Jesusqa Perea ladollapiraqmi kashanman karan chinkasqa ovejamanta, chinkasqa qolqemantawan ejemplokunata willashaspaqa. Chaywanmi payqa yachachisharan pipas Diosman kutirikuqtinqa anchata kusikuna kasqanta. Fariseokunawan kamachikuy simita yachachiqkunawanmi ichaqa rimapakuqku Jesús juchasapakunata sumaqta chaskisqanmanta. ¿Entienderankuchu paykuna imatachus Jesús chay ejemplokunawan yachachisharan chayta? ¿Repararankuchu paykuna Jehová Dios payman kutimpuq juchasapakunata sumaqta chaskisqantapas? Chayta astawan entiendechinanpaqmi Jesusqa juj ejemplotawan willaran.

Chay ejemplopin willaran iskay qhari wawayoq taytamanta. Jesusmanta rimapakuq umallikuna lliu runakunapas ratollachá entienderanku chay taytaq sullk’a wawanpa ruwasqanqa mana allinchu kasqanta. Ichaqa, ¿imatan yachananku karan chay taytamanta kuraq wawanmantapas? Chaypaq allinta estudiasunchis Jesuspa chay ejemplo willasqanta.

Jesusmi niran: “Juj runaqmi karan iskay qhari wawankuna. Sullk’a kaqmi taytanta niran: ‘Papáy, kaqniykikunamanta tupaqniyta qopuway’, nispa. Jinan chay runaqa kaqninkunata paykunaman rakipuran”, nispa (Lucas 15:11, 12). Chay runaq sullk’a wawanqa munasqanman jinan kausayta munasharan, chaymi papan manaraq wañupushaqtin herencianta mañakuran. ¿Imatan ruwaran herencianta chaskikuspa?

Chaymantan Jesús niran: “Pisi p’unchaykunamantataq sullk’a kaq wawanqa llapa imachus tupaqninta apakapuspa juj lado nacionman ripuran, chaypitaq munasqanman jina mana allinta kausaspa llapa kaqninkunata tukupuran”, nispa (Lucas 15:13). Chay waynaqa munakuq taytanpa wasillanpi qhepakunanmantaqa karu llaqtamanmi ripuran, chaypin q’alata qolqenta tukumuran munasqanman jina kausaspa, warmikunawan kusirikuspa ima. Chaymantan ichaqa llakikuypi tarikuran.

 Chaymantan Jesusqa niran: “Chaymantataq jatun yarqay chay llaqtantinpi karan, jinan paypas yarqaypi rikukuran. Chaymi payqa chay llaqtapi juj runaqta llank’apakuq riran, jinan chay runaqa camponman kacharan khuchinkunata michinanpaq. Chaypin payqa khuchikunaq mijunantaraq mijuyta munaq, manataq pipas imallatapas qoqchu”, nispa (Lucas 15:14-16).

Diospa kamachikuyninpi “qhelli” nisqaña khuchikuna karan chaypas, chay waynaqa khuchikunatan michinan karan. Payqa sinchi yarqasqan kasharan, chaymi khuchikunaq mijusqantaraq mijuyta munaran. Jinan payqa “yuyayman kutispa” niran: “¡Taytaypa llapa llank’apakuqninkunaqa puchu-puchu mijunayoqraqmi kashanku, noqataq ichaqa kaypi yarqaymanta wañushaniña! Sayarispa taytayman kutipusaq, jinaspa nisaq: ‘Papáy, janaq pachapi kaq Dios contra, qan contra iman juchallikuni. Manañan “wawáy” niwanaykipaq jinañapaschu kani, jujnin llank’apakuqniykita jinallaña chaskiykuway’”, nispa. Jinaspa taytanman ripuran (Lucas 15:17-20).

¿Imatan chay waynaq taytan ruwaran payta rikuspa? ¿Phiñarikuranchu wasinmanta pasakapusqanmanta? ¿Chiri sonqollawanchu wasinpi chaskiran? Pay kaspa, ¿imatan ruwawaq karan? ¿Imaynatan chaskiwaq karan wawaykita?

Chay taytamantan Jesusqa niran: “Taytantaq karullapiraq kashaqtin payta rikuran, jinaspa mayta khuyapayaykuspa payman phawariran, abrazaykuspataq much’aykuran”, nispa (Lucas 15:20). Chay taytaqa yachanmanmi karan imaynatachus wawan kausasharan chayta, chaywanpas sumaqtan payta chaskiykuran. Chaywanmi rikukuran Jehová Diosqa payman kutirikuq runakunata anchata khuyapayasqanta. Pay jinan Jesuspas juchasapakunataqa qhawariran. Chaytan chay umallikunaqa reparananku karan.

Jesuspa ejemplo willasqanpi taytaqa wawanta qhawaspallan allinta repararan juchanmanta khuyay llakisqa kashasqanta, chaymi sumaqta chaskiykuran, chay wawantaq chayta rikuspa mana manchakuspalla willakuran juchanmanta. Chaymi niran: “Papáy, janaq pachapi kaq Dios contra, qan contra iman juchallikuni. Manañan ‘wawáy’ niwanaykipaq jinañachu kani”, nispa (Lucas 15:21).

Jinan taytanqa kamachinkunata niran: “Aswan allin kaq p’achata usqhaylla orqomuychis, jinaspa chaywan p’achachiychis, makinmanpas anillota churaychis, chakinmanpas usut’ata churaychis. Chaymantapas wirayachisqa malta torota apamuspa nak’aychis, jinaspa mijusunchis kusirikusunchis ima; kay wawayqa wañusqan kasharan, kausarimpuntaq; chinkasqan kasharan, tarisqataq kapun”, nispa. Jinan kusikuyta qallariranku (Lucas 15:22-24).

Ichaqa manan llapankuchu kusikuranku. Chaymantan Jesús niran: “Kuraq kaq wawanqa chajrapin kasharan, chaymanta kutimuspa wasiman qayllaykamusqanman jinan tocaqta tusuqta ima uyariran. Chaymi jujnin kamachita wajaspa tapuran: ‘¿Iman kashan?’, nispa. Jinan payqa niran: ‘Wayqeykin kutimpusqa, qhalillataqmi kashanpas, chaymi taytayki wirayachisqa malta torota nak’achispa fiestata ruwachishan’, nispa. Jinan payqa sinchita phiñakuspa mana jaykuyta munaranchu. Chaymi taytanqa  lloqsimuspa jaykunanpaq rogaran. Paytaq taytanta niran: ‘Khaytukuy watakunañan kamachi jinaraq qanpaq llank’ashani mana juj kutillapas kamachikuyniykikunata p’akispa, chaywanpas qanqa manan jayk’aqpas juj cabrachallatapas qowarankichu amigoykunawan kusirikunaypaq. Ichaqa, qhellipi kausaq warmikunawan purispa kaqniykikunata tukuq wawayki chayamuqtintaq, wirayachisqa malta torotaraq nak’arachipusqanki’”, nispa (Lucas 15:25-30).

Chay kuraq churi jinan kamachikuy simita yachachiqkuna fariseokunapas phiñasqa rimapakuranku común runakunata juchasapakunatawan Jesús sumaqta chaskisqanmanta. Chayta reparachinanpaqmi Jesusqa chay ejemplota willaran. Chhaynaqa manan pipas Diospa khuyapayakuq kasqanmantaqa rimapakushananchu.

Jesusqa nillarantaqmi: ‘Chay taytan kuraq wawanta niran: “Wawáy, qanqa noqawanpunin kashanki, tukuy imaypas qanpan. Kay wayqeykin ichaqa wañusqa kashaspa kausarimpun, chinkasqa kashaspa tarisqa kapun; chaymi kusirikunanchis”’, nispa (Lucas 15:31, 32).

Jesusqa manan willaranchu imatachus chay qhepaman chay kuraq churi ruwaran chayta. Chay umallikunari, ¿kasukurankuchu? Bibliaq willasqan jina, Jesuspa kausarimpusqan qhepamanqa “sacerdotekunapas askhan iñipusharanku” (Hechos 6:7). Yaqapaschá paykunamanta wakin karanku Jesuspa chay ejemplo willasqanta uyariq umallikuna. Paykunapas munaspaqa atinkumanmi karan Diosman kutirikuytaqa.

Jesuspa discipulonkunaqa askhatan yachasunman chay ejemplo willasqanmanta. ¿Imatan ñaupaqta yachasunman? Manan chay ‘juj lado nacionman ripuq’ wayna jinachu kananchis, manapunin sumaqta cuidawaqninchis Yayanchispa llaqtanmantaqa jayk’aqpas ripunanchischu, mana chayqa mana allinpin tarikusunman.

Chaymantapas imaynapipas Yayanchis Diosmanta karunchakusunman chayqa, k’umuykukuspan payman kutimpunanchis, chhaynapi wajmanta paypa amigon kananchispaq.

Chaymantapas chay perdonakuq tayta jinan kananchis, manan chay kuraq churi jinachu. Chhaynaqa pi iñiqmasinchispas Yayanchispa wasinmanta ripunman, qhepaman ichaqa juchanmanta pesapakuspa kutimpunman chayqa, sumaqtan chaskiykunanchis, kusikunanchistaqmi kutimpusqanmanta. Chay iñiqmasinchistaqa ‘wañusqa kashaspa kausarimpuqta’ jina, ‘chinkasqa kashaspa tarisqata’ jinan qhawarinanchis.