Albertom soldado karqa chunka wata, paymi willakun: “Huk curam bendeciwarqaku ‘Diosmi qamkunawan kachkan’, nispa. Chaymi piensaq kani, ‘imaynamá runamasiy wañuchiqqa richkani’ ‘amam pitapas wañuchinkichu’ nispan Biblia nichkaptinqa”, nispa.

Raymundom iskay kaq hatun guerra kaptin soldado karqa. Huk kutipis kasqanku barcoman huk cura seqaptin tapusqa: “Qamqa soldadokunapaq chaynataq vencenaykupaqmi rezanki, ¿manachu enemigonchikwan kaq curapas chaynata rezapuchkan?”, nispa. Curañataqmi contestawarqa Diospa tanteasqankunaqa sasa entiendey kasqanmanta.

Curapa chayna contestasqantaqa manapaschá allinpaqchu hapinki.

Jehova Diospa kamachisqanmantam Jesus nirqa: “Kuyankim runamasikita kikikita hina”, nispa (Marcos 12:31). ¿Chaywanqa nichkarqachu llaqtamasinchik kaqkunallata kuyanapaq? Manam. Qatiqninkunamanmi yachachirqa: “Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:34, 35). Cheqap cristianokunaqa kuyanakusqankuraykum iñiqmasinkupa rantinpi wañuyta munanku. Chayna kuyanakusqankuwanmi sutillata reqsichikunku.

Chayna kasqankumantam huk qellqa nin: “Tertuliano hinaspa Orígenes sutiyoq runakunam nirqaku cristianokunaqa yachankum runamasinta mana wañuchinanpaq kasqanta chaymi romapi soldado kaytaqa mana munarqakuchu”, nispa. (The Encyclopedia of Religion.)

Yaqa enteron pachapim kan Jehova Diospa testigonkunaqa. Maypipas guerra kaptinqa kuyanakusqankutam sutillata qawachinku.

Ruanda nacionpi 1994 kaq watapi hutus hinaspa tutsis nisqanku castakuna wañuchinakuptinkum Jehova Diospa testigonkunaqa mana mayqenmanpas sayapakurqakuchu. Ichaqa wañunanku kaptinpas mayqen castamanta kaspapas iñiqpuraqa yanapanakurqakum. Milicia Interahamwe nisqanku tropakuna hutus casta Testigota hapiruspankum nirqaku: “Tutsis castakunata yanapasqaykimantam kay pasasunki”, nispa. Hinaspam iskayninkuta wañurachirqaku (Juan 15:13).

Chayna kuyanakuspa yanapanakusqankuqa, ¿tupanchu Señor Jesuspa nisqanwan?