8 YACHACHIKUY
¿Imaynatan llakikuykunata atipawaqchis?
“Qankunaqa kusisqallapuni kashankichis, huk pisi tiempollapaq imaymana sasachakuyta muchushaspaykichispas” (1 Pedro 1:6)
Kusisqaña familiaykichispi kawsankichis chaypas, mayninqa kanqapunin ima llakikuykunapas sasachakuykunapas (Eclesiastés 9:11). Ichaqa manan Diosqa saqerparisunkichischu, payqa necesitasqaykichisman hinan yanapasunkichis. Sichus yanapaykuna qosqanman hina imatapas ruwankichis chayqa, atipankichismi ima llakikuykunatapas.
1 JEHOVÁ DIOSPI CONFIAY
BIBLIAN NIN: “Tukuy llakikuyniykichista Diosman saqeychis, paymi qankunataqa cuidashasunkichis”, nispa (1 Pedro 5:7). Kay pachapi ima sasachakuypas manan Diospa munayninpichu kan (Santiago 1:13). Sichus Diosman asuykunki chayqa, imachus necesitasqaykipin yanapasunki (Isaías 41:10). Chaymi Biblia nin: “Sonqoykichista payman mast’ariychis”, nispa (Salmo 62:8).
Hinaspapas sapa p’unchaymi Bibliata leenayki. Chaypin reparanki ‘Dios tukuy llakikuyniykipi sonqochasqasuykita’ (2 Corintios 1:3, 4; Romanos 15:4). Chaymantapas ‘Diosmi thak-kayta qosunki runakunaq mana aypay atisqan thak-kayta’ (Filipenses 4:6, 7).
¿IMATAN RUWAWAQ?
-
Diosmanta mañakuy ama sinchita llakikunaykipaq, imatapas allin yuyaywan qhawarinaykipaq ima.
-
Allinta qhawariy ima ruwanaykitapas.
2 FAMILIAYKITA CUIDAY
BIBLIAN NIN: “Reparaq runaqa yachaytan tarin, yachayniyoqqa yachayta uyariytan munan”, nispa (Proverbios 18:15). Familiaykiwan parlariy makillataq uyariy ima nisqankutapas, chay hinapin yachanki imatachus sapankankupas necesitasqankuta (Proverbios 20:5).
¿Pipas familiaykimanta wañupunman chayri? Chay kaqtinqa llakikuymantachá waqanki, ichaqa ama chaymanta p’enqakuychu, ‘Jesuspas waqarqanmi’ llakikuymanta (Juan 11:35; Eclesiastés 3:4). Chaymantapas iman puñunaykita puñuy allintataq samay, chaymi yanapasunki imatapas allinta ruwanaykipaq (Marcos 6:31).
¿IMATAN RUWAWAQ?
-
Parlashallay familiaykiwan imamantapas, chaymi yanapasunkichis ima llakikuypas kaqtin sut’illanta parlarinaykichispaq.
-
Qan hina llakikuypi tarikuq runakunawan parlariy.
3 HUKKUNAQ YANAPAYNINTA MASKHAY
BIBLIAN NIN: “Tukuy tiempon amigoqa munakun, llaki-phutiy tiempopipas wawqe hinan khuyapayakun”, nispa (Proverbios 17:17). Amigoykikunaqa maytachá yanapayta munasunkiku, ichaqa willay imakunapi yanapana necesitasqaykita (Proverbios 12:25). Hinaspapas Bibliamanta allinta yachaq runakunata maskhay, paykunan Bibliaq nisqanman hina yanapasunkiku, chaymi astawanqa kallpachasunki (Santiago 5:14).
Diosta munakuq, paypa promesankunapi confiaq runakunawan huñukuy, paykunan astawanqa yanapasunkiku. Hinaspapas llakipi tarikuqkunata yanapay, willay Diosmanta hamuq tiempopaq prometesqanmantapas, chaykunan qan kikiykita kallpachasunki. Chaymantapas hukkunapaq allinkunata ruway, amataq munakuqniyki runakunamanta karunchakuychu (Proverbios 18:1; 1 Corintios 15:58).
¿IMATAN RUWAWAQ?
-
Amigoykiwan parlay, yanapayta munasunki chayqa, yanapachikullay.
-
Sut’illanta willay imapi yanapana necesitasqaykita.
Astawan yachanaykipaq
¡RIJCH’ARIY!
Wañuymanta wawayki tapusuqtiyki
Tawa yanapaykunan kan wawaykita yanapanaykipaq wañuymanta tapukuqtin, chaywanmi yanapawaq mayqen reqsisqanpas wañuqtin ama sinchita llakikunanpaq.
¡RIJCH’ARIY!
Ima desgraciapas kaqtin: Familianchis wañupuqtin
Carrokunaq chocasqanpin Ronaldoq phisqa familian wañupurqan. Chunka soqtayoq wataña pasarqon chaypas Ronaldoqa sonqo nanaypiraqmi tarikun, chaywanpas thak kaytan tarirqan.
