Rosa: Manam ñoqapa iñisqaypi creenaykipaq hikutaqchu hamurqani, ichaqa niykuway: ¿imataq iskayrayachisurqanki Dios kasqan otaq mana kasqanmanta?

Sofia: Mamaymi 17 wata ñawpaqta carropi richkaspan chocarurqa.

Rosa: Llakikuypaqmi chayqa. ¿Imaynataq kunanqa kachkan?

Sofia: Mana puriqmi qeparun.

Rosa: ¡Imay sonqolla! Mayna llakisqachá tarikunki.

Sofia: Arí. Sapa punchawmi tapukuni: “Dios kaptinqa, ¿imanasqataq kaynataña ñakarinanchikta saqen?”, nispay.

Rosa: Manamá qamllachu chaynaqa sientekunki nitaq qamllachu chaytaqa tapukunkipas. Llapanchikmi ñakarispanchikqa yachayta munanchik imanasqa chay pasawasqanchikmanta. Ñawpa tiempopi Diosta serviq runakunatapas chayqa pasarqam.

Sofia: ¿Ciertota?

Rosa: Arí. ¿Munawaqchu chaymanta qawaykachinayta?

Sofia: Awriki, munaymanmi.

Rosa: Qawariy Diosta serviq Habacucpa tapukusqanmanta. Leesun qellqasqan libropi Habacuc 1:2, 3 nisqanta: “Dios Taytalláy ¿haykapikamataq mana uyariykuwankichu qayakamusqaytaqa? ¿Haykapikamataq mana salvaykuwankikuchu daño ruraymanta qaparimuchkaptiyqa? ¿Imanasqataq qawachiwachkanki mana allin ruraykunataqa?”. ¿Yaqachu qampa tapukusqayki hina kaykuna?

Sofia: Arí.

Rosa: Chaywanpas Diosqa manam Habacuctaqa castigarqachu chay tapusqanmantaqa manataqmi mana iñisqantaqa nirqachu.

Sofia: Manam chaytaqa yacharqanichu.

Rosa: Bibliapiqa nintaqmi ñakarisqanchikta qawaspan Dios llakikusqanta.

Sofia: ¿Imakunataq llakichinman?

Rosa: Bibliapi qawaykusun Exodo 3:7 nisqanta. ¿Leeykuwaqchu?

 Sofia: Arí. Ninmi: “Diosqa nirqataqmi: Qawachkanim Egipto nacionpi runaykunapa ñakarisqanta, uyarichkanitaqmi llamkachiqninkunarayku waqasqankutapas. Yachanitaqmi nanaypi kallasqankutapas”, nispa.

Rosa: Gracias. Kay versiculopi qawasqanchikman hina, ¿Diosqa qawachkanchu runakunapa ñakarisqankuta?

Sofia: Yaqachusmi.

Rosa: Manam yanqa-yanqallatachu qawanqa. Kaqmanta qaway kay versiculopa tukuyninta. Diosmi nirqa: “Yachanitaqmi nanaypi kallasqankutapas”, nispa. ¿Yaqachu Diosqa chaynata ninman karqa mana llakipayakuq kaspan?

Sofia: Manachá.

Rosa: Manamá chaynallachu runakunapa ñakarisqanta qawaywan llakipayayqa.

Sofia: Ciertom chayqa.

Rosa: Ama chaytaqa qonqaychu. Qawasun huktawan Diospa llaqtan ñakariptin Dios imayna tarikusqanmanta. Kayqa Isaias 63:9 nisqanpim kachkan. Kay versiculopa qallariyninmi nin: “Runankunapa tukuy ñakarisqankunapim paypas ñakarirqa”, nispa. ¿Niwaqchu llaqtan ñakariptin Diospas llakikusqanmanta?

Sofia: Arí, chaynachusmi.

Rosa: Diosqa manamá munanchu ñakarinanchiktaqa. Ñakariptinchikqa paypa sonqonpas nananmi.

Rosa: Manaraq pasakuchkaspay kaytawan qawaykachisqayki.

Sofia: Allinmi.

Rosa: Qaway imatam Biblia nin Diospa atiyninmanta. ¿Leeykuwaqchu Jeremias 10:12 nisqanta?

Sofia: Arí, kaypim nin: “Diosmi kay pachata rurarqa atiyninwan. Tukuy kay pachapi kaqtam takyachirqa yachayninwan. Cielokunatapas mastarirqam ancha entiendeyninwan”, nispa.

Rosa: Pisillapi qawasun kay versiculopa imam nisqanta. ¿Hayka atiynintataq Dios servichikurqa tukuy imata unanchananpaq?

Sofia: Achka atiynintachá.

Rosa: Awriki, Diosqa atiyniyoqmi tukuy ima qawasqanchikta unanchananpaq, ¿chaynaqa manachu tukuy ima unanchasqanta controlanman?

Sofia: Atinmanmi.

Rosa: Kaqmanta rimarisun mamaykimanta. ¿Imanasqataq ñakarisqanta qawaspayki llakikunki?

Sofia: Mamay kasqanraykum hinaspa kuyasqayraykum.

Rosa: Atiyniki kaptinqa, ¿sanoyarachiwaqchu?

Sofia: Arí, chaytamá ruwayman.

Rosa: Kaypi piensay. Bibliapim qawarqanchik Diosqa ñakarisqanchikmanta llakikusqanta hinaspa ñakarisqanchikta chinkachinanpaq atiyniyoq kasqantapas. Ichaqa manam chinkachinraqchu. ¿Piensankichu chayta mana ruwasqanrayku imayna sientekusqanta?

Sofia: Manam haykapipas chaytaqa piensarqanichu.

Rosa: Chaynaqa tapukuchwanmi: ¿Imanasqataq kunankamaqa mana chinkachinraqchu ñakarisqanchikkunataqa? a

Sofia: Manam yachanichu, imanasqaya.

Rosa: Telefonoyki waqamuchkan qayamusuchkankichusmi. ¿Allinchu kanman huk punchawña kutimuptiy hinalla kaymanta rimananchikpaq?

Sofia: Allinmi. b