1 Corintios 10:1-33
10 Wayqeykuna,* kaytan yachanaykichista munani: Ñaupa taytanchiskunaqa llapankun phuyuq llanthunta purispa+ lamar-qochanta pasarqanku.+
2 Llapankun Moisespa qhepanta rispa phuyuwan lamar-qochawan ima bautizasqa karqanku.
3 Llapankun Diospa qosqan mijunatapas mijurqanku,+
4 llapallankutaqmi Diospa qosqan unutapas ujarqanku.+ Paykunaqa ladonkupi kaq qaqamantan Diospa qosqan unutaqa ujarqanku, chay qaqaqa Cristotan representan.*+
5 Ichaqa, yaqa llapankutan Diosqa mana allinpaq qhawarirqan, chaymi ch’inneqpi wañupurqanku.+
6 Chaykunaqa noqanchis yachananchispaqmi karqan, chhaynapi ama chay mana allinkuna ruwayta munapayaq runakuna jinachu kananchispaq.+
7 Chaymantapas, ama ídolo adoraqkunaqa kasunchu, imaynan wakinninku ídolo adoraqman tukupurqanku jinaqa. Paykunamantan Diospa simin qelqapi nin: “Runakunan mijuq ujaq tiyaykurqanku, chaymantataq cuerponku kusirichiq sayarirqanku”,+ nispa.
8 Amataq qhelli juchatapas* ruwasunchu imaynan wakinninku ruwarqanku jinataqa, chay qhelli jucha ruwasqankumantan juj p’unchayllapi paykunamanta iskay chunka kinsayoq waranqa runakuna wañurqanku.+
9 Amallataq Jehová* Diostapas pruebaman churasunchu+ imaynan wakinninku pruebaman churarqanku jinataqa. Chay ruwasqanku jawan mach’aqwaypa picasqan wañurqanku.+
10 Amallataq rimapakuqchu kasun, imaynan wakinninku rimapakuq karqanku jinaqa.+ Chhayna kasqankuraykun paykunataqa wañuchiq* wañuchirqan.+
11 Paykunata chaykuna pasasqanqa noqanchis yachananchispaqmi qelqasqa karqan,+ chhaynapi kay tiempoq tukukuyninpi kausaqkunaqa manaña paykuna jinachu kananchispaq.
12 Chayrayku, pipas “qaqatan sayashani” niqqa allinta cuidakuchun, paqtataq urmanman.+
13 Qankunaqa ima tentacionpipas tarikuspaqa manan waj tentacionpichu tarikushankichis, aswanpas lliu runaq tarikusqanpi jinallan.+ Diosqa junt’aqpunin, chaymi mana dejanqachu mana aguantanaykichiskama tentasqa kanaykichistaqa;+ aswanpas tentasqa kashaqtiykichismi payqa yanapayta qosunkichis, chhaynapi aguantanaykichispaq.+
14 Chayrayku, munakusqay wayqe-panaykuna, karunchakuychis ídolo adoraymanta.+
15 Qankunaqa allin reparaq runakunataq kankichis chayqa, qankuna kikiykichis reparaychis rimasqay allinchus kashan icha manachus chayta.
16 Diosman graciasta qosqanchis copamanta ujaspaqa, ¿manachu Cristoq yawarninpi jujllachakunchis?+ P’akisqanchis t’antata mijuspaqa, ¿manachu Cristoq cuerponpi jujllachakunchis?+
17 Jujllan t’antaqa, chaymi askhaña kanchis chaypas, juj cuerpolla kanchis+ juj t’antallata llapanchis mijusqanchisrayku.
18 Yuyariychis Israel llaqta runakunata. Altarpi jaywasqa sacrificiomanta mijuqtinkuqa, ¿manachu Dioswanpas mijushankuman jina karqan?+
19 Chayta nispayqa, ¿“idolopas idoloman jaywasqa kaqkunapas valorniyoqmi” nispachu nishani?
20 Manan, aswanpas chayta nispaqa “waj nacionkunamanta runakuna sacrificiota jaywaspaqa supaykunamanmi sacrificiota jaywashanku, manan Diosmanchu”+ ninaytan nishani. Noqaqa manan munaymanchu supaykunawan jujllachakunaykichistaqa.+
21 Manan Jehová* Diospa copanmanta supaykunaq copanmantawanqa ujayta atiwaqchischu, manallataqmi Jehová* Diospa mesanmanta+ supaykunaq mesanmantawanqa mijuyta atiwaqchischu.
22 Icha, ¿Jehová* Diospa sonqontachu nanachiyta munashankichis?+ Noqanchisqa manan paymanta aswan kallpayoqchu kanchis ¿riki?
23 Tukuy imapas ruwakullanmanmi, ichaqa manan lliuchu allin kanman; tukuy imapas ruwakullanmanmi, ichaqa manan lliuchu runata kallpachan.+
24 Sapanka jujpa allinninta maskhachun, amataq paypa allinnintaraqchu.+
25 Aycha qhatunapi vendesqanku ima aychatapas mijullaychis, manan imatapas tapukunaykichisraqchu concienciaykichis jawaqa.
26 Yachasqanchis jina, “Jehová* Diospan jallp’aqa, chaypi kaqkunapas paypan”.+
27 Pi mana iñiqchus mijunaman wajarisunkichisman, qankunapas munawaqchistaq riyta chayqa, mijullaychis tukuy ima servisqasuykichistapas, manan imatapas tapukunaykichisraqchu concienciaykichis jawaqa.
28 Ichaqa pipas nisunkichisman: “Chay mijunaqa idoloman jaywasqan kashan”, nispa chayqa, aman mijunkichischu chay willasuqniykichis jawa conciencia jawa ima.+
29 Chaywanqa manan concienciaykichismantachu rimashani, aswanpas juj kaqpa conciencianmantan. Ima ruwanaypaqpas libreña kani chaypas, mana allintan ruwashayman jujpa conciencian juzgawanman chayqa.+
30 Diosman graciasta qospaña mijuyman chaypas, mana allintan ruwashayman imapas mijusqaymanta juj runa millayta rimanman chayqa.+
31 Chayrayku, mijushankichisña, ujashankichisña, imataña ruwashankichis chaypas, lliuta ruwaychis Diosta jatunchanapaq jina.+
32 Allinta cuidakuychis, chaytaq urmachiwaqchis judiokunata, griegokunata, Diospa iñiq t’aqantapas.+
33 Noqapas manan allinniytachu maskhashani aswanpas jujkunaq allinnintan, arí, lliu runaq sonqonpaq jinan tukuy imatapas ruwashani,+ chhaynapi paykuna salvasqa kanankupaq.+
Uraypi willakuykuna
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Chaypiqa “Cristowanmi tupan” nillanmantaqmi.
^ Qhaway Explicasqa simikuna nisqapi “Qhelli jucha” nisqata.
^ Qhaway “Astawan yachanapaq A5” nisqata.
^ Chaypiqa yaqapaschá Diospa angelninmanta rimashan.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
