Achka runakunam piensanku Diosta mañakuyqa yanqapaq kasqanta. Wakinñataqmi mañakunku ichaqa piensankum Diosqa mana uyarisqanta. Dios mana kasqanpi piensaq runam mañakuspan nirqa: “Kaspaykiqa imallatapas niykuwayá”, nispa. Chaymantam nirqa: “Diosqa manam imallatapas rimapayamuwarqachu”, nispa.

Bibliam ichaqa niwanchik tukuy unanchaq chaynataq tukuy atiyniyuq Diosqa mañakusqanchikta uyarisqanmanta. Ñawpa tiempopi runakunamanmi Diosmanta willakuq Isaias nirqa Diosqa mañakusqankuta chaylla uyariykuq kasqanmanta (Isaias 30:19). Bibliapim nin: ‘Paypa munasqanman hina ruwaq runakunapa mañakusqanqa agradonpaqmi’, nispa (Proverbios 15:8).

Bibliam willakun pikunapa mañakusqanta Dios uyariykusqanmanta. Huk kutipim Jesucristo ‘waqaspan ruegakuyllawanña wañuymanta libray atiq Diosta mañakurqa chaymi Diosqa payman sunqu kasqanrayku uyariykurqa’, hinaspam wañuruptinpas kawsariykachirqa (Hebreos 5:7). Hukkunata uyariykusqanmantapas qillqasqam kachkan Daniel 9:20, 21 hinaspa 2 Cronicas 7:1.

Chaynaqa, ¿imanasqataq wakin runakunaqa ninku mañakusqankuta Dios mana uyarisqanmanta? Mañakusqanchikta Jehova * Dios uyariwananchikta munaspaqa payllatam mañakunanchik. Manam taytacha-mamachataqa nitaq wañusqa ayllunchiktaqa mañakunachu. Chaymantapas unanchawaqninchik Jehova Diospa munasqanman hinam mañakunanchik. Chaynata mañakuptinchikqa ‘uyariwasunmi’ (1 Juan 5:14). Jehova Dios uyariwananchikta munaspaqa paymantam allinta yachananchik hinaspa kasukunanchik.

Achka runakunam mana iskayrayankuchu mañakusqankuman hina Dios yanapaykusqanmantaqa. Kenia nacionniyuq Isaacmi nirqa: “Bibliapi yachachikuykunata entiendenaypaqmi Diosta mañakurqani. Chaymi manapas unaymanta bibliamanta yachachiwananpaq huk runa niwarqa”, nispa. Filipinas nacionpi kaq Hildam cigarro pitayman llumpayta hapipakururqa, payqa cigarro pitaynintam achka kutipi saqiyta munarqa, ichaqa manam atirqachu. Chaymi qusan kallpancharqa Diosta mañakunanpaq. Hildam nirqa: “Dios yanapaykuwaptinmi cigarro pitayniyta qalaypaq saqirurqani”, nispa.

Mañakusqanchikta Jehova Dios uyariwananchikta munaspaqa munasqanman hinam mañakunanchik.