“Qanqa mañakusqatan uyarinki, llapa runan hamusunkiku” (Salmo 65:2)

¿IMA NINKUN RUNAKUNA?

Wakinqa ninkun: “Mañakusqaykitaqa manan pipas uyarinchu”, nispa. Wakin runakunaqa ñak’arispankun tapukunku: “¿Pillapas uyariwanmanchu mañakusqayta?”, nispa.

¿IMA NINMI BIBLIA?

“Señorqa chanin runakunatan qhawashan, mañakusqankutapas makillan uyarishan. Ichaqa mana allin ruwaqkunaq contranpin kashan” (1 Pedro 3:12). Chaywanmi yachanchis Diosqa mañakusqanchista uyarisqanta, astawanqa payta kasukuqkunaq mañakusqanta. Askha kutipin Biblia willawanchis Jehová * Diosqa mañakusqanchista uyariy munasqanta, 1 Juan 5:14 texton nin: “Ñoqanchisqa [...] allintapuni yachanchis, munayninman hina imatapas Diosmanta mañakuqtinchisqa pay uyariwananchista”, nispa. Diosman qayllaykuq runaqa Diospa munasqanman hinan mañakunan.

“Mañakushaspaqa ama mana iñiqkuna hina thawtiychischu” (Mateo 6:7)

¿IMA NINKUN RUNAKUNA?

Budismo, católico, hinduismo, islam religionkunapiqa yachachinkun rezasqankuta yupanankupaq, chaypaqmi utilizanku bolachakunayoq collarta.

¿IMA NINMI BIBLIA?

Diosmanta mañakusqanchisqa sonqomantan lloqsinan, manan grabadora hinachu kaqllata sapa kuti ninanchis. Biblian niwanchis: “Mañakushaspaqa ama mana iñiqkuna hina thawtiychischu, paykunaqa warararasqankuwanmi Diospa uyarisqan kayta yuyanku. Amayá qankunaqa paykuna hinachu kaychis. Yayaykichisqa manaraq mañakushaqtiykichismi yachanña imakunatachus necesitasqaykichista”, nispa (Mateo 6:7, 8).

¿IMARAYKUN YACHANANCHIS?

Diospa mana chaskisqan mañakuykunata ruwayqa tiempo usuchiymi, Diostapas phiñachinchismi. Diosqa millakunmi mana kasukuyta munaq runakunaq mañakusqanta (Proverbios 28:9).

“Señor Diosta maskhaychis tarinaraq kashaqtin, payta waqyakuychis qayllallapiraq kashaqtin” (Isaías 55:6)

¿IMA NINKUN RUNAKUNA?

Askha runakunan mañakunku Mariaman angelkunaman, santopaq qhawarisqanku runakunaman ima; hukninkaqmi Antonio de Padua, payqa necesitasqankuta qoq patronninkus; hukninkaqtaqmi Judas Tadeo, nisqankuman hinaqa sinchi ñak’ariypi tarikuqkunaq patronninsi. Chay santokunapi creeqkunaqa ninkun Diosman asuykunankupaq paykuna yanapasqanta.

¿IMA NINMI BIBLIA?

Cristianokunaqa hanaq pachapi Taytanchismanmi mañakunanchis (Mateo 6:9). Biblian nin: “Ama imamantapas llakikuychischu, aswanpas tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta qoychis”, nispa (Filipenses 4:6).