ASKHA runakunan llank’anankuta wasinkuta sueldonkutapas chinkachinankuta mana manchakusparaq tukuy rikusqankuta rantiyta munanku. ¡Mana yuyayniyoq kaymá chayqa!

Chhayna runakunaqa ratollan sonqonkuta suwachikunku propagandakunaq imaymana munachisqanwan, chaykunapin ninku hatun wasiyoq, carroyoq kanankupaq, otaq valorniyoq p’achata rantinankupaqpas. Mana qolqenku kaqtinpas “manupipas apakullay” ninkun. Askha runakunan qhapaq hina qhawarisqa kayta munanku, chaymi rantishallanku hukman hukmanña manu kanku chaypas.

Qhepamanmi ichaqa reparakunqaku. Huk libron nin: “Allin qhawarisqa kanapaq valorniyoq artefactokunata manupi rantiyqa, kusisqa sientekunapaq crack (chayqa cocaína hinan) drogata fumay hinan. Drogapas imaymanata rantiypas ratollan tarikun, kusisqatan sientechin, ichaqa manan unaypaqchu. Tiempowanqa llakiq ñit’isqanmi tarikunku wakchayapunkutaq kanpas”, nispa (La epidemia del narcisismo, inglés simipi).

Biblian willan imaymanayoq kasqanmanta hatunchakuqqa mana yuyayniyoq kasqanta (1 Juan 2:16). ¿Imarayku? Qhapaqyayta maskhaq runaqa manan reparanchu imachus kawsaypi aswan allin kasqanta, chaykunataqa manan qolqewan rantiyta atikunmanchu. ¿Imakunatan mana rantiyta atinmanchu?

Estados Unidosmanta Beatriz * sutiyoq sipasmi nin: “Taytayqa nishutapunin llank’ananman qolqe maskhaymanpas qokun. Wasiypiqa manan imapas faltawankuchu ichaqa taytayqa manan hayk’aqpas wasiypiqa kanchu, llank’ananraykun maymanpas viajashallan. Yachanin llank’anan kasqanta ichaqa ñoqaykuwan kuska kananpaqpas tiempotaqa t’aqananmi”, nispa.

Kaykunata tapukuy: ¿Imakunamantan Beatrizpa taytan qhepakunaman yaqapas pesapakunman? ¿Imaynan ususin sientekushan nishuta qhapaq kayta taytan maskhasqanrayku? ¿Imatan familian qolqemantapas astawan necesitan?

Bibliaq yachachikuyninkuna:

• “Qolqe sonqo-kaymi tukuy mana allinkunaq saphinqa, chaymi wakinkunapas chayta munapakuspanku [...] imaymana llakikunapi rikukurqanku” (1 Timoteo 6:10)

• “Aswan allinqa munakuypa kasqanpi yuyu mikhuymi, cheqnikuypa kasqanpi wira waka aycha mikhuymantaqa” (Proverbios 15:17)

¿Imatan yachanchis? Familiapi kusisqa kawsaytaqa manan qolqewan rantiyta atiwaqchu. Aswanpas chaytaqa tarinki familiaykiwan kuska kaspa munakuyniykita rikuchispa iman (Colosenses 3:18-21).

17 watayoq Sara sutiyoq sipasmi nin: “Mamayqa sapa kutillanmi niwan qhapaq runawan casarakunaypaq, niwallantaqmi profesionniyoq kanaypaq, chhaynapi imapipas tarikuqtiyqa allin llank’anata tarispay allinta kawsanaypaq. Yaqachus hina mamayqa qolqellamanta llakikun”, nispa.

Kaykunata tapukuy: ¿Qhepaman imakuna pasanasuykimantachu llakikushanki? ¿Cheqaqtachu chaykuna llakikunapaq hina, icha mana kaqmantachu llakikushanki? ¿Imapin Saraq maman cambianan qolqemanta yuyaykusqanpi?

Bibliaq yachachikuyninkuna:

• “Ama qhapaq kaykunata kay pachapi huñukuychischu, kaypiqa thutapas thutanmi qhoqayaypas ismuchinmi, suwakunapas wasita haykuspan suwakun” (Mateo 6:19)

• “Qankunaqa manan yachankichischu imachus paqarin sucedenasuykichista” (Santiago 4:14)

¿Imatan yachanchis? Qolqewanqa manan hamuq tiempopi allin kawsayta tarisunmanchu, ¿imarayku? Qolqeqa chinkapullanmi. Hinaspapas qolqeqa manan onqoymanta wañuymantapas salvawasunmanchu (Eclesiastés 7:12). Aswanpas hamuq tiempopi allin kawsaytaqa tarisunchis Diosmanta munayninmantapas yachaspan, chaytan Biblia niwanchis (Juan 17:3).

24 watayoq Tania sutiyoq sipasmi nin: “Tayta-mamaykun yachachiwarqanku kapuqnillaykuwan kawsayta. Necesitasqallaykuwanña kawsarqayku chaypas, ñañaypiwanmi kusisqa wiñarqayku”, nispa.

Kaykunata tapukuy: ¿Imaraykun kapuqnillaykiwan kawsay mayninpi sasa kanman? ¿Imatan familiayki reparan qolqeta imayna qhawarisqaykita rikuspanku?

Bibliamanta yachachikuykuna:

• “Mikhunanchispaqpas p’achakunanchispaqpas kashaqtinqa, chaykunawanmi sonqopas-sonqo kashananchis” (1 Timoteo 6:8)

• “Kusisamiyoqmi huch’uyyaykukuspa Diosta maskhaqkunaqa” (Mateo 5:3)

¿Imatan yachanchis? Qolqepas imaymanayoq kaypas manan aswan importantechu. Biblian nin: “Runaq kawsayninqa manan askha kaqniyoq kaspallachu allin kanqa”, nispa (Lucas 12:15). Cheqaq kusikuyta tarinapaqqa kay tapuykunaq kutichiynintan yachananchis:

• ¿Imaraykun kawsanchis?

• ¿Imaynan hamuq tiempoman kawsay kanqa?

• ¿Imatan ruwanay Diosta reqsinaypaq?

Kay revistata qelqamuq Jehová Diospa testigonkunan ancha kusikuywan yanapasunkiku chay tapuykunaq kutichiyninta tarinaykipaq.