Mateo 2:1-23
2 Rey Herodes*+ kamachikushaqtinmi Jesusqa nacerqan Judeapi kaq Belén+ llaqtapi, chay qhepamantaq inti lloqsimuy ladomanta Jerusalén llaqtaman jamurqanku ch’aska qhawaq watuqkuna,
2 jinaspa tapukurqanku: “¿Maypin kashan judío runakunaq reynin kananpaq naceq wawa?+ Inti lloqsimuy ladopi kashaspaykun ch’askanta rikumuyku, chaymi kunan jamushayku payman k’umuykunaykupaq”, nispa.
3 Chayta uyarispan rey Herodesqa mana imanakuytapas atirqanchu, kaqllataq Jerusalén llaqtapi llapa runakunapas.
4 Chaymi payqa juñurqan llapa umalli sacerdotekunata kamachikuy simi yachachiqkunatawan, jinaspa tapuyta qallarirqan maypichus Cristo* nacenan karqan chayta.
5 Paykunataq nirqanku: “Judeapi kaq Belén+ llaqtapin. Khaynatan profetaqa qelqasqa:
6 Judá jallp’api kaq Belén, qanqa Judapi kamachikuqkuna ukhupiqa manapunin aswan juch’uyllaqa kawaqchu, qanmantan juj kamachikuq lloqsimunqa, paymi Israel llaqtayta michinqa,+ nispa”.
7 Jinan Herodesqa ch’aska qhawaq watuqkunata pakallapi wajachimurqan, jinaspa allin-allinta tapurqan jayk’aqchus chay ch’aska rijurirqan chayta.
8 Belenman kacharparispataq nirqan: “Riychis, jinaspa allintapuni maskhamuychis chay erqechata, tarimuspaykichistaq kutimuspa willawankichis, chhaynapi noqapas rispa payman k’umuykamunaypaq”, nispa.
9 Jinan paykunaqa reyta uyarispa puririrqanku, inti lloqsimuy ladopi+ rikumusqanku ch’askapas ñaupankutan rirqan, erqechaq kasqan wasiman chayaspataq altonpi sayaykurqan.
10 Ch’askaq sayaykusqanta rikuspankun paykunaqa anchatapuni kusikurqanku.
11 Wasiman jaykuspataq erqechata rikurqanku maman Mariatawan, jinaspa qonqorikuspa erqechaman k’umuykurqanku. Qhapaq kaykuna apamusqankutapas payman qorqanku: qorita, yuraq inciensota,* sumaq q’apaq mirratawan.
12 Ichaqa Diosmi mosqoyninkupi nirqan+ ama Herodesman kutinankupaq, chaymi paykunaqa waj ñanninta llaqtankuman kutipurqanku.
13 Paykuna pasapuqtinkun Jehová* Diospa angelninqa Joseman mosqoyninpi rijurispa+ nirqan: “Jatariy, erqechata mamantawan pusarikuspa Egiptoman usqhaylla ayqekuy, jinaspa chaypi tiyamuy noqa willamunaykama, Herodesmi erqechata maskhamunqaña wañuchinanpaq”, nispa.
14 Jinan Joseqa jatarispa erqechata mamantawan pusarikuspa chay tutapacha Egiptoman ripurqan.
15 Chaypin tiyamurqan Herodespa wañupunankama, chhaynapin Jehová* Diospa nisqan junt’akurqan. Paymi profetanwan willachirqan: “Egiptomanta lloqsimunanpaqmi churiytaqa wajarqani”,+ nispa.
16 Herodestaq manchaytaraq phiñakurqan ch’aska qhawaq watuqkuna paymanta aswan yuyaysapa kasqankuta reparaspa. Chaymi runankunata kacharqan Belén llaqtapi, lliu muyuriqninpi kaq llaqtakunapiwan iskay watayoqmanta urayman llapa qhari wawakunata wañuchimunankupaq.+ Chaytaqa ruwarqan jayk’aqchus ch’aska qhawaqkuna ch’askata rikurqanku chayta yachasqanraykun.
17 Chhaynapin chay tiempopi junt’akurqan profeta Jeremiaspa willasqan, paymi nirqan:
18 “Ramá llaqtapin uyarikurqan khuyay waqay, sonqo nanayta qapariy ima. Raquelmi+ wawankunamanta waqashan, manan pipas sonqonta tiyaykachiyta atinchu, manañan wawankuna kapunchu”,+ nispa.
19 Herodes wañupuqtintaq Jehová* Diospa angelninqa Joseman mosqoyninpi rijurillarqantaq+ Egipto llaqtapi,
20 jinaspa nirqan: “Jatariy, erqechata mamantawan pusarikuspa Israel llaqtaman kutipuy, erqechata* wañuchinankupaq maskhaqkunaqa ñan wañupunkuña”, nispa.
21 Jinan Joseqa jatarispa erqechata mamantawan pusarikuspa Israel llaqtaman kutimpurqan.
22 Ichaqa Herodespa churin Arquelao taytanpa rantinpi Judeapi kamachikushasqanta yachaspan manchakurqan chayman riyta. Chaymi mosqoypi Diospa willasqan kaspa+ Galileaman+ ripurqan.
23 Chayman chayaspataq Nazaret+ nisqa llaqtapi tiyarqan, chhaynapin profetakunaq willasqan junt’akurqan. Paykunan nirqanku: “Nazaret llaqtayoq* nisqan kanqa”,+ nispa.
Uraypi willakuykuna
^ Chaypiqa “Mesías” otaq “ajllasqa” nillanmantaqmi.
^ Chaypiqa “olibanota” nillanmantaqmi.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Chaypiqa “erqechaq almanta” nillanmantaqmi.
^ Qhaway Explicasqa simikuna nisqapi “Nazaret llaqtayoq” nisqata.
