Achka runakunam ninku: “Satanasqa otaq Diabloqa tukuy mana allinkunata sutichasqallankum”, nispa. Chayna kaptinqa, ¿imanasqataq Bibliapiqa nin Jesuswan hinaspa Dioswan rimasqantaqa? Allinta yachanapaqyá imam pasasqanmanta qawasun.

Bautizakusqan qipallanmanmi Jesustaqa kimsa kutikama Diablo tentarqa. Puntatam Diospa qusqan atiyta kikinpa allinninpaq servichikunanpaq hikutarqa, rumikunata tantaman tikrananpaqmi nirqa. Chaymantapas runakuna admirananpaq vidanta wañuy patanman churananpaqmi nirqa. Qatiqninmanñataqmi nirqa, paypa qayllanpi kumuykuspa yupaychaptin lliw allpapi nacionkunata munaychakunanpaq qunanmanta. Jesusqa manam chay tentacionkunawanqa atipachikurqachu hinaspam kimsan kutipi Bibliamantapuni kutichirqa (Mateo 4:1-11; Lucas 4:1-13).

¿Piwantaq Jesusqa rimachkarqa? ¿Sunqun ukunpi mana allin piensayninwanchu? Manam chayqa kanmanchu. Ñuqanchik hina sasachakuykunapi tarikuspanpas mana huchallikusqanmantam Bibliaqa willakun (Hebreos 4:15). Payqa ‘manam ima huchatapas ruwarqachu nitaqmi pitapas engañarqachu’ (1 Pedro 2:22). Jesuspa sunqunpiqa manam mana allin piensaykunaqa karqachu, payqa mana pantaq Diosman sunqum karqa, chaynaqa manamá sunqun ukupi mana allin piensaykunawanchu rimarqaqa aswanqa kawsaq espirituwanmi.

Kaykunapas qawachinmi Diabloqa chiqap kasqanta:

• Diablom Jesusta nirqa paypa qayllanpi kumuykuspa yupaychaptin lliw allpapi nacionkunata munaychakunanpaq qunanmanta (Mateo 4:8, 9). Diablo mana kaptinqa yanqachá chayqa kanman karqa. Jesusqa riqsikurqataqmi Diabloqa atiyniyuq kasqanta.

• Jesuswan rimayta tukuruspanñataqmi Diabloqa “asurikurqa huk punchawkama” (Lucas 4:13). Mana kawsaq espiritu kaspaqa manachá chaytaqa ruwanmanchu karqa.

• Mateo 4:11 nin ‘angelkuna hamuruspan’ Jesusta kallpanchaspa yanapasqankumanta. Chay angelkunaqa chiqapmá karqaku. Chaynaqa, ¿imaynanpitaq nichwan Diabloqa mana kasqanta?

Diosta serviq Jobmi willakun iskay kutipi Dioswan Diablo rimasqankumanta. Diosqa iskaynin kutipim rimarqa Job payman sunqu kasqanmanta. Diabloñataqmi Jobmanta nirqa Diospa imapas qusqanraykulla payman sunqu kasqanta. Hinaptinmi Jehova Diosqa saqirqa Jobpa kapuqninta, churinkunata Diablo qichunanpaq hinaspa unquywan sasachananpaqpas. * Chaykuna pasaruptinmi Diablopa llulla kasqan sutilla qawakurqa, Jobtañataqmi Dios bendeciykurqa (Job 1:6-12; 2:1-7).

¿Sunqun ukupi mana allin piensaykunawanchu Jehova Diosqa rimachkarqa? Manam. Diosmantam Biblia nin: ‘Mana chikallanpas pantayniyuqmi’, nispa (2 Samuel 22:31). Nintaqmi: ‘Chuyam, chuyam, chuyam tukuy atipayniyuq Diosqa’, nispa (Apocalipsis 4:8). Chuya ninanqa mana ima huchayuq ninanmi. Chaynaqa Jehova Dios chuya kaptinqa manam sunqunpiqa imaniraqllapas mana allinqa kanmanchu.

Wakinkum ninku Jobqa mana kawsakusqanta hinaspa Dioswan Diablo rimasqankupas yanqa cuentolla kasqanta. ¿Chaynachu? Manam. Bibliapiqa achka textokunapim qawachin Jobqa kawsakusqanmanta. Santiago 5:7-11 textopim Jobtaqa qawachin qatipakunapaq hina kasqanta, cristianokuna ima sasachakuypiña tarikuspankupas hinalla Diosman sunqu kanankupaq. Sichum Jobta Diablo ñakarichisqan yanqa cuentolla kaptinqa yanqapaqchá kay textopas kanman. Chaymantapas Ezequiel 14:14, 20 rimachkan allin ruwaq kimsa runakunamanta. Paykunamanta iskaymi Danielwan Noey, paykunaqa kawsakurqakum. Hukninñataqmi Job, chaynaqa paypas kawsakurqachá. Chayna kaptinqa nichwanmi sasachaqnin Diablopas kawsasqanta.

Bibliapa willakusqankunata yachamusqanchikman hinaqa manam iskayrayachwanchu Diablo kawsasqanmantaqa. Chaymi tapukunchik: “¿Mana allinkunatachu ruwawanmanku ñuqatawan familiayta?”, nispa.

¿Imakunataq pasakunman mana allin ruwaq suwa runakuna llaqtaykiman chayaramuptin? Manachá hawkayay kanmanchu hinaspapas mana allin ruwaykunachá mirarunman. Kunanñataq Diablowan demonionkuna runakunapa chawpinpi kasqankuta piensay. ¿Imataq pasanman? Chayta contestanapaq piensarisun allpantinpi tukuy ima pasakusqanpi.

• ¿Manachu wañuchinakuypas astawan yapakuchkan autoridadkuna tukuy imataña ruwaptinkupas?

• ¿Musyarqankichu tayta-mamakuna warmankuta waqaychananpaq imataña ruwaptinkupas kusirikunankupaq kaqkunapiqa layqakuykuna yapakusqanta?

• ¿Qawarqankichu autoridadkuna imataña ruwaptinkupas kay allpa Pacha llumpay qachachasqa kasqanta?

• ¿Yaqachu imapas mana rikuy atisqanchik lliw runakunata wañuy patanman apawasqanchikta musyanki?

Ichaqa Bibliapim willawanchik pim chay sasachakuykuna rikurichiq kasqanta, ninmi: “Chaynapimá chay hatun dragonqa wischumusqa karqa. Payqariki diablowan hinaspa Satanaswan sutichasqa ñawpaqmantaraq kaq culebram. Paymi llapallan kay pachapi runakunata engañachkan, paymá kay pachamanpas wischumusqa karqa angelninkunapiwan [. . .] ¡Ay! imaynaraq kanqa kay pachapi kaqkunaqa. Diabloqa piñasqallañam uraykaramun qamkunaman, payqariki yachachkanmi pisi tiempoyoqllaña kasqanta”, nispa (Apocalipsis 12:9, 12). Kayta yacharuspam achka runakuna ninku kay pachataqa Diablo munaychakusqanmanta, payqa mana allin ruwaqllañam.

Chayna runakunamantaqa ayqikunam. Ichaqa ¿imaynatam ruwachwan? Qatiqnin yachachikuypim chaymanta qawasunchik.