PACHANTINPIN runakunaqa may llaqtamantaña ima religionmantaña kanku chaypas mañakunku. Askha runakunawan kaspa otaq sapallanku kaspapas Diosmantaqa mañakunkun. Chaymantapas templopi, iglesiakunapi, capillakunapi santuariokunapi iman mañakunku. Paykunan utilizanku rosariokunata mañakunapaq estampakunata, rezo librokunata jujkunatapas. Imaynaña kaqtinpas llapankun mañakunku, sapallanku kaspa jujkunawan kaspapas.

Runakunaqa Diosmanta mañakusqankuraykun kay pachapi juj kausaqkunamanta jujniray kanku. Ichaqa animalkuna jinan noqanchispas necesitanchis mijunata, samananchispaq wayrata, unuta ima. Chaymantapas nacenchismi, kausanchis ima, chay qhepamantaq wañupunchis (Eclesiastés 3:19, Diospa Simin Qelqa). * Ichaqa runakunallan Diosmantaqa mañakunku, ¿imarayku?

Runakunaqa nesecitanchismi imachus adorasqachiswan rimanakuyta chaypaqmi mañakunchis. Bibliaq nisqanman jina, runakunaqa Diosmanta yachayta munananchispaq jinan kamasqa karqanchis (Eclesiastés 3:11). Jesusmi nirqan: “Kusisqa kachunku Diosta necesitasqankuta reparakuqkunaqa”, nispa (Mateo 5:3).

Runakunaqa Diosta adorayta necesitasqankuraykun templokunata ruwarqanku, imaymanakunata utilizanku, unaytataq oracionkunatapas ruwanku. Wakin runakunaqa ama ch’usaq sonqo kanankupaqmi paykuna kikinkupi confianku otaq jujkunapipas. Ichaqa kallpachakunkuña chaypas manapunin paykunallamantaqa Diosmanta yachankumanchu. Runaqa juj tiempollan kausanchis, manataqmi imatapas llapantachu entiendenchis. Chaymi ancha yachayniyoq atiyniyoq Dioslla imachus necesitasqanchistaqa qowasunman. ¿Ima kaqtinmi Diosmanta wajakusunman?

Yaqapaschá juj sasachakuypi tarikuspa mana ima yanapaytapas ima yuyaychaytapas tarirqankichu. Yaqapaschá pi familiaykipas otaq amigoykipas wañukapuqtin, ima ruwayta aparinaykipaqpas otaq jatun juchaman urmaspa, mana yanapayta tarirqankichu, mana thajchu sientekurqanki otaq mana perdonasqa kanaykipaq jinachu qhawarikurqanki.

Bibliaq willasqanman jina, Diosmanta mañakuymi tukuy chaykunapi yanapawasunman. Bibliapin tarikun ñaupa tiempopi junt’aq sonqo runakunaq mañakusqanku. Paykunan mañakurqanku sonqochasqa kanankupaq, yuyaychayta tarinankupaq, perdonasqa kanankupaq ima. Bibliaqa kutichillantaqmi imaymana tapukuyninchiskunaman (Salmos 23:3; 71:21; Daniel 9:4, 5, 19; Habacuc 1:3).

Mañakusqankuqa jujniraymi sapankaqpas karqan, paykunaqa yacharqankun mañakusqanku uyarisqa kananpaq imachus ruwanankuta. Yacharqankun pimantachus mañakunankuta.