Wakin runakunam piensanku divorciakuruspaqa kusisqa kawsakunankupaq kasqanpi, wakinmi ichaqa hinalla casarasqa kayta munanku ichaqa manam obligankuchu pasakuy munaq qosankutaqa otaq warminkutaqa paywan qepananpaqqa. Chayna kaptinpas yaqa llapankum cuentata qokunku divorciakusqanku qepataqa vida pasay sasa kasqanmanta. Chayraq divorciasqa kaspaykiqa cuentatachá qokunki chayna kasqanmanta. Kay yachachikuypiyá Bibliapa consejasqankunamanta yachasun ichapas yanapasunkiman.

Sasachakunkum qollqe mana haypaptin, wawankuta otaq churinkuta uywasqankuwan chaynataq sapallanku sientekusqankuwan, hukmanyasqa sientekusqankutaqa manam chayllachu atipanku. Hukkunata consejaq Judith Wallerstein sutiyoq doctorapa nisqanman hinam wakin divorciakuqkunaqa unay watakuna qepatapas hinallaraqmi traicionasqa chaynataq saqesqa sientekunku, paykunam ninku: “Justicia mana kaptinmi hukmanyasqa chaynataq sapallayku hina sientekuniku”, nispa. (Chay doctoraqa wañukunñam.)

 CONSEJOKUNA

• Waqanayasuptikiqa waqay. Yaqapaschá llakisqaraq tarikunki kuyasqa warma yanaykimanta. Piensarqankichá casado vidaykipi kusisqa kawsakunaykipaq kasqanpi, ichaqa hukmanyasqapaschá tarikunki mana chayna kasqanwan (Proverbios 5:18). Waqayqa manam penqakunapaqchu, Bibliam nin: “Kanmi waqanapaq tiempo”, nispa (Eclesiastes 3:1, 4).

• Ama amistadnikikunamanta karunchakuychu. Imam pasasusqaykimanta sapallaykipi piensariyniki allinpaq kaptinpas manam allinchu kanman unay tiempo sapallayki kaynikiqa (Proverbios 18:1). Allin kaqkunamanta rimay ama sapakutillaqa rimaychu divorciakusqayki qosaykimanta otaq warmikimantaqa, mana chayqa amistadnikikunam qanmanta karunchakurunmanku. Divorciakusqayki qepata imapaqpas tanteanayki kaptinqa confianzapaq amistadnikipa yanapayninta maskay.

• Saludnikita cuiday. Divorciakuqkunaqa tukuymanta preocupakuspankum uma nanaywan otaq ima onqoywanpas tarikunku. Allinta alimentakuy, ejerciciota ruway chaymantapas allinta puñuy (Efesios 5:29).

• Qosaykimanta otaq warmikimanta divorciakuruspaqa payta yuyarichisuqniki kaqkunata ama waqaychaychu, valorniyoq papelkunata ichaqa waqaychay. Casarakusqaykichikpi fotokunataqa ichapas waqaychawaq wawaykikuna otaq churikikuna qawanankupaq.

• Ama piensaychu mana allin kaqkunapiqa. Olgam qosan hukwan engañaptin divorciakururqa, paymi nin: “Sapa kutim kaynata rimaq kani: ‘¿Ñoqamantaqa payqa imayna warmitaq?’”, nispa. Ichaqa cuentatam qokururqa chayna piensayninqa astawan hukmanyachisqanta (Proverbios 18:14).

  Wakinqa imayna sientekusqankumantam qellqanku, chaywanmi yanapachikunku allin kaqkunapi piensanankupaq. Chaynata ruwaspaykiqa qellqay allin kaqkunapi piensasqaykita ama mana allin piensasqaykikunamantaqa (Efesios 4:23). Reparay qatiqnin ejemplokunapi:

  Mana allin piensay: Ñoqam huchayoq kani vida pasaqmasiy hukwan pasakusqanmanta.

  Allin piensay: Manam huchayoqchu kani hukwan pierdekusqanmantaqa.

  Mana allin piensay: Paywanmi warma vidayta yanqacharuni.

  Allin piensay: Imam pasawasqanpi manaña piensaspayqa allin kaqkunata ruwaspaymi kusisqa kasaq.

• Ama kasuychu sientechisunaykipaq hina rimasqankutaqa. Wakin amistadkunaqa otaq familiakunaqa allinnikipaq piensaspankum mana allinkunata rimaspa sientechisunkiman. Ichapas nisunkiman: “Payqa manam qampaq hinachu karqa” otaq “Diosqa cheqninmi divorciakuyta” b, nispa. Chaymi Bibliaqa nin: “Ama [uyariychu] llapa rimasqankuta”, nispa (Eclesiastes 7:21). Martinam iskay wataña divorciasqa, paymi nin: “Sientechiwanankupaq hina hukkunapa rimasqanpi piensanaymantaqa kallpanchakunim Diospa piensasqanman hina piensanaypaq. Runapa piensayninmantaqa Diospa piensasqanmi aswan allinqa”, nispa (Isaias 55:8, 9).

• Diosta mañakuy. Payqa consuelanmi ima llakiña pasaptinpas paypi confiaqkunataqa (1 Pedro 5:7).

Julianam 11 wataña casarasqa karqa paymi nin: “Qosaytam ruegarqani ama saqewananpaq. Ichaqa  saqeruwaspanmi huk warmiwan pasakurqa, chaymi qosayta llumpayta cheqnirqani chaynataq warmintapas”, nispa. Divorciasqakunaqa yaqa llapankum cheqninakunku. Ichaqa ima asuntomantapas rimanankum, astawanraqmi wawa-churinku kaptinqa.

CONSEJOKUNA

• Hawkalla rimay divorciakusqayki qosaykiwan otaq warmikiwan. Ima asuntomantapas rimaspaqa chayllamanta rimaychik pisillapi. Achkam cuentata qokunku chaynata rimaspaqa hawkalla kasqankumanta (Romanos 12:18).

• Ama nanay simikiwanqa rimaychu. Tratapasqa otaq sientechisqa tarikuqtam Biblia kaynata consejan: “Ancha yachayniyoqmi pisilla rimaq runaqa”, nispa (Proverbios 17:27). Hawkalla rimanaykichikpaq kallpanchakuptikipas piñanakuy qallariptinqa ichapas niwaq: “Allintaraq tanteaykamusaq yapapiña rimananchikpaq”, nispa.

• Paywan manaña sasachakunaykipaq ima kapuqnikichikmantapas autoridadkunapa qayllanpi papelta ruwaychik, chaynata ruwaychik qollqekichikta rakinakunaykichikpaqpas hinaspa saludnikichikpaqpas sapakamaña doctorta maskaychik.

Mariam willakun divorciakusqay qepallatam taksa kaq warmachay waqaqllaña rikurirurqa chaymantapas camapi ispakuytam qallaykurqa, mayor kaq wawanpas kallpanchakurqam llakisqa kasqanta mana qawachinanpaq ichaqa hukmanyarurqam. Divorciakuruptikiqa warmaykikunam astawan yanapanaykita necesitan, manapaschá yanapayta atinkichu hukmanyasqa otaq mana tiempoyoq tarikusqaykiwan.

CONSEJOKUNA

• Warmaykikunapa rimasqanku yanqapaq rikchakusuptikipas imayna sientekusqankumanta rimanankupaq kallpanchay (Job 6:2, 3).

• Hukmanyasqa kaspaykipaschá warmaykikuna yanapasunaykita munawaq ichaqa manam allinchu kanman yuyayniyoqkunapa sasachakuyninta warmacha allichayninqa (1 Corintios 13:11). Warmaykikunaqa manam vida pasaqmasikichu imayna tarikusqaykimanta willakunaykipaqqa nitaq divorciakusqayki qosaykiwan otaq warmikiwan rantikipi rimananpaqqa.

• Ama cambiaychu warmaykikunawan imayna kawsasqaykichiktaqa. Allinmi kanman tiyasqaykichik otaq yachasqaykichik sitiopi qepaspa imam ruwanaykichikta hinalla ruwaynikichik. Imamantapas aswan allinqa Diosmanta hinalla yachaymi, chaypaqqa Bibliatam leena chaymantapas familiapim Diosta yupaychana (Deuteronomio 6:6-9).

Divorciakuruspapas kusisqa kawsanaykipaq kallpanchakuy. Milagrosmi 16 watakunaña casarasqa karqa, paymi nin: “Divorciakuytaqa manam haykapipas piensarqanichu ichaqa chaymi pasaruwarqa”, nispa. Chayna pasaptinpas kunanqa kusisqa tarikuspanmi nin: “Chayna pasawasqanmanta manaña ñakakusqaywanmi allinña sientekuni”, nispa.