¿Jayk’aqllapas onqorankichu? Yaqapaschá ratolla allinyaruranki chayqa onqosqaykita qonqarapunki. Pipas wañupuqtinmi ichaqa mana chhaynachu. Alan Wolfelt doctormi libronpi explican: “Munakusqanku runa wañupuqtinqa manan qonqayta atinkuchu. [...] Watakunaq pasasqanwan jujkunaq yanapayninwan iman sinchi llakikuyqa pisiyan”, nispa (“Parejanku wañupuqtin consolanapaq”, inglés simipi).

Yachasun Abrahanmanta esposan Sara wañukapuqtin imaynan sientekuran chayta. Biblian willan Abrahanqa sinchi llakipi khuyayta waqasqanta, chaymi rikuchin Abrahanqa esposan wañukapuqtin mana usqhaylla qonqay atisqanta. * Kunantaq yachasun Jacobmanta, paytaqa creechirankun José churinta salqa animal mijupusqanta. Payqa ‘unaytan’ sinchi llakikuypi karan, manan familianpas consolayta atirankuchu. Watakunaña pasaran chaypas, Jacobqa sonqo nanasqallan kasharan wawanmanta (Génesis 23:2; 37:34, 35; 42:36; 45:28).

Kay tiempopipas kaqllataqmi pasan, askha runakunan familianku otaq amigonku wañupuqtin sufrinku. Piensay kay experienciakunapi.

• Gail 60 watanpi kashaq nin: “Robert qosaymi 9 julio 2008 watapi juj accidentepi wañukapuran. Sapa p’unchaymi desayunasqayku pasayta juj abrazowan juj much’aywan ‘munakuyki’ nispa despedinakuq kayku. Chay jinan chay tutamantanpas karan. Ñan soqta wata masña pasarun, chaywanpas sonqoyqa nanashallanraqmi. Manachus jina jayk’aqpas qonqayta atisaqchu”, nispa.

• Etienne 84 watanpi kashaq nin: “Esposaypa wañupusqanqa 18 watañan pasaron, chaywanpas sonqoymi nanawanraq manaña ladoypi kasqanmanta. Diospa kamasqanta imatapas munayta rikuspaqa esposaytan yuyarini, chaymi nini: ‘Payqa maytachá kusikunman karan kayta rikuspa’”, nispa.

Unay tiempoña pasaqtinpas chhaynata sientekuyqa manan juchachu. Ichaqa sapankapas manan igual-llatachu sientekunku. Chayraykun mana pitapas nisunmanchu “imaraykutaq kunankamari waqashallan” nispaqa. Ichaqa manataqmi pakananchischu imayna sientekusqanchistaqa. Chhaynaqa, ¿iman yanapawasun ama sinchita llakikunanchispaq?