AFRICA lawpi kayna nisqankum sutillata qawachin qullqi prestakuyqa mana sasa kasqanta, kutichipuyñataq llumpay sasa kasqanta. ¿Chaynatachu qampas niwaq? Wakinpiqa allinpaq hinam chay ruwayqa kanman, ichaqa ¿allinchu chaylla prestakuruy? ¿Ima sasachakuykunam kanman?

Africa lawpim kaynata ninku: “Prestakuyqa hinaspa qullqi hapichiyqa amistadkunatam chiqninachin”, nispa. Qullqi prestakuyqa amistadkunata hinaspa ayllukunatam hawka kawsakunankumanta yanqachan. Chay pasananta mana munaspa allinta piensaptinchikpas, wakinpiqa sasachakuypim tarikuchwan. Piensariy kaypi, prestakuq runa tiempollanpi mana kutichipuptinqa, prestaqnin runam piñakurunman hinaspam iskayninku sasachakuypiña tarikunmanku aylluntinña kaspankupas. Chaynaqa manam chayllachu qullqitaqa prestakuruna.

Manuyayqa sasachanmantaqmi Dioswan amistadninchiktapas. ¿Imanasqam chaynata ninchik? Bibliam nin mana kutichipuy munaq runakunaqa mana allin kasqankuta (Salmo 37:21). Nintaqmi: “Prestaq runañataqmi munaychakun prestakuqninpi”, nispa (Proverbios 22:7). Chaynaqa, qullqi prestakuq runam ima ruwaytapas mana atinqachu kutichipunankama. Africa lawpi rimakuymi nin: “Huk runapa chakinta prestakuqqa chay runapa riy munasqanmanmi rinan”, nispa.

Chaymi qullqita prestakuspaqa chaylla kutichipuna. Manachayqa sasachakuypim tarikuwaq: hukmanyasqa, mana allin puñusqa, achkata llamkastin, warmi-qaripas piñanakuruwaqchikmi hinaspam rakinakuymanpas chayawaqchik, wakinpiqa quejanakuymanpas chayawaqmi otaq presopas riwaqmi. Chaymi apostol Pablopa nisqanqa ancha allinpuni: “Ama pitapas debekuychikchu, debespaqa debenakuychik kuyakuyllata”, nispa (Romanos 13:8).

Qawasqanchikman hinaqa manam chayllachu qullqi prestakuqqa rinanchik. Puntataqa tapukunanchikmi: “¿Mana qullqiyuqpunichu kachkani? ¿Familiayta uywanaypaq kaq negocioypaqchu munachkani? Icha ¿kapuqniyuq runa hina kawsakuyta munasqayraykullachu?”, nispa. Manu-manu purinamantaqa kapuqllanchikwan kawsakuymi aswan allinqa.

Wakin kutipiqa ichapas sasachakuypi tarikusqaykirayku prestakunayki kanqa. Chayta ruwanaykipaqqa allintam tanteakunayki kutichipunaykipaq. ¿Imanasqa?

Manam piensananchikchu pipas qullqiyuq kasqanrayku yanapawananchiktaqa. Manataqmi piensananchikchu achka qullqiyuq kasqanrayku mana kutichipuypiqa. Amataqyá haykapipas munapayasunchu qullqiyuq kaqkunapa kapuqnintaqa (Proverbios 28:22).

Qullqi prestakusqaykita chaylla kutichipunaykipaqmi tanteanayki. Qullqi hapichisuqniki haykapi kutichinaykipaq mana nisuptikiqa kikiki niy haykapi kutichipunaykipaq hinaspa chayman hina ruway. Chay rimasqaykichikmantaqa papeltam ruwanakunaykichik, chaynapi mana ima sasachakuypas kananpaq (Jeremias 32:9, 10). Allintaqmi kanman kikikipuni qullqi kutichiq riynikiqa chaynapi agradecekunaykipaq. Chaylla kutichipuptikiqa manam yanqachakunqachu amistadnikichikqa. Jesusmi nirqa: ‘Chiqap kaptinqa rimankichikqa “arí” nispam, mana chiqap kaptinñataqmi ninkichik “manam” nispa’, chaytam yuyarinayki (Mateo 5:37). Chaymantapas Bibliapa kayna nisqantam mana qunqanaykichu: ‘Chaynaqa runamasikichik qamkunapaq allin kaqkuna ruwananta munaspaqa qamkunapas paykunapaqyá allin kaqkunata ruwaychik’ (Mateo 7:12).

¿Imatam ruwawaq qullqi prestakuyta munapayaspaqa? Bibliam niwanchik kapuqllanchikwan contentakuspa Diosta yupaychanamanta (1 Timoteo 6:6). Kapuqllanwan contentakuq runakunaqa manam manuyasqa runakuna hinachu sasachakuypi tarikunku. Ichaqa runakunapa imayna kawsasqankum tanqawanchik sunqunchikpa munasqankunata maskananchikpaq. Chayna tarikuspaqa Diostam astawan maskananchik. Kaypi yuyaymanasun.

Asia lawpi huk casarasqakunam ninku, chayraq casarasqa kachkaspanku mana wasiyuq kasqankurayku wasiyuq kaqkunata invidiakusqankuta. Chaynapim churakusqanku qullqiwan hinaspa bancomantawan ayllunkumanta prestakuykuspa wasita rantirurqaku. Ichaqa manapas unayllamantam killan-killan achka qullqi kutichiy sasa kasqanta qawarqaku. Chaymi astawan llamkayman qukururqaku hinaptinmi churi-wawankupaqqa manaña tiempochakuqkuchu. Qosanmi nin: “Llakisqa, pisipasqa hinaspa mana ancha puñusqaykum hatu-hatun rumitapas qipichkaymanku hina karqa. Hukmanyasqam tarikurqaniku”, nispa.

Huk punchawmi yuyarirurqaku 1 Timoteo 6:6 nisqanta hinaspam tantearurqaku sasachakuyninkumanta lluqsinankupaq wasinku rantikuyta. Iskay watapim chay sasachakuymanta lluqsirqaku. ¿Imatam yacharunku chayna ñakarisqankuwan? Paykunam ninku: “Kapuqniyuq kayta Diospa qawasqanman hina qawaymi sasachakuymanta librawanchik”, nispa.

Qullqi prestakuy mana allin kasqanmanta imataña niptinkupas hinallam runakunaqa manuyastin purinku. Bibliapi kay yachachikuykunata qawaruspaqa, ¿manachu chunkay-chunkayta yuyaymanana manaraq manuyachkaspa?