¿ATIWAQCHU DECIDIYTA IMAYNA KAUSAYNIYKI KANANPAQ? Wakin runakunaqa piensanku destinoyoq kanankupaqmi, jujkunataq Dios vidankuta controlananpaq. Chayraykun runakunaqa imapas mana munasqankuman jina lloqsiqtinqa ninku: “Chhaynapaqpunichá destinoyqa karan”, nispa.

Wakinqa llakiwanmi ñit’ichikunku millay kausayta rikuspa, sufrimientolla kay mundopi kasqanta rikuspa ima. Yaqapaschá allin kausayniyoq kayta munanku, ichaqa tukuy kallpachakusqankuqa yanqapaqmi pacha chhafchiykunaq, inundacionkunaq, guerrakunaq, suwakunaq, onqoykunaq kasqanrayku. Chaymi ninku: “Yanqapaqmi kallpachakuni”, nispa.

Imaymana pasasqanwanmi ima ruway munasqanchispas cambianman (Eclesiastés 9:11). Chaywanpas sapankanchismi decidisunman jamuq tiempopi imayna kausayninchis kananta. Bibliaqa yachachinmi imatan ruwasunman jamuq tiempopi imayna kausayninchis kananmanta. ¿Imaraykun chayta ninchis?

Israel llaqta prometesqa allpaman jaykunankupaqña kashaqtinkun, Diosninchis willachiran Moiseswan, niranmi: “Willaykichismi wañuymantapas kausaymantapas, jinallataq saminchaymantapas ñakaymantapas. Ajllakuychis kausayta, qankunapas mirayniykichispas kausanaykichispaq. Diosniykichis Señor Diosta munakuychis, payta kasuychis”, nispa (Deuteronomio 30:15, 19, 20).

“Willaykichismi wañuymantapas kausaymantapas, jinallataq saminchaymantapas ñakaymantapas. Ajllakuychis kausayta” (Deuteronomio 30:19)

Arí, Diosmi Israel runakunataqa salvaran Egiptopi esclavo kasqankumanta, jinaspa prometesqa allpapi libre kusisqa tiyanankupaq. Ichaqa kallpachakunankun karan kasukunankupaq. Paykunaqa ‘kausaytan’ ajllakunanku karan. ¿Imata ruwaspan chayta ruwananku karan? Diosta munakuspa, uyarikuspa, Diosmanta mana t’aqakuspa ima.

Qanpas chay jinatan ruwanayki, imata ajllakusqaykimantan dependenqa kausayniykiqa. Sichus Dios munakuyta ajllakunki chayqa, paytan uyarikunayki paymantaq k’askakunayki, chay jinapin wiñaypaq kausayta tarinki. Ichaqa, ¿imakunatan ruwanayki kanqa?

Apóstol Juan qelqaran “Diosqa munakuymi”, nispa. Diostaqa munakuq Diosmantan astawanqa reqsikun (1 Juan 4:8). Jesusqa chaytan yacharan, chaymi “mayqenmi aswan jatun kamachikuy” nispa tapuqtinku niran: “Jehová Diosniykitan munakunki tukuy sonqoykiwan, tukuy almaykiwan, tukuy yuyayniykipiwan”, nispa (Mateo 22:37). Dioswanqa cheqaq amigontin kanchis munakusqanchisraykun, manataqmi manchakusqanchisraykuchu kasukunchis. Ichaqa, ¿imaraykun Diosta munakunanchis?

Imaynan juj tayta wawankunata munakun chay jinatan Diosqa munakuwanchis. Wawanku pantaqña kanku chaypas, tayta-mamakunaqa kallpachakunkun yachachinankupaq, animanankupaq, yanapanankupaq, disciplinanankupaq, tukuy chaykunatan ruwanku wawanku kusisqa kausananpaq. Ichaqa tayta-mamakunaqa wawanku kaykuna ruwanankutan munanku: paykunata munakunankuta, kasukunankuta, tukuy ima nisqankupas paykunaq allinninpaq kasqanta entiendenankuta. Tukuy imaymanata qowaqninchis ch’uya Diosninchispas payta munakunanchista, kasukunanchista, jatunchananchista iman munan.

Bibliaq qelqakusqan idiomapiqa, “uyarikuy” nisqa palabraqa “kasukuy” ninantan nin. Juj taytaqa “uyariway” nispan wawanta nin, chaywanqa “kasukuway” nishanmi. Kaqllataqmi Diosta uyarispapas, tukuy kamachisqanta kasukunanchis. Kay tiempopiqa manan Diosqa runakunawan rimanchu uyarinanchispaq, ichaqa kashanmi palabran Biblia chayta leespa kasukunanchispaq (1 Juan 5:3).

Diosta uyariy importante kasqanta rikuchinanpaqmi Jesús kayta niran: “Manan t’antallawanchu runaqa kausanqa, aswanpas Jehová Diospa llapa nisqankunawan iman”, nispa (Mateo 4:4). Mijuyqa importanten, chhaynan Diosmanta yachaypas importante. ¿Imarayku? Rey Salomonmi chaymanta explicaran: “Yachayniyoq kaypas qolqeyoq kaypas runatan waqaychan, yachayniyoq kaymi ichaqa runata allinta kausachin”, nispa (Eclesiastés 7:12). Diosmanta jamuq yachayqa ima mana allinmantapas pakaykuwanchismi, yanapawanchismi allin kaqta ruwananchispaq: Chaymi wiñay kausayman apawasun.

Juj kaq articulopin rimaranchis Jesuspa nisqanmanta, niranmi: “K’illku punkunta jaykuq ñañu ñanmi ichaqa kausayman apan, pisillataqmi chaytaqa tarinku”, nispa (Mateo 7:13, 14). Chay ñanninta rinapaqqa juj allin guiatan necesitanchis maymanchus chayananchisman apawananchispaq: Chayqa wiñay kausaymi. Chayraykun Diosmanqa k’askakunanchis (Salmos 16:8). Ichaqa, ¿imaynatan chayta ruwasunman?

Sapa p’unchaymi imaymana ruwanayoq kanchis, imaymanatawanraqmi ruwaytapas munasunman. Diosninchispa kamachiwasqanchispi piensanallapaqmi tiempopas kashan. Chaymi Bibliaqa niwanchis: “Allintapuni qhawarikuychis imaynatachus kausashankichis chayta, amapuni mana yuyayniyoqkuna jinaqa kausaychischu, aswanpas yachayniyoq jinapuni kausaychis tiempoykichista ama usuchispa; kunan kausasqanchis p’unchaykunaqa sinchi mana allinmi kashan”, nispa (Efesios 5:15, 16). Diosman k’askakunapaqqa paywan amistadninchistan tukuy imamantapas aswan importantepaq qhawarina (Mateo 6:33).

Ñaupaqpi kausasqaykita manaña cambiawaqchu chaypas, atiwaqmi qanrayku familiaykirayku jamuq tiempopi sumaq kausayniyoq kanaykichispaq ruwayta. Bibliaqa yachachiwanchismi Jehová Dios munakuwasqanchista, imatas munan ruwananchista chaytapas. Qhawarisunchis profeta Miqueaspa nisqanta:

“Yau, runa, Señor Diosmi imachus allin kasqanta willarasunkiña. ¿Imatataq Señor Diosqa ruwanaykita munan? Chanin kaqllatapuni ruwanaykitan, khuyapayakuqllapuni kanaykitan, Diosniykiq ñaupaqenpi juch’uyaykukuspa kausanaykitan” (Miqueas 6:8).

¿Pusachikunkichu Dioswan? Invitacionninta aceptanki chayqa, jamuq tiempopi wiñaypaq bendicionkunatan chaskinki. Chayqa qanmantan dependenqa.