16 watayoq Carlos * nin: “Mayninpin compañeraykuna telefonoypa numeronta mañawaspa niwanku: ‘¿Paseaq risunmanchu, imallatapas ruwasunmanpaschá?’, nispa. Ñoqaqa ‘manan’ nispallapunin kutichini. Chay qhepamanmi ichaqa piensani: ‘Qollayman numeroyta karqan’, nispa. Wakin compañeraykunaqa munay rikch’ayniyoqmi kanku; chaymi piensani, ‘¿huchachu kanman paykunawan puriy?’, nispa”, nispa.

¿Qanpaqpas sasachu tentacionkunata atipay? Ama pisipaychu, atinkin atipayta.

Llapanchismi tentacionkunamanta cuidakunanchis. Apóstol Pablon kurakña kaspa kayta qelqarqan: “Sonqoypiqa Diospa kamachikuy siminwanmi kusikuni. Cuerpoypin ichaqa wak kamachikuq kasqanta reparakuni, chayqa huchan. Chay huchaqa munayniypa contranmi hatarin, hinaspan cuerpoypi kaq kamachikuqman hap’iykachiwan”, nispa (Romanos 7:22, 23). Pabloqa manan pisiparqanchu, qanpas manan pisipanaykichu. Ama atipachikuychu cuerpoykiq munapayasqanwan (1 Corintios 9:27). Kanqapunin tentacionkunaqa. Waynallaraq kashaspa atipanki chayqa, kunanpas kurak kaspapas manan problemakunapichu tarikunki.

Televisionpas hukkunapas manan yanapasunkichu. “Wayna-kaypa waqllisqa munapayayninkunamanta” ayqeyqa sasan (2 Timoteo 2:22). Peliculakunapas, televisionpas, takikunapas, wayna-sipaskunapaq librokunapas chay munapayaykunamanta ayqeytan aswan sasamanraq tukuchin. Runakunatan creechin “tentacionman urmayqa manan huchachu” nispa. Munanakuymanta peliculapi actuaqkunaqa warmi-qhari puñuymanmi chayanku. Ichaqa kawsayqa manan peliculakuna hinachu, ñoqanchisqa atisunmi mana allinkunamanta ayqeyta, chaytan Biblia nin (1 Pedro 2:11). Tentacionkunata atipanaykipaqqa qanmantan kanqa.

Imakunapi pisipasqaykita reqsikuy. Allintaña ruwayta munashaqtiykipas imapi pisipasqaykimanqa qonqaymi urmawaq. ¿Maynintan aswan facilta huk cadenata t’ipisunman? Mayninchá aswan gastasqa kashan chaynintan, ¿riki? Tapukuy: “¿Imapin pisipani ratolla? ¿Imakunan ratolla urmachiwan? ¿Imatan ruwayman chaykunaman mana urmanaypaq?”, nispa (Bibliaq yachachikuynin: Santiago 1:14).

Ñawpaqmanta preparakuy. Huk tentacionpi tarikuspa imaynata atipanaykipi piensay (Bibliaq yachachikuynin: Proverbios 22:3).

Kallpachakuy allin kaqta ruwanaykipaq. Biblian willan huk warmi huk waynata puñunankupaq nisqanta, chaypin chay waynaqa kayta nirqan: “¿Imaynan kay sinchi mana allinta ruwaspa Dios contra huchallikuyman?”, nispa (Génesis 39:9). Chay waynaq nisqanpin reparanchis allin kaqta ruwananpaq anchata kallpachakusqanta. Yacharqanmi chay ruway mana allin kasqanta manapunitaqmi tentacionman urmayta munarqanchu. ¿Pay hinachu kanki?

Yanapaqniyki amigokunata maskhay. Sichus allin kaqta maskhaq amigokunawan huñukunki chayqa askha tentacionkunamantan ayqenki. Biblian nin: “Yachayniyoqkunawan puriqqa yachayniyoqmi kapunqa”, nispa (Proverbios 13:20).

Tentacionman apaq ruwaykunamanta karunchakuy.

• Ama sapallayki qhepakuychu huk qhariwan otaq huk warmiwan.

• Ama internetman haykuychu ima horapichus otaq maypichus tentasqa kawaq pornografiata qhawanaykipaq chaypiqa.

• Ama huñukuychu mana allin ruwaykunata allinpas kanman hinata ruwaq runakunawan.

¿Imakunapiwanmi yanapasunkiman tentacionman ama urmanaykipaq? (Bibliaq yachachikuynin: 2 Timoteo 2:22.)

Diosmanta yanapayta mañakuy. Jesusmi qatikuqninkunata nirqan: “Diosmanta mañakuychis, ama wateqasqa [tentasqa] kanaykichispaq”, nispa (Mateo 26:41). Diosqa munanmi allin kanaykita payqa yanapasunkin. Diosqa maykamachus pruebata muchuyta atiwaq chaykamallan probasqa kanaykita dejanqa, Diosqa yanapasunkin chay pruebamanta lloqsinaykipaq (1 Corintios 10:13).