1, 2. ¿Ima “allin ruwaykunatan” aparinku umalliqkuna?

 UNAYÑA kashanki yanapakuq qhari jina chayqa, ñachá imaymanapiña listo kashanki umalliq kanaykipaq. Ichaqa, ¿atiwaqchu allin ruwaykuna ruwaypi juj chhikantawan kallpachakuyta? (1 Tim. 3:1).

² Ichaqa, ¿imatataq ruwanku umalliqkunari? Paykunan umata aparinku Diosmanta willaypi. Chaymantapas hermanokunatan kallpachanku yachachinku ima. Iñiq t’aqatapas allintan yanapanku iñiyninkupi fuerte kanankupaq. Chaychá Bibliapiqa paykunamanta rimaspaqa “regalokuna jinan” kanku nin (Efes. 4:8).

3. ¿Imakunatan juj hermano junt’anan umalliq kananpaq? (1 Timoteo 3:​1-7; Tito 1:​5-9).

³ ¿Imatan ruwana umalliq kanapaq? Umalliq kayqa manan llank’anaman jaykuy jinachu. Llank’anaman jaykunapaqqa imayna kanatachá jefe munan chaytan junt’ana, imaymanakunatan yachana. Umalliq kanapaqmi ichaqa mana chhaynachu. Manan predicaypi yachachiypi imallachu allin kana. Aswanpas Bibliapi nisqan ruwaykunatan junt’ana. Chaykunan qelqasqa kashan 1 Timoteo 3:​1-7 textopi, Tito 1:​5-9 textopi ima (leey 1 Timoteo 3:​1-7; Tito 1:​5-9). Kaypin yachasun imakunatas pipas umalliq kananpaq junt’anan chayta. Kinsamantan yachasunchis: 1) Iñiqkuna ukhupi runakuna ukhupi iman allin qhawarisqa kanan. 2) Allintan familianta umallinan. 3) Liston kashanan iñiqkunata servinanpaq.

 ALLIN QHAWARISQAN KANAN

4. ¿Iman “mana juchachana” kay?

⁴ Juj umalliqqa kanan “mana juchachanan”. Manan iñiq t’aqapi mayqenpas paymantaqa malta piensananchu. “Jawapi kaqkunaqpas allin qhawarisqanmi kanan”. ¿Imaninantaq chayri? Mana iñiq runakunaqa yaqapaschá Diospi iñisqanmanta malta rimanqaku. Ichaqa manan imayna runa kasqanmantaqa mana allintaqa rimanankuchu (Dan. 6:​4, 5). Tapukuy: “¿Allinpaqchu qhawariwanku iñiqkunapas mana iñiqkunapas?”, nispa.

5. ¿Iman “allin kaqta munakuy”?

⁵ Chaymantapas umalliqqa “allin kaqta munakuqmi” kanan. ¿Imaninantaq chayri? Jujkunaq allin ruwasqankutan mastaqa qhawanan, chaymantataq felicitanan. Chaymantapas allin kaqta munakuqqa allin kaqkunata ruwaspan kusikun. Imachus ruwananmanta mastaraqmi chayta ruwan (1 Tes. 2:8). ¿Imaraykun umalliq chhaynapuni kanan? Payqa tukuy atisqantan kallpachakunan kanqa iñiqkunata michinanpaq, imaymana ruwaykunapi yanapakunanpaq ima (1 Ped. 5:​1-3). Chaymantapas jujkunata yanapayqa imamantapas aswan allinmi (Hech. 20:35).

6. ¿Imaynatan pipas rikuchinman jujkunata sumaqta chaskiq kasqanta? (Hebreos 13:​2, 16; qhaway kay parrafopaq fotota).

⁶ Chaymantapas “jujkunata sumaqta chaskiqmi” kanan. Jujkunata sumaqta chaskiqqa manan amigonkunallatachu sumaqta chaskin (1 Ped. 4:9). Juj libropi nisqan jina, “payqa wasin punkuta sonqonta iman mana reqsisqakunaman kicharin”. Tapukuy: “¿Sumaqtachu chaskini visitamuq runakunata?”, nispa (leey Hebreos 13:​2, 16). Chaymantapas jujkunata sumaqta chaskiq runaqa, imanchá kashan chaytan qoykun pisi kaqniyoq runakunaman, iñiqkunaq favorninpi llank’aq hermanokunaman ima. Paykunamanta wakinmi kanman watukuq umalliqkuna, discursota qonankupaq jamuq iñiqkuna ima (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Imaynatan juj umalliq rikuchinman mana qolqe sonqochu kasqanta?

⁷ Manan “qolqe sonqochu kanan”. ¿Imaninantaq chayri? Manan kay pacha cosaskuna maskhayllapichu yuyayta churanan.  Wajchaña qhapaqña kanman chaypas tukuy ima ruwasqanpin Diospa gobiernonta ñaupaqman churanan (Mat. 6:33). Tiemponta kallpanta kaqninta iman qonan Jehová Diosman, familianman, iñiqkunaman ima (Mat. 6:24; 1 Juan 2:​15-17). Tapukuy: “¿Imaynatan qolqeta qhawarini? ¿Imaychus kan chaywanchu contento kashani, icha qolqe ganaypichu imaymanakuna rantiypichu yuyayniy kashan?”, nispa (1 Tim. 6:​6, 17-19).

8. ¿Imaynatan pipas rikuchinman “allinta controlakuq” “cuerponta kamachiq kasqanta”?

⁸ Chaymantapas “allinta controlakuq” “cuerponta kamachiq iman” kanan. Chhayna runaqa tukuy imapin allinta controlakun. Mijuspapas ujaspapas allin yuyaywanmi chayta ruwan. Allin yuyaywanmi p’achakunpas allichakunpas. Tiemponña kaqtinpas allin yuyaywanmi chaytaqa usan, manataqmi kay pacha cosaskunawanchu kamachikun (Luc. 21:34; Sant. 4:4). Imayna sasapiña kashan chaypas thajllan kan. Chaymantapas umalliqqa “manan machaqchu kanan” manataqmi nishuta ujaqmantachu reqsisqa kanan. Tapukuy: “¿Allinta controlakuqchu kani, cuerpoytapas allintachu kamachini?”, nispa.

9. ¿Iman “allin yuyaywan” imatapas ruway “ordenpi” ruwaypas?

⁹ “Allin yuyaywanmi imatapas ruwanan”. ¿Imaninantaq chayri? Allin yuyaywan imatapas ruwaq umalliqqa, Diospa siminman jinan imatapas qhawarin. Imaña kaqtinpas Bibliatan t’aqwirin chayman jinataq imatapas ruwan. Arí manan apuraychu imatapas ruwanpacha, aswanpas allintan qhawarin imakunas kashan chayta (Prov. 18:13). Chhaynapin Diospa piensasqanman jina ima decisiontapas ruwan. Chaymantapas “ordenpin” imatapas ruwanan. Chaypaqqa allintan imatapas organizanan, tiempollanpitaqmi imatapas ruwanan. Confianapaq jinan kanan, kamachikuykunaq kasqanman jinataqmi imatapas ruwanan. Umalliq kayta munaq kaykama yachamusqanchisman jina imatapas ruwanqa chayqa, allin qhawarisqan kanqa. Kunanqa imaynatas familianta umallinan chayta yacharisunchis.

ALLINTAN FAMILIANTA UMALLINAN

10. ¿Imaninantan Bibliapi nishan “wasinpi kaqkunatapas allintan umallinan” nisqanwan?

¹⁰ Juj casarasqa hermano umalliq kananpaqqa allin qhawarisqan familian kanan. Chaymi Bibliapiqa nin: “Wasinpi kaqkunatapas allintan umallinan”, nispa. Payqa munaytan sumaqtan familianta umallinan. Paymi familianpiqa umata apanan Diosta serviypipas. ¿Imaraykun chaykunata ruwanan? Apóstol Pabloq nisqan jina, “manachus wasinpi kaqkunata umalliyta atinman chayqa, ¿imaynatataq Diospa iñiq t’aqantari cuidayta atinman?” (1 Tim. 3:5).

11, 12. Juj hermano umalliq kayta munashan chayqa, ¿imaraykun wawankuna allinta portakunan? (Qhaway kay parrafopaq fotokunata).

¹¹ Juj hermano wawakunayoq kanman chayqa, “wawankunatapas kasukuqta respetoyoqta iman uywanan”. Paykunataqa sumaqtan yachachinan, cariñowanmi yuyaychanan. Arí, wawakunaqa pujllayman qapariyman iman qokunku. Ichaqa sichus allinta yachachinqaku chayqa, kasukuq respetakuq iman kanqaku, allintan portakunqakupas. Chaymantapas taytaqa yachachinanmi wawanta Diospa amigon kananpaq, Diospa siminman jina kausananpaq, bautizakuyman chayananpaqpas.

¹² Chaymantapas “wawankuqa iñiq, allin kausaq, kasukuq iman kananku”. Ichaqa, ¿iman pasanman mayqen wawanpas iñiq kashaspa juchaman urmaqtin? Taytachus wawanta mana educarqan ni yuyaycharqanpaschu chayqa, manan payqa atinmanchu umalliq  kaytaqa (qhaway 1996 watapi, 15 octubre killapi lloqsimuq La Atalaya revistapi, 21 paginapi 6-7 parrafokunata).

IÑIQKUNATAN SERVINAN

13. ¿Imaynatan pipas rikuchinman “llamp’u sonqo” kasqanta manataq “tercochu” kasqanta?

¹³ “Llamp’u sonqo” hermanokunaqa jatun regalon kanku llapa iñiqkunapaqpas. Llamp’u sonqotaq kanku chayqa thaj kausaytan maskhanku. Qanpas chhayna kanki chayqa tukuy yuyaywanmi jujkunaq piensasqantapas uyarinayki. Umalliq kawaq chayqa ima decisiontaña ruwakuqtinpas Bibliaq nisqanman jina kashan chayqa, ichaqa manataq piensayniykiman jinachu kashan chayqa, ¿apoyawaqchu chayta? Juj umalliqqa manan tercochu kanan, nitaqmi “munasqanman jinallachu imatapas ruwanan”. Aswanpas uyarinanmi jujkunaq imachus piensasqantapas (Gén. 13:​8, 9; Prov. 15:22). “Manan churanakuqchu kanan”, “manataqmi ratulla phiñakuqchu kanan”. Aswanpas allin yuyaywanmi allinta piensarispan imatapas rimanan. Chaymantapas imaña kaqtinpas thaj kausaytan maskhanan (Sant. 3:​17, 18). Sumaq simiwanmi llamp’u simiwanmi rimanan, contranchispi kaqkunatapas chhaynatan rimapayanan (Juec. 8:​1-3; Prov. 20:3; 25:15; Mat. 5:​23, 24).

14. ¿Imaraykun juj umalliq “mana chayllaraq iñiqchu kanan”? ¿Imaynatan rikuchinman Diospaq “junt’aq sonqo” kasqanta?

¹⁴ Chaymantapas umalliqqa “manan chayllaraq iñiqchu kanan”. Manaraq askha watachu bautizasqa kashan chaypas allin yuyayniyoqmi kanan. Chaymantapas Jesús jinan humilde sonqo kanan. Liston kashanan Diosta servinanpaq, munayninman jina imatapas ruwananpaq (Mat. 20:23; Filip. 2:​5-8). Chaymantapas “junt’aq sonqon” kanan Diospaq. Paypa kamachikuyninman jinan kausanan, kasukunanmi llaqtanpi orqokamusqan kamachikuykunatapas (1 Tim. 4:15).

15. ¿Pipas umalliq kananpaq discursota qospa allin yachachiqraqchu kanan?

¹⁵ Chaymantapas juj umalliqqa “allin preparasqan  kanan yachachinanpaq”. ¿Imatan chaywan nishan? ¿Allin discurso qoqchu kanan? Manan chay ninantachu chayqa nishan. Wakin umalliqkunaqa manapaschá discursota allin qoqmantachu reqsisqa kanku. Ichaqa munaytan predicacionpiqa yachachinku. Jujkunata kallpachaq rispapas munaytan chayta ruwanku (tupanachiy 1 Corintios 12:​28, 29; Efesios 4:11 textokunawan). Chaywanpas umalliq kayta munaq hermanoqa kallpachakushanallanmi allin yachachiq kananpaq. ¿Imaynatan chayta ruwanman?

16. ¿Imatan juj hermano ruwanman allin yachachiq kananpaq? (Qhaway kay parrafopaq fotokunata).

¹⁶ Chaymantapas juj umalliqqa “cheqaq yachachikuymanmi k’askakunan”. ¿Imaninantaq chayri? Maypiña yachachinan kaqtinpas pitaña yuyaychanan kaqtinpas Diospa palabranman jinan chaytaqa ruwanan. Chaypaqqa allintan estudianan Bibliatapas qelqanchiskunatapas (Prov. 15:28; 16:23). Chaykunata estudiaspaqa allintan reparanan ima textokunawansi pitapas yanapakunman chayta. Yachachispapas sonqoman chayananpaq jinan yachachinan. Chaykunapiqa yaqapaschá juj allin poqosqa iñiqkuna yanapanman (1 Tim. 5:17). Chaymantapas umalliqkunaqa yachanankun hermanokuna hermanakuna “kallpachayta”. Mayninqa yaqapaschá paykunata yuyaychananku kanqa “anyananku” imapaschá kanqa. Ichaqa munayllatan chaytaqa ruwananku. Diospa siminman jinachus sumaq sonqowan cariñowan chayta ruwanqaku chayqa, ancha jatun yachachiq Jesús jina kasqankutan rikuchinqaku (Mat. 11:​28-30; 2 Tim. 2:24).

ÑAUPAQLLAMAN RISHAY

17. a) ¿Iman siervo ministerial nisqa hermanokunata yanapanman umalliq kanankupaq kallpachakunankupaq? b) ¿Imakunatan umalliqkuna qhawarinanku mayqen hermanopas umalliqchus kanman icha manachus chayta qhawarishaspa? (Qhaway  “Umalliqkuna, ama nishutachu jujkunamanta imatapas mañaychis” nisqa willakuyta).

¹⁷ Kaypi yachasqanchista rikuspaqa yaqapaschá mayqen siervo ministerial hermanopas ninman: “Manachus jina jayk’aqpas chaykunataqa  junt’ayta atiymanchu”, nispa. Ichaqa ama manchakuychu, Jehová Diosqa manan chaykunata mana pantaspa junt’anatachu munan (1 Ped. 2:21). Chaymantapas umalliq kayman chayanapaqqa Jehová Dios kikinmi santo espiritunwan yanapawasun (Filip. 2:13). Ichaqa, ¿munawaqchu chay yachamusqanchiskunapi mayqellanpipas kallpachakuyta? Chhayna kaqtinqa Diospa yanapayninta mañakuy. Astawan t’aqwiriy mayqenpichus allinyayta munashanki chayta; mañakuy umalliqkunaq yanapaynintapas.

18. ¿Imapaqmi kallpachakushanallanku siervo ministerial hermanokuna?

¹⁸ Llapanchismi kallpachakunanchis kaypi yachasqanchisman jina imatapas ruwananchispaq; umalliqkunapas kallpachakunankun chaypaqqa (Filip. 3:16). Siervo ministerial kashanki chayqa, kallpachakushallay umalliq kanaykipaq. Jehová Diospa yanapayninta mañakuy sonqonpaq jina kanaykipaq, iñiqkunatapas tukuy sonqo servinaykipaq (Isa. 64:8). Chaypaq kallpachakunki chayqa Jehová Diosqa bendecisunkin.