¿IMA NINMI BIBLIA?
Jesús
¿Dioschu Jesús?
“Manan pipas Diostaqa hayk’aqpas rikurqanchu” (Juan 1:18)
¿IMA NINKUN RUNAKUNA?
Wakin runakunaqa yuyaykunkun Dioswan Jesuswan mana kaqllachu kasqanta. Hukkunan ichaqa yuyaykunku kaq runalla kasqanta, yuyaykusqanku cheqaq kasqanta rikuchinankupaqtaq Bibliamanta wakin textokunata qhawachinku.
¿IMA NINMI BIBLIA?
Jesusqa manan tukuy atiyniyoq Dioschu. Manan Dioswan igualchu. Bibliapin tarinchis kikin Jesús kay nisqanta: “Yayaqa ñoqamanta aswan kurakmi”, nispa (Juan 14:28). Bibliaqa nillantaqmi: “Manan pipas Diostaqa hayk’aqpas rikurqanchu”, nispa (Juan 1:18). Chhaynaqa Jesusqa manan Dioschu, Jesustaqa askha runakunan rikurqanku.
Ñawpaq tiempopi cristianokunapas manan nirqankuchu “Jesusqa Diosmi” nispa. Apóstol Juanmi qelqarqan: “Kaykunan ichaqa qelqasqa kashan, Jesusqa Diospa Churin Cristo kasqanta iñinaykichispaq”, nispa (Juan 20:31). *
¿Hayk’aqmi Jesús nacerqan?
“Belén llaqta qaylla campopitaq michiqkuna kasharqan uywankuta tutantin qhawaspanku” (Lucas 2:8)
¿IMA NINKUN RUNAKUNA?
Wakin runakunapaqqa Jesusqa 25 diciembre killapin nacerqan, chaymi Navidadta festejanku. Hukkunataq enero killa qallariypi festejanku.
¿IMA NINMI BIBLIA?
Bibliaqa manan willanchu hayk’aqchus Jesús nacesqanta. Ichaqa willanmi nacesqan p’unchaypi ‘campopi michiqkuna kashasqankuta uywankuta tutantin qhawasqankutapas’ (Lucas 2:8). Chay michiqkunaqa manachá uywankutaqa diciembre enero killakunapiqa campopi qhawashankumanchu karqan. ¿Imarayku?
Jesuspa may nacesqanpiqa diciembre enero killakunapin nishuta chirin. Bibliaqa willanmi chay killakunapi ‘para chayamusqanrayku’ runakuna chirimanta khatatatasqankuta (Esdras 10:9, 13; Jeremías 36:22). Chayraykun chay killakunaqa mana allinchu michiqkuna uywakunata ‘campopi’ qhawanankupaq.
¿Kawsarimpurqanchu Jesús?
“Diosmi payta [Jesusta] wañusqanmanta kawsarichimpurqan” (Hechos 3:15)
¿IMA NINKUN RUNAKUNA?
Wakin runakunan ninku: “Manan pipas nitaq Jesuspas kawsarimpuytaqa atinmanchu”, nispa.
¿IMA NINMI BIBLIA?
Jesusmi qatikuqninkunata kayta nirqan: “Sinchitapuni ñak’arichiwaspa wañuchiwanqaku. Ichaqa kinsakaq p’unchaypin kawsarimpusaq”, nispa (Mateo 16:21). Biblian willan kawsarimpusqan qhepata 500 más runakunaman rikhurisqanta (1 Corintios 15:6). Chayta rikuq runakunaqa manan iskayarqankuchu Jesusqa cheqaqtapuni kawsarimpusqanmanta, chaymi wañuytapas mana manchakuspa chaypi iñirqanku (Hechos 7:51-60; 12:1, 2).
¿IMARAYKUN CHAYMANTA YACHANAYKI?
Jesuspa wañusqanpas kawsarimpusqanpas llapa runakunatan yanapan kay pachapi wiñay kawsayta aypanankupaq, chaytan Biblia yachachin (Salmo 37:11, 29; Apocalipsis 21:3, 4). Tukuy atiyniyoq Jehová Diospas Churin Jesuspas anchata munakuwasqanchisraykun atisunman wiñay kawsayniyoq kayta (Juan 3:16; Romanos 6:23).
^ párr. 7 Chaywanqa manan nishanchischu Diosqa casarakuspa wawakunayoq kasqanta. Jesustaqa “Diospa Churin” nispan nikun kikin Diospuni payman rikch’akuqta kamasqanrayku.
Astawan yachanaykipaq
BIBLIAMANTA YACHACHIKUYKUNA
¿Imaraykun wañuran Jesús?
Uyarirankichá “Jesusqa juchanchisraykun wañuran” nispa nisqankuta. ¿Imaynapin juj runallaq wañusqan llapa runata yanapanman?
BIBLIAMANTA TAPUYKUNA
¿Imayna rijch’ayniyoqmi Jesús karan?
Bibliapin yachasunman pimanmi rijch’akunman karan chayta.
