Diosqa yanapanmi kamachikuyninkunata kasukuqtaqa, chaytan profeta Moisés niran (Deuteronomio 10:13; 11:27). Diostaqa munakusqanchisraykun kasukunanchis manan castigawananchista manchakuspachu. Diostaqa munakunchis sumaq sonqo, khuyapayakuq kasqanraykun, chaymi mana munasunmanchu ima ruwasqanchiswanpas llakichiyta. Bibliapin nin: “Diosta munakuyqa kamachikuyninkunata kasukuymi; kamachikuyninkunaqa manataqmi sasa junt’aychu”, nispa (1 Juan 5:3).

¿Ima bendicionkunatan chaskisun Diosta kasukusqanchismanta? Iskay bendicionmanta rimasun.

“Noqan Diosniyki Señor Diosqa kani, noqan allinniykipaq yachachiyki, noqan purinayki ñantapas pusayki” (ISAÍAS 48:17).

Jehová Diosmi kamawaranchis chaymi allinta reqsiwanchis, niwanchistaqmi imatas ruwananchis kusisqa kausananchispaq chayta. Chaypaqmi ichaqa Bibliapi imatachus Jehová Dios ruwananchista munan chayta yachananchis, jinaspa chayman jina ruwananchis.

‘Diospa siminta uyarispa waqaychaqkuna kusisqa kachunku’ (LUCAS 11:28).

Kay tiempopiqa askha runakunan Bibliapi Diospa kamachisqanta kasukuspa kusisqa kausashanku. España nacionpi tiyaq runamanta yachasun, payqa ratollan imawanpas phiñakuran, jinan runakunata millayta trataran. Juj p’unchaymi ichaqa profeta Moisespa qelqasqanta leeran, Moisesmi qelqaran Jacobpa wawan Josemanta. Paytaqa esclavo kananpaqmi vendepuranku, chaymantataq mana juchanmanta carcelman wisq’achiranku. Chhaynapiña José tarikuran chaypas, payqa llamp’u sonqo runallan kasharan, jujkunatapas khuyapayaranmi (Génesis, 37-45 capitulokuna). Chayta yachaspan España nacionmanta runaqa niran: “Josemanta yachasqaymi yanapawaran llamp’u sonqo, sumaq sonqo kanaypaq. Chaymi kunanqa familiaywan sumaqta kausayku”, nispa.

Bibliaqa willawanchismi munakuywan, khuyapayakuywan, respetowan jujkunata qhawarinanchis kasqanta. Qatimuqpi chaymanta yachasun.