1, 2. ¿Imaynatan apóstol Pablo rikuchiran Diospa ancha sumaq sonqo kasqanmanta agradecido kasqanta?

APÓSTOL Pablon niran: ‘Diosqa manan yanqapaqchu ancha sumaq sonqowan qhawariwaran’, nispa (leey 1 Corintios 15:9, 10, NM). Pabloqa cristianokunata qatikacharantaq chayqa, manan Diospa khuyapayakuyninta chaskinanpaq jinachu karan.

² Chaymi payqa wañupunanpaq pisillaña kashaqtin Timoteota niran: “Atiy qowaqniy Señorninchis Cristo Jesustan ‘gracias’ nini; paymi junt’aq runapaq qhawariwaspa juj llank’anata qowaran”, nispa (1 Tim. 1:12-14, NM). Chay llank’anamanta rimaspan payqa wakin umalliqkunata niran: “Manan valorniyoqpaqchu vidaytaqa qhawarini, aswanmi imachus ruwanayta, Señormanta chaskisqay llank’aytawan junt’ayta munani, chay llank’ayqa Diospa ancha sumaq sonqo kayninmanta allin willakuykunata allintapuni willaymi”, nispa (Hech. 20:24, NM).

3. ¿Ima llank’anatan Pablo chaskiran? (22 paginapi dibujota qhaway.)

 ³ Chay allin willakuykunamantan Pabloqa Éfeso cristianokunata niran: “Diosmi ancha khuyapayakuyninpi qankunaq allinniykichispaq llank’anata qowaran”, nispa (Efes. 3:1, 2, NM). Jesusmi Pablotaqa kamachiran mana judiokunaman chay allin willakuykunata willananpaq, chhaynapi paykunapas Diospa gobiernonman jaykunankupaq (leey Efesios 3:5-8). Pabloqa tukuy sonqowanmi chaskisqan llank’anata junt’aran, chhaynapitaq allin ejemplota llapa cristianokunapaq saqeran. Chhaynaqa Pablota Diospa khuyapayasqanqa manan yanqapaqchu karan.

4, 5. ¿Imanaqtinmi nisunman: “Diospa gobiernonmanta allin willakuykunawan, Diospa ancha sumaq sonqo kasqanmanta allin willakuykunawanqa kaqllan”, nispa?

⁴ Kay tukukuy tiempopin Jehová Diospa llaqtanqa pachantinpi willashanku ‘Diospa gobiernonmanta allin willakuykunata’ (Mat. 24:14). Chay gobiernomanta llapa bendicionkunataqa Dios ancha sumaq sonqo kasqanraykun chaskisunchis, chayraykun Diospa gobiernonmanta allin willakuykunata ‘Diospa ancha sumaq sonqo kayninmanta allin willakuykuna’ nispa nikullantaq (Efes. 1:3). Pabloqa tukuy sonqo predicasqanwanmi rikuchiran Diosta agradecekusqanta. ¿Chhaynatachu noqanchispas predicashanchis? (Leey Romanos 1:14-16.)

⁵ Ñaupaq estudiopi yachasqanchis jina, imaymana bendicionkunatan chaskishanchis Jehová Dios ancha sumaq sonqo kasqanrayku. Chayraykun jujkunamanpas Jehová Diosmanta yachachinanchis, chhaynapi paykunapas chay bendicionkunata chaskinankupaq. ¿Imaynatan runakunata yanapasunman Diospa ancha sumaq sonqo kasqanmanta agradecekunankupaq?

6, 7. ¿Dios imayna kasqantan rikuchishanchis Jesuspa sacrificionmanta willaspa?

⁶ Askha runakunan mana imatapas sientenkuchu ima juchatapas ruwaspa, chaymi mana piensankuchu Jesuspa sacrificionpi, ichaqa manan kusisqachu kausanku. Maypachachus Jehová Diospa testigonkunawan rimanku chayraqmi wakinqa yachanku imas jucha chayta, imaynatachus chaymanta librakunkuman chaytapas. Chaykunata yachaspan allin sonqoyoq runakunaqa anchata Jehová Diosta agradecekunku wawanta kay pachaman kachamusqanmanta. Jehová Diosqa runakunata juchamanta wañuymantawan kacharichinanpaqmi wawantaqa kachamuran, chaywantaq rikuchiran ancha munakuq kasqanta, ancha sumaq sonqo kasqantawan (1 Juan 4:9, 10).

⁷ Chaymantan apóstol Pablo niran: “Chay munakusqan Churinmi libre kananchispaq yawarninwan rantikapuwaranchis, chhaynapi Diospa ancha sumaq sonqo kayninrayku juchanchiskunamanta perdonasqa kananchispaq”, nispa (Efes. 1:7, NM). Chhaynaqa Jesusta kachamuspan Diosqa rikuchiran ancha jatun  munakuyninta, ancha sumaq sonqo kaynintawan. Jesuspa sacrificionpi iñiqtinchismi Diosqa juchanchiskunata perdonapuwanchis, conciencianchistapas limpiapuwanchis (Heb. 9:14). ¡Ima munaymi chayta jujkunaman yachachiyqa!

8. ¿Imanaqtinmi runakuna Dioswan allipunakapunanchis?

⁸ Diosqa enemigonkunata jinan runakunata qhawarin Jesuspa sacrificionpi mana iñiqtinku. Chayraykun paykunaman willananchis Diospa amigon kanankupaq imatachus ruwananku chayta. Chaymantan apóstol Juan niran: “Churipi iñiqqa wiñay kausayniyoqmi, Churipi mana iñiyta munaqmi ichaqa chay kausayman mana jaykunqachu, aswanmi Diospa phiñakuynin paypaqqa kaqlla kashan”, nispa (Juan 3:36). Chhaynaqa Cristoq sacrificionraykun Diospa amigonkuna kasunman. Chaymi apóstol Pablopas niran: “Ñaupaqpiqa karupin Diosmanta kasharankichis, paypa enemigontaqmi karankichispas [...], kunanmi ichaqa pay kikinwan allipunachisunkichis wañuyman entregakuqpa cuerponwan”, nispa (Col. 1:21, 22, NM).

9, 10. a) ¿Imatan Cristo ajllasqa wayqenkunaman encargaran? b) ¿Imaynatan ‘waj ovejamanta’ kaqkuna paykunata yanapashanku?

⁹ Criston janaq pachapaq ajllasqa wayqenkunaman encargaran “allipunachiy willakuyta” willanankupaq. Chaymantan apóstol Pablo niran: “Diosmi noqaykuta wajawaranku paywan allipunakapunaykupaq, chay allipunachiytaqa ruwaran Cristowanmi, jinaspa allipunachiy willakuyta willanaykupaq churawaranku. Chay willakuyqa paywan allipunakapunankupaq kay pacha runakunata Diospa wajasqanmantan rimashan, payqa Cristowanmi chayta ruwashan, manataqmi juchankumantapas cuentata mañashanchu. Chay willakuyta apanaykupaqmi pay kamachiwanku. Chhaynaqa, Cristoq rantinpi Diospa representantenkunan kayku, Diospas noqaykuwan runakunata wajashanman jina. Cristoq rantinpi churasqakuna jinan noqaykuqa runakunata valekuyku: ‘Dioswan allipunapuychis’”, nispa (2 Cor. 5:18-20, NM).

¹⁰ Cristoq wayqenkunataqa ‘waj ovejamanta’ kaqkunan predicay llank’ayninkupi kusisqa yanapashanku (Juan 10:16). Paykunapas Cristoq kachasqankunan kanku, askhataqmi kankupas. Chaymi pachantinpi runakunata yanapashanku Jehová Dioswan amigontin kanankupaq. Chhaynapin Diospa ancha sumaq sonqo kasqanmanta willakuykunata mast’arishanku.

11, 12. ¿Imatan runakunaman yachachinanchis mañakuymanta? ¿Imanaqtinmi chayta ruwananchis?

¹¹ Askha runakunan Diosman rezakunku  thajpi kayta munaspalla, ichaqa manan yachankuchu paykunata Dios uyarinmanchus chayta. Chayraykun paykunata yachachinanchis Jehová Diosqa ‘mañakusqata uyariq kasqanta’. Chaymantan David niran: “Qanqa mañakusqatan uyarinki, llapa runan jamusunkiku. Juchallikusqaykun munaychakuwanku, qanmi ichaqa juchallikusqaykuta pampachawankiku”, nispa (Sal. 65:2, 3).

¹² Jesuspas discipulonkunatan niran: ‘Yayamanta imatapas mañakuqtiykichisqa qosunkichismi payqa’, nispa (Juan 16:23, NM). Apóstol Juanpas niranmi: “Imataña Diospa munayninman jina mañakusunchis chaypas, Diosqa uyariwasunmi, manapunin chaymantaqa iskayananchischu”, nispa (1 Juan 5:14). Chhaynaqa mañakuspanchisqa ‘ancha sumaq sonqowan qhawariq Diospa trononmanmi’ achhuykusunman. ¡Ima munaymi chayta jujkunaman yachachiyqa! (Heb. 4:16, NM.) Chayraykun runakunaman yachachinanchis imayna mañakuyta, piman mañakuyta, imakuna mañakuytawan, chhaynapin yanapashasunchis Diospa amigon kanankupaq, llakikuyninkupi kallpachasqa kanankupaqwan (Sal. 4:1; 145:18).

13, 14. a) ¿Ima bendicionkunatan ajllasqa cristianokuna chaskinqaku? b) ¿Imatan runakunapaq ruwapunqaku?

¹³ Jamuq tiempopin Jehová Diosqa 144.000 ajllasqakunaman astawan rikuchinqa ancha sumaq sonqo kayninta. Chaymantan apóstol Pablo niran: “Diosmi ichaqa ancha khuyapayakuq anchatataqmi munakuwanchispas, chaymi juchanchis jawa wañusqa kashaqtinchis Cristowan jujllachawananchispaq kausarichiwaranchis (qankunaqa Dios ancha sumaq sonqo kasqanraykun salvasqa karankichis). Chaymantapas Cristo Jesuswan kuskata jatarichiwaspanchismi paywan kuskata janaq pachapi tiyachiwaranchis, paywan jujllachasqa kasqanchisrayku. Diosqa chayta ruwaran noqanchis Cristo Jesuswan jujllachasqa kaqkunaman khuyapayakuq kayninpi mana tukukuq ancha sumaq sonqo kasqanta jamuq tiempopi rikuchiwananchispaqmi”, nispa (Efes. 2:4-7, NM).

¹⁴ Jehová Diosqa ima bendicionkunataraqchá ajllasqa cristianokunaman qonqa Cristowan kuska kamachimuqtinku (Luc. 22:28-30; Filip. 3:20, 21; 1 Juan 3:2). Chaypin Jehová Diosqa “mana tukukuq ancha sumaq sonqo kasqanta” paykunaman rikuchinqa. Paykunan Cristoq novian ‘mosoq Jerusalén’ kanqaku (Apo. 3:12; 17:14; 21:2, 9, 10). Chaymantapas Cristowan kuskan llank’anqaku “nacionkunaq qhaliyananpaq”, chhaynapin lliu runakuna juchamanta wañuymantawan librasqa kanqaku, mana ima juchayoqtaq kapunqaku (leey Apocalipsis 22:1, 2, 17, NM).

15, 16. ¿Imaynatan Jehová Dios ancha sumaq sonqo kasqanta rikuchinqa ‘waj ovejakunaman’?

 ¹⁵ Efesios 2:7 textoq nisqanman jina, Diosqa ‘jamuq tiempopipas’ rikuchinqan ancha sumaq sonqo kasqanta. Chaypin kay pachapi kaqkunapas rikunqaku Jehová Diospa ‘mana tukukuq ancha sumaq sonqo kasqanta’ (Luc. 18:29, 30). Paykunan rikunqaku Jehová Dios wañusqakunata kausarichisqanta (Job 14:13-15; Juan 5:28, 29). Diosta serviq askha runakunan wañupuranku manaraq Jesús wañupushaqtin, paykunatan Diosqa kausarichimpunqa jamuq tiempopi. Kay tukukuy tiempopi wañupuq ‘waj ovejakunatapas’ kausarichimpunqan, chhaynapi Jehová Diosta wajmanta servinankupaq.

¹⁶ Diosqa payta mana reqsispa wañupuq runakunatapas kausarichinqan. Chaymi apóstol Juan niran: “Chaymantan rikullanitaq wañusqakunata, juch’uykunata jatunkunatawan tronoq ñaupanpi sayashaqta, chaypin qelqa k’uyukuna kichasqa karan. Chaymantan waj qelqañataq kichasqa karan, chayqa kausay libron kasqa. Chay wañusqakunaqa imachus ruwasqankuman jina, qelqa k’uyukunapi imachus qelqasqa kasqanman jinan juzgasqa karanku. Lamar-qochapas chaypi wañusqa kaqkunatan entregaran, wañuypas Sepulturapas chaypi wañusqakuna kaqtan entregaranku, jinan paykunaqa imachus ruwasqankuman jina sapankanku juzgasqa karanku”, nispa (Apo. 20:12, 13, NM). Chay  runakunamanmi oportunidadta qokunqa Jehová Diosmanta yachanankupaq, payta kasukunankupaqwan. Chaypaqmi Bibliata mosoq ‘qelqa k’uyukunamantawan’ yachananku kanqa. Chay mosoq k’uyukunapipas rikukunqan Diospa ancha sumaq sonqo kayninta.

17. ¿Imatan manapuni qonqananchischu?

¹⁷ Pisillañan kashan tukukuy p’unchay chayamunanpaq. Chayraykun mana pisipaspa predicashanallanchis (Mar. 13:10). Chaymantapas manan qonqananchischu imapaqchus predicasqanchista. Predicanchisqa Jehová Diosta jatunchananchispaqmi. Chaypaqmi lliuman willananchis jamuq tiempopi bendicionkunaqa Jehová Dios ancha sumaq sonqo kasqanrayku kasqanta.

18, 19. ¿Imaynatan Jehová Diosta jatunchasunman?

¹⁸ Cristoq gobiernonpi kashaqtinchisqa paymi yanapawasun pisi-pisimanta mana ima juchayoq kapunanchispaq. Chaymi Biblia nin: “Kamasqakunaqa ismusqa kayman watasqa kasqankumantan kacharichisqa kanqaku, jinaspa Diospa wawankuna jina libre kapunqaku”, nispa (Rom. 8:21, NM). Chaykunaqa Jehová Dios ancha sumaq sonqo kasqanraykun ruwakunqa. Chaytan predicacionpi willananchis.

¹⁹ Chaymantapas willananchismi Apocalipsis 21:4, 5 textoq nisqanta, chaypin nin: ‘Diosmi ñawinkumanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu. Arí, ñaupaq kaqkunaqa manañan kanqachu. Tronopi tiyaqpas: “Tukuy imatan mosoqta ruwasaq”, nispan nimun. Chaymantan nimullantaq: “Kaykunata qelqay, kay simikunaqa confianapaq jinan cheqaqtaqmi kanpas”’, nispa. Tukuy sonqowan chaykunamanta willasunchis chayqa, Jehová Diostan jatunchashasun ancha sumaq sonqo kasqanmanta.