Allin kaqta ruway: Qanmi ajllakunayki kanqa
Imaynachus kausasqaykimantan kanqa kusisqachus kausanki manachus chayqa. Jehová Diosqa allintan yachan chayta, chaymi payqa munan kamachisqanman jina yuyaychasqanman jina kausanaykita.
Jehová Diosqa kusisqa thaj kausanaykitan munan
Bibliapin nishan: “Noqa Jehová Diosmi Diosniykiqa kani, noqaqa allinniykipaqmi yachachiyki, noqan may ñannintachus purinaykita pusayki. ¡Kamachisqaykunallata kasukuwaq! Thaj kayniykiqa mayu jinan kanman, chanin kayniykipas lamar-qochaq phoqchiqesqan jinan kanman”, nispa (Isaías 48:17, 18).
Llapapas atisunmanmi munasqanchisman jina kausayta. Ichaqa Jehová Diosqa manan chhaynatachu piensan, paytaq kamawarqanchis chayqa yachanmi imayna kausaysi allin chayta. Chaymi payqa munan yuyaychasqanman jina kausananchista, chayman jina kausasun chayqa allinmi kasun. Chaymantapas payta kasukuspaqa kusisqan kasun, allin yuyaywanmi imatapas ruwasun thajtaq kausasunpas.
Jehová Diosqa manan mana atinatachu imatapas mañawanchis
Bibliapin nishan: “Kay qosqay kamachikuykunaqa manan sasa junt’aychu, manataqmi qankunamanta karupichu kashan”, nispa (Deuteronomio 30:11).
Diospa kamachisqanman jina kausanapaqqa yaqapaschá imaymanata cambiananchis kanqa. Yaqapaschá imayna piensasqanchista, imapas imayna ruwasqanchistapas cambiananchis kanqa. Ichaqa Diosqa manan imatapas mana atinatachu mañawanchis. Chaymantapas payqa kamaqninchistaq chayqa allintan yachan imakunas allinninchispaq chayta. Payta allinta reqsisun chayqa allintan reparasun imaynas “kamachikuyninkunaqa mana llasa q’epi jinachu” chayta (1 Juan 5:3).
Jehová Diosqa yanapanqan munayninman jina kausaqkunataqa
Bibliapin nishan: “Noqa Diosniyki Jehová Diosqa, paña makiykimantan jap’ishayki. Noqan niyki: Ama manchakuychu, noqan yanapasayki”, nispa (Isaías 41:13).
Llapapas atillasunmanmi Diospa kamachikusqanman jina kausaytaqa, ¿imaraykun chayta ninchis? Payqa liston kashan sapankatapas yanapawananchispaq. Chaymantapas payqa Bibliawanmi kallpata qowanchis yanapawanchis ima.
Waranqanpi runakunan Bibliaq nisqanman jina kausashanku, willakusqankuman jinaqa ñaupaqpi imayna kausasqankumantaqa aswan munaytas kunanqa kausashanku. Chhaynaqa, ¿munawaqchu Bibliapi yuyaychaykunamanta astawan yachayta? Chaypaqqa yaqapaschá estudiayta qallariwaq ¿Munawaqchu wiñaypaq kusisqa kausayta? nisqa folletota. Chay folletoqa gratisllan, jw.org nisqapipas kashanmi. Chaypin kashan kay kinsa yachachikuykuna:
-
“¿Yanapawasunmanchu Biblia?”
-
“Bibliapin willashan jamuq tiempomanta”
-
“¿Confiasunmanchu Bibliapi?”
Diospa simin qelqata leespan allinta yachanki imaynas Bibliaqa “allinta pusawasun kunanpas wiñaykamapas” chayta (Salmos 111:8). Diospa siminta kasukuyqa imamantapas ancha allinpunin. Ichaqa manan Diosqa pitapas obliganmanchu siminta kasukunanpaqqa (Deuteronomio 30:19, 20; Josué 24:15). Sapankamantan kanqa kasukusunchus manachus chayqa.
