Éxodo 23:1-33
23 ”Aman yanqa willakuytaqa ch’eqerichinkichu.+ Amallataqmi mana allin runawanqa rimanakunkichu pimantapas llullakuspa testiganaykipaqqa.+
2 Aman ima mana allintapas ruwankichu askha runakunaña chayta ruwanqaku chaypas. Amallataqmi imatapas mana kaqtaqa rimankichu askhaña chhaynata rimanqaku chaypas, mana chayqa justicia ruwakunantan jark’anki.
3 Aman wajcha runamanpas wajcha kasqanraykuqa sayapakunkichu.+
4 ”Enemigoykiq chinkasqa torontapas asnontapas tarinki chayqa kutichipunkin.+
5 Cheqnikuqniyki runaq asnontachus carga ñit’in chayqa, aman jinatachu qhawarparinki, aswanmi chay asnoq carganta oqariysinki.+
6 ”Aman q’ewinkichu wajcha runapaq juicio ruwakusqantaqa.+
7 ”Pitapas llullakuspa yanqa tumpanqaku chayqa, aman qanqa chaypi tumpaysikunkichu. Aman mana juchayoq runataqa ni chanin runatapas wañuymanqa entregankichu. Noqaqa manan perdonasaqchu juchayoq runataqa.+
8 ”Aman ima pagotapas chaskinkichischu juiciopi pimanpas sayapakunaykiraykuqa, chayqa allin yuyayniyoq runakunatan ñausayachin, chanin runakunaq simintan q’ewin.+
9 ”Aman waj llaqtayoq runakunataqa ñak’arichinkichischu. Egiptopitaq tiyamurqankichis chayqa, allintan qankunaqa yachankichis imaynachus jujpa llaqtanpi tiyay chayta.+
10 ”Soqta watan chajraykitaqa llank’anki, soqta watan cosechatapas oqarinki.+
11 Qanchis kaq watan ichaqa ama llank’ankichu, aswanmi samachinki. Chay jallp’api k’ipataqa wajchakunan* mijunqaku, puchuntataq salqa animalkuna mijunqaku. Kaqtan ruwallankitaq uvas chajraykiwanpas aceituna chajraykiwanpas.
12 ”Soqta p’unchaymi llank’anki, qanchis kaq p’unchaytaq samanki, chhaynapi toroykipas asnoykipas samananpaq, kamachiykiq wawanpas waj llaqtayoq runapas samarinanpaq.+
13 ”Qankunaman tukuy ima kamachisqaytan junt’ankichis.+ Aman yanqa dioskunaq sutintaqa oqarinkichischu, amataqmi rimarillankichispaschu.+
14 ”Sapa watanmi kinsa kutita noqaq sutiypi fiestata ruwapuwankichis.+
15 Mana Levadurayoq T’anta Fiestatan ruwankichis.+ Chaypin kamachisqayman jina mana levadurayoq t’antata mijunkichis. Qanchis p’unchaymi abib killapi* chayta mijunkichis jayk’aqchus ruwakunanman jina.+ Chay killapin qankunaqa Egiptomanta lloqsimurqankichis. Chaymantapas aman mayqenniykichispas noqamanqa ch’usaq makintinqa jamuwankichischu.+
16 Ruwallankitaqmi Cosecha Oqariy Fiestatapas.* Chaytan ruwanki chajraykimanta mijuyta oqariyta qallarishaspayki.+ Chaymantapas ruwallankitaqmi Cosecha Tukuy Fiestata,* chaytan ruwanki wata tukuyta, llapa llank’asqayki mijuyta oqariyta tukuspa.+
17 Llapa qharikunan watapi kinsa kutita noqa Señor Jehová Diospa ñaupayman jamunqaku.+
18 ”Ima sacrificiotapas noqaman jaywamuwaspaqa aman yawartawan levadurayoq t’antatawan kuskataqa jaywamuwankichu. Aman qhepantin p’unchaykama waqaychankichu noqapaq ruwasqayki fiestakunapi jaywamuwasqayki sacrificiokunaq wirantaqa.
19 ”Chajraykimanta ñaupaqta oqarisqayki allin kaq rurutan noqa Jehová Diosniykiq wasiyman apamunki.+
”Aman uña cabrataqa mamanpa lechenpi t’impuchinkichu.+
20 ”Qankunaq ñaupaykichistan juj angelta kachasaq+ cuidanasuykichispaq, preparasqay jallp’aman chayachinasuykichispaqwan.+
21 Paytan uyarinkichis, kasukunkichismi ima nisqantapas. Manachus kasukunkichis chayqa, manan payqa perdonasunkichischu.+ Payqa sutiypin imatapas ruwashan.
22 Ichaqa kasukunkichischus llapa ima nisqantapas, simiytapas uyarikunkichischus chayqa, enemigoykikunaq enemigonmi kasaq, llapa qanwan maqanakuqkunawanmi maqanakusaq.
23 Angelniymi ñaupaykichista rinqa, paymi pusasunkichis amorreo runakunaq, Het runakunaq, perizita runakunaq, Canaán runakunaq, heveo runakunaq, Jebús runakunaq jallp’anman. Paykunatan noqaqa chinkachisaq.+
24 Amapunin chay runakunaq diosninkunamanqa k’umuykunkichischu, amataqmi apachikunkichischu chaykuna serviymanqa. Amapunin paykuna jinaqa imatapas ruwankichischu.+ Aswanmi chay runakunaq yupaychananku idolokunata, yupaychana sayashaq rumikunatawan llapanta thuninkichis ñut’unkichis ima.+
25 Noqa Jehová Diosnillaykichistan serviwankichis,+ chayta ruwankichis chayqa, manan faltachisaykichischu mijunaykichistapas ni unuykichistapas.+ Karunchasaqtaqmi qankunamanta ima onqoytapas.+
26 Manan llaqtaykipi warmikunaqa malparinqachu, nitaqmi mana wijsallikuy atiq warmipas kanqachu.+ Unaytan kausankichispas.
27 ”Manaraq maymanpas chayashaqtiykichismi chaypi tiyaq runakunaqa manchakushawanqakuña.+ May llaqtaman chayaqtiykichispas llapa chaypi tiyaqkunatan sinchita mancharichisaq, enemigoykikunapas manchakuymantan ayqekunqaku.+
28 Manaraq chayashaqtiykichismi paykunaqa khatatatashanqakuña.*+ Chhaynapin heveo runakunapas, Canaán runakunapas, Het runakunapas ñaupaykichismanta ayqekunqaku.+
29 Ichaqa manan paykunataqa juj watallapichu qarqosaq, chhaynapi jallp’a ama ch’in qhepananpaq, campopi salqa animalkunapas ama qankuna contra yapakunanpaq.+
30 Aswanmi pisi-pisimanta paykunataqa qarqosaq askhayanaykichiskama, llapa jallp’ata jap’ikapunaykichiskama.+
31 ”Qankunaq jallp’aykichisqa kanqa Puka lamar-qochamanta Filistea runakunaq tiyasqan lamar-qochakaman. Jinallataq ch’inneq ladomanta Éufrates mayukama.+ Llapa chaypi tiyaq runakunatan qankunaman entregasaykichis, qankunataqmi paykunata qarqonkichis.+
32 Aman paykunawanqa rimanakunkichischu ni diosninkutapas servinkichischu.+
33 Aman chay runakunataqa llaqtaykichispi tiyachinkichischu, chhaynapi ama contraypi juchallichinasuykichispaq. Paykunaq diosninkunata adorankichis chayqa, trampa jinan chayqa qankunapaq kanqa”,+ nispa.
Uraypi willakuykuna
^ Wajchataqa “pobre” nillankutaqmi.
^ Qhaway “Astawan yachanapaq B15” nisqata.
^ Chay fiestatan nikullantaq “Semanakuna Fiesta, Pentecostés Fiesta” nispa.
^ Chay fiestatan nikullantaq “Ch’ujlla Ruway Fiesta” nispa.
^ Khatatataytaqa “kharkatiy” nillankutaqmi.
