Kay revistata leeqkunaq tapukusqan

¿Imatan yachachiwanchis Proverbios 24:27 texto?

Solterokunatan Proverbios qelqa nin: “Hawapi ruwanaykikunataraq ruwamuy, chakra llank’anaykikunataraq llank’amuy, chaymantañan wasiykita sayarichinki”, nispa. ¿Ima ninantan chayta nishan? Kaytan: manaraq casarakushaspan qhari yachanan familiayoq kaspa imakuna hunt’anan kasqanta, chaykunapaqtaq preparasqa kanan.

Ñawpaqpiqa khaynata hinan chay textomanta nikuq: ‘Qosaqa manan qolqellatachu wasiman apanan, aswanmi ‘wasinta sayarichinan’, arí, familiantan yanapanan Bibliamantapas yachachinan’, nispa. Chaytan Dios kamachin qosakunaman, ichaqa chay textopi nisqanqa hukmantan rimashan. ¿Imarayku chayta ninchis? Chaypaq qhawarisun iskay sut’inchaykunata.

Hukninmi kay: hebreopi, “wasiykita sayarichinki” nisqa rimayqa tiyanapaq wasi sayarichiymantan nishan. Chhaynatan nikullantaq casarakuspa warmiyoq wawakunayoq kaymantapas. Chaymi ‘wasiykita sayarichiy’ nispaqa mana familiayoq runa familianta yanapananmantachu rimashan, aswanmi familiayoq kaymanta, arí, casarakuspa wawakunayoq kaymanta.

Iskaykaqtaq kay: chay textopiqa qayllallamanta ruwanatan rimashan. Kaytapas nishanman hina: “Ñawpaqta kayta ruway chaymantataq kayta”, nispa. Ichaqa manan nishanchu: “Ñawpaqta qanpaq llank’ay chaymantataq Diospaq”, nispachu.

Bibliaq qelqakusqan tiempopiqa ‘wasinta sayarichiy’ otaq familiayoq kayta munaq qharin ñawpaqta qhawarikunan karan warmita wawakunata uywananpaq hinañachus kasharan icha manachus chayta. Manaraq casarakushaspan chakrankunataraq llank’amunan karan. Chaytan Biblia sut’ita nin: “Hawapi ruwanaykikunataraq ruwamuy, chakra llank’anaykikunataraq llank’amuy, chaymantañan wasiykita sayarichinki”, nispa. ¿Chaytachu kunanpas ruwana?

Arí, chaytan ruwana. Casarakuyta munaq qhariqa ruwanankunata allinta hunt’ananpaqmi allin preparasqa kanan. Qhali kashan chayqa llank’ananmi kanqa tukuypitaqmi familianta yanapanan kanqa. Arí, Biblian willan tukuypi familianta yanapanan kasqanta, mana chayqa mana iñiq runamantapas aswan millayraqsi kapunman (1 Tim. 5:8). Chaymi casarakuyta munaq wayna kaykunata tapukunan: “¿Preparasqachu kashani familiayoq kaspa chay familiayta uywanaypaq? ¿Allintachu familiayta yanapasaq Jehová Diosta servinankupaq? ¿Allintachu familiayman Bibliamanta yachachisaq?”, nispa. Bibliaq nisqan hina, chaykunatan qhari allinta hunt’anan kanqa (Deu. 6:6-8; Efe. 6:4).

Chaymi casarakuyta munaq qharikunaqa Proverbios 24:27 textoq nisqanpi allintapuni yuyaymanananku. Warmikunapas allintan qhawarikunanku casarakunankupaq, wawakunayoq kanankupaqpas preparasqachus kashanku icha manachus chayta. Wawakunayoq kayta munaq casado warmi qharipas allintan qhawarikunanku wawakunayoq kanankupaq preparasqachus kashanku icha manachus chayta (Luc. 14:28). Diospa nisqanman hina imatapas ruwasun chayqa manan ancha sasachakuykuna kanqachu kusisqataqmi familianchiswan kawsakusun.

[12 paginapi willakuy]

¿Imakunatan tapukunan casarakuyta munaq wayna?