DIOSQA manaraq runakunata kamashaspan angelkunata kamarqan. Hukninmi Dios contra hatarirqan chaymi Saqra sutita chaskirqan. Paymi Evata engañarqan Diospa hark’asqan sach’aq rurunta mikhunanpaq.

Saqraqa huk mach’aqwayta rimachispan Evata creechirqan allin kanankuta Dios hark’ashasqanta, sach’aq rurunta mikhuspanku mana wañunankutapas. Chhaynapin Diosta llullata hina qhawarichirqan. Nillarqantaqmi Diosta mana kasukuqtinku yachayniyoq kanankuta tukuy ima munasqankuta ruway atinankutapas. Chhaynapin Satanasqa llullakuyta qallarichirqan, kay tapuykunatapas rikhurichirqan: ¿Derechoyoqchu Dios kamachinanpaq? ¿Chaninchu kamachikuyninkuna? ¿Allinninchispaqchu kanman kasukuy?

Satanasta creespan Evaqa chay sach’aq rurunta mikhurqan. Chaymantataq qosanman qorqan, hinan paypas mikhullarqantaq. Chay ruwasqankuta pisipaqña qhawarirqanku chaypas, Diosta mana kasukuspan huchaman urmarqanku. Kamaqninku kawsayta tukuy imaymanata qoshantinpas manan munarqankuchu paypa kamachisqan kayta.

Diosqa huchacharqanmi chay mana kasukuqkunata. Ñawpaqtan willarqan prometesqa Miray mach’aqwayta otaq Satanasta wañuchinanmanta. Chaymantataq Adanta Evatawan wañunankupaq huchacharqan, ichaqa mirayninkuta khuyapayaspan mana kaq pachachu wañuchirqan. ¿Ima suyakuymi karqan Adán Evaq mirayninpaq? Jehová Diosmi prometerqan kachamusqan Miray lliw sasachakuykuna allichananta. ¿Pitaq chay Mirayri kanman? ¿Imaynatan Diospa munayninta hunt’anman? Bibliata qelqakusqanman hinan chayqa yachakurqan.

Chay qhepamanmi Jehová Dios Adanta Evatawan Edén huertamanta qarqorqan. Paykunaqa hump’inkuta hich’arispan kawsanankupaq llank’ananku karqan. Chhaynapi tarikushaqtinkun Eva phiwi wawan Cainta onqokurqan. Qhepamantaq askha wawakunayoq karqanku, hukninmi karqan Abel huktaq Set, paypa mirayninmantan karqan Noé.

(Génesis 3-5; Apocalipsis 12:9.)