Tito 1:1-16
1 Noqa Pabloqa Diospa kamachinmi kani, Jesucristoq apostolnintaqmi* kanipas, iñiyniypas apóstol jina llank’asqaypas Diospa ajllasqankunaq iñiyninman jinan kashan, cheqaq kaqta allinta yachayman jinataqmi kashanpas; chaytaq Diospa ancha sumaq sonqo kayninman jina kashan.
2 Chaymantapas tukuy chaykunaqa wiñay kausay suyakuyman jinan kashan,+ chaytaqa mana jayk’aq llullakuq Diosmi+ prometerqan ñaupa tiempomantapacha.
3 Payqa tiemponpin siminta reqsichirqan allin willakuykuna willakusqanwan, chayta willanaypaqmi noqaqa churasqa karqani+ salvawaqninchis Diospa kamachisqanman jina.
4 Noqan qanman qelqamushayki, iñiqmasi cheqaq wawáy Tito:
Qanwan kachun Taytanchis Diospa, jinallataq salvawaqninchis Cristo Jesuspa ancha sumaq sonqo kaynin thaj kayninpas.
5 Cretapiqa saqemurqayki mana allin ruwaykunata allichanaykipaq, sapanka llaqtapi umalliqkunata churanaykipaqwanmi. Imaynan kamachirqayki jina,
6 umalliqqa* kanan mana juchachana, juj esposallayoq iman; wawankunapas iñiq, allin kausaq, kasukuq iman kananku.+
7 Iñiqkunata qhawariqqa Diospa mayordomontaq chayqa, mana juchachanan kanan, manan munasqanman jinallachu imatapas ruwanan,+ manan ratulla phiñakuqchu kanan,+ manan machaqchu kanan, manan maqakuqchu* kanan, manataqmi imaymanayoq kayta maskhaspa puriqchu kanan,
8 aswanmi kanan jujkunata sumaqta chaskiq,+ allin kaqta munakuq,+ allin yuyaywan imatapas ruwaq, chanin kaqta ruwaq, junt’aq sonqo,+ cuerponta kamachiq ima;+
9 chaymantapas cheqaq yachachikuyman* k’askakuspa allinta yachachiqmi kanan,+ chhaynapi allin yachachikuyman jina jujkunata kallpachananpaq,+ chay yachachikuypa contranpi rimaqkunatapas anyananpaqwan.+
10 Askhan rijurimushan mana kasukuq runakuna, yanqata rimaqkuna, engañaqkunapas; astawanqa qhari kay qaracha kuchuchikuyman k’askakuqkunan chhaynaqa kashanku.+
11 Wisq’anapunin chay runakunaq simintaqa, paykunaqa imatapas gananankuraykun mana kaqta yachachispa familiantin-familiantinta iñiypi urmachishanku.
12 Llaqtamasinku profetapunin nirqan: “Creta runakunaqa llullallañan kanku, manchakuy phiña animalkuna jinan kanku, mana ima ruwaq rajrapukunataqmi* kankupas”, nispa.
13 Chay nisqayqa cheqaqpunin. Chayrayku paykunataqa allin-allintapuni anyay, chhaynapi iñiypi qhalilla kashanankupaq,
14 judiokunaq cuentonkunata ama uyarishanankupaq, cheqaq kaqmanta t’aqakuq runakunaq kamachikusqankutapas ama uyarishanankupaqwan.
15 Limpio kaqpaqqa tukuy imapas limpiollataqmi,+ mana iñiyniyoq qhelli kaqkunapaqmi ichaqa mana imapas limpiochu, paykunaq yuyayninku concienciankupas qhellillaña kasqanrayku.+
16 Paykunaqa “reqsiykun Diostaqa” nispan purinku, imayna kausasqankuwanmi ichaqa Diosta neganku;+ paykunaqa millakunapaq jinan kanku, mana kasukuqmi kankupas, manataqmi servinkuchu allin ruwaykunata ruwanankupaqpas.
Uraypi willakuykuna
^ Qhaway Explicasqa simikuna nisqapi “Umalliq, kuraq runa” nisqata.
^ Chaypiqa “manan siminwan k’iriqchu” nillanmantaqmi.
^ Chaypiqa “willakuyman” nillanmantaqmi.
^ Rajraputaqa “sinchi mijuq” nillankutaqmi.
