Yaqa llapa runakunan yachanku wakin ruwaykunaqa allin kasqanta wakin ruwaykunataq mana allin kasqanta. Chaymi mana allinpaq qhawarinku violacionta, runa wañuchiyta, wawakuna abusaytapas. Allinpaqtaq qhawarinku sumaq sonqo kayta, khuyapayakuq kayta, chanin kaytapas. Ichaqa, ¿imaynatan qhawarinku warmi-qhari puñuyta, llullakuyta, imayna wawakuna uywaytapas? Runakunaqa yaqa llapapas “chayqa sapankamantañan” nispan ninku. Chaymi yuyaykusqankuman jinalla imatapas ruwanku otaq jujkunaq ruwasqanman jinalla ruwanku. Ichaqa, ¿allinchu chhayna ruwasqanku?

Imatapas ruwananchispaqqa conciencianchismi reparachiwanchis imachus allin imachus mana allin chayta (Romanos 2:​14, 15). Wawakunapas reparanku imatapas mana allinta ruwaspaqa, chaymi juchachakunku. Wiñasqanchisman jinan conciencianchisqa cambian. ¿Imarayku? Familianchiskuna, runamasinchiskuna, tiyasqanchis ladokunapi costumbrekuna, religión iman imachus piensasqanchista cambianman. Chaymi imatapas ruwaspaqa chaykunaman jina ruwasunman.

Conciencianchismi yanapawasunman agradecido, khuyapayakuq, chanin runa kananchispaq. Chaymantapas jark’awasunmanmi jujkunaq sonqonta ama k’irinanchispaq, p’enqaypi ama tarikunanchispaq, llakiwan ama ñit’ichikunanchispaqpas.

¿Allinchu kanman noqallanchispi confiay? Yachasun Garrick waynamanta, payqa munasqanman jinallas imatapas ruwasqa. Chay ruway allin kananpaqña piensarqan chaypas, tiempowansi reparasqa mana allin kasqanta. Imaymana sasachakuykunapis tarikusqa, qhelli juchamansi urmasqa, drogakuyta, machayta imas qallarisqa. Nishu maqakuq runamansi tukupusqapas.

Mayninpiqa runakuna allinta qhawariwananchispaqmi imatapas ruwasunman. Yaqapaschá paykunaqa allin experienciayoq, allin yachayniyoq kankuman. Chaymi piensasqankuman jina ruwaspaqa allinninchispaq kanman. Sichus familianchispa, amigonchiskunaq, runamasinchiskunaq allinpaq qhawarisqankuta ruwasun chayqa paykunaqa respetawasunmi.

¿Confiasunmanchu jujkunaq piensasqankupi? Yachasun Priscilamanta, payqa sipas kashaspas amigonkuna jina imatapas ruwasqa; manas juchapaqchu qhawariq manaraq casarakushaspa jujwan-jujwan puñuytaqa. Ichaqa manas kusisqachu kasqa. Paymi nin: “Jujkunaq ruwasqanta jina imatapas ruwayqa manan allinniypaqchu karqan, chaymi mana allinkunapi tarikurqani”, nispa.

Imatapas ruwananchispaqqa imatachus allinpaq qhawarinchis imatachus jujkunapas allinpaq qhawarinku chayman jinan ruwanchis. Ichaqa chaykunallata qhawarispa imatapas ruwasun chayqa sasachakuykunapin tarikusun. ¿Imarayku? Runakunaqa manan sut’itaqa yachanchischu ima ruwasqanchispas allinpunichus kanqa manachus chaytaqa (Proverbios 14:12). Chaymantapas yaqapaschá piensasqanchisman jinaqa imatapas allinpaq qhawarisunman otaq jujkunaq imachus allinpaq qhawarisqanta allinpaq qhawarillasunmantaq, ichaqa manan chhaynapunichu kanan. Runakunaq imaynachus piensasqankuqa cambiashallanmi, chaymi ñaupaqpi imachus mana allinpaq qhawarisqankuqa kay tiempopiqa allin qhawarisqa kapunman. Ñaupaqpi allinpaq qhawarikusqantaq kay tiempopi mana allin kapunman.

Chhaynaqa, ¿maypin tarisunman confianapaq jina yachachikuykunata? ¿Maypin tarisunman imas allin imas mana allin chayta? ¿Kanmanpunichu vidanchispi imatapas allinta ruwananchispaq yachachikuykuna?

Arí kanmi, chay yachachikuykunaqa llapanchistan yanapawasunman imatapas allinta ruwananchispaq. Qatimuq yachachikuypin chaymanta astawan yachasun.