3 YACHACHIKUY
Sasachakuykunata allichaychis
“Aswantaqa tukuy sonqo munanakuychis. Munakuyqa askha huchakunatan pampachan” (1 Pedro 4:8)
Sapanka runapas hukniray uywasqan kanchis, chaymi hukniray kanchis hukniraytataq yuyaykunchis. Chaymi casado kawsaypipas imaymana sasachakuykuna kan. Mayninqa qonqayllan ima sasachakuypipas rikukunchis.
Wakinqa hinatan ima sasachakuyninkutapas qhawarparinku. Biblian ichaqa kallpachawanchis chaykunata allichanapaq (Mateo 5:23, 24). Chaypaq Bibliapi yanapaykunata qhawarisun.
1 SASACHAKUYNIYKICHISMANTA PARLAYCHIS
BIBLIAN NIN: “Kanmi [...] rimana tiempopas”, nispa (Eclesiastés 3:1, 7). Tiempota t’aqay sasachakuyniykichismanta parlarinaykichispaq. Sut’illanta willay imayna sientekusqaykita, ima yuyaykusqaykitapas (Efesios 4:25). Phiñasqa kashanki chayqa, sonqoykita tiyaykachispa sumaqllata kutichiy. Amapuni hap’inakuychischu (Proverbios 15:4; 26:20).
Manaña rimasqaykichis tupanqachu chaypas, munakuywan respetowan qhawarinakuychis (Colosenses 4:6). Usqhayllan ima sasachaytapas allichanaykichis, manataqmi mana rimanaykuspaqa kanaykichischu (Efesios 4:26).
¿IMATAN RUWAWAQ?
-
Qhawariy ima ratopin sasachakuy kasqanmanta rimawaqchis chayta.
-
Makilla uyariy esposaykiq, qosaykiq rimasqanta. Rimayta tukuqtinña rimay.
2 MAKILLA UYARINAKUYCHIS
BIBLIAN NIN: “Wawqe-panantin hinapuni munanakuychis, respetanakuspa hukkuna hukkunawan aswan allinpaq qhawanakuychis”, nispa (Romanos 12:10). Esposayki, qosayki rimaqtinqa tukuy yuyaywanmi uyarinayki, entiendenaykitaqmi imayna sientekusqanta. Chay hinapin ‘llakipayanakuspa [...] llamp’u sonqowan’ qhawarinakunkichis (1 Pedro 3:8; Santiago 1:19). Chaypaqqa manan, “uyarishaykin” nispachu hukkunata ruwashanayki. Imapas urgente ruwanayki kashan chayqa, tapuriy: “¿Parlarisunmanchu ruwanayta tukuruqtiy?”, nispa. Sichus esposaykita, qosaykita yanapaqniykita hina, llank’aqmasiykita hina qhawarinki chayqa, manan usqhayllachu phiñakunki (Eclesiastés 7:9).
¿IMATAN RUWAWAQ?
-
Manaña munasqaykiman hinachu imatapas ninqa chaypas, makilla uyariy.
-
Reparay imatan niyta munashasunki chayta. Qhawariy imayna uyayoq kashasqanta, imayna kunkawan rimasqantapas.
3 KALLPACHAKUSHALLAYCHIS
BIBLIAN NIN: “Llank’aspan runaqa kaqniyoq kan, rimaylla rimaqmi ichaqa wakchayan”, nispa (Proverbios 14:23). Sasachakuyta imayna allichanaykichispaq rimasqaykichis qhepaman, kallpachakuychis chayman hina imatapas ruwanaykichispaq (Proverbios 10:4). Imatapas kuskamanta ruwankichis chayqa, ‘aswan allintan llank’asqaykichismanta chaskinkichis’ (Eclesiastés 4:9).
¿IMATAN RUWAWAQ?
-
Sapankaykichis yuyaykuychis sasachakuyta imayna allichanaykichispaq.
-
Qhepakunaman qhawariychis sasachakuyniykichis imayna allichakushasqanta.
Astawan yachanaykipaq
¡RIJCH’ARIY!
¿Imaynatan mana k’irispalla rimawaq?
Casarasqakunapaq yanapaykuna. ¿Imaynatan mana k’irispalla rimawaqchis?
¡RIJCH’ARIY!
Ama hayk’aqpas mana rimanaykuspaqa kaychischu
Casarasqakuna, ¿imatan ruwanaykichis phiñachinakuspaykichis? ¿Yanapasunkichismanchu Biblia sumaqta kausanaykichispaq?
