1985 watapi 10 watayoq kashaspaymi Camboya nacionmanta erqechakuna escuelayman chayamurqanku, escuelayqa Columbus llaqtapin karqan (Ohio, Estados Unidos). Hukninkun iskay kinsa simikunallata inglesta rimarqan, dibujokunawantaqmi willawarqan runakuna ñak’arichisqankumanta, wañuchisqankumanta, imayna escapakusqankumantapas. Sapa tutanmi waqaq kani chay erqechakunata yuyarispay. Willaytapunin munarqani Paraisomanta kawsarimpuymantapas, ichaqa manan entienderqankuchu inglés simita. Erqellaraq karqani chaypas, yachaytan qallarirqani camboyano simi rimayta, chhaynapi Diosmanta paykunata yachachinaypaq. Chay ruwasqaymi qhepamanqa anchata yanapawarqan.

Camboyano simi yachayqa sasan karqan. Iskay kutipin saqepuyta munarqani, ichaqa Diosmi tayta-mamaykunawan kallpachawarqan mana saqenaypaq. Chay qhepamanmi, profesorniykuna compañeroykunapas yuyaychawarqanku allin profesionniyoq kanaypaq. Ichaqa precursor kaytan munarqani, chaymi imaymana ruwaykunata yacharqani kuskan p’unchaylla llank’anata tarinaypaq. Sapa colegioymanta lloqsimuspaymi precursorkunawan predicaq kani. Inglés simi rimaytapas yachachirqanin, chay ruwasqaymi qhepaman yanapawarqan.

16 wataypi kashaspaymi uyarirqani Long Beach llaqtapi camboyano rimaypi huñunakuykuna apakusqanta (California, Estados Unidos). Hinan rirqani, chaypitaqmi yacharqanku camboyano simi leeyta. Hinan colegioyta tukusqay qhepallaman precursor karqani, wasiypa qayllanpi tiyaq camboyano rimaq runakunatataqmi predicashallarqani. 18 wataypi kashaspayqa yuyaykusharqaniñan Camboya nacionman ripunaypaq. Chay nacionpi kayqa peligroson karqan, ichaqa yacharqanin 10 millón chaypi tiyaq runakunamanta pisilla Diospa Gobiernonmanta uyarisqankuta. Chay nacionpiqa huk iñiq t’aqallan karqan, chaypitaq 13 predicaqkunalla karqan. 19 wataypi kashaspaymi chay iñiq t’aqaman rirqani, iskay wata qhepamantaq chayman tiyaq ripurqani. Chaypin kuskan p’unchay llank’anata tarirqani qelqakunata inglés simiman t’ikraspa inglés simita yachachispa ima. Tiempowanmi ñoqa hina Diosta serviyta munaq cristianawan casarakurqani. Iskayniykun camboyano rimaq askha runakunata yanaparqayku bautizakunankupaq.

Jehová Diosqa sonqoypa ‘munasqankunatan qowarqan’ (Sal. 37:4). Runakunata Diosta reqsinankupaq yanapaymi astawan kusichiwan ima profesionniyoq kaymantapas. 16 watañan Camboya nacionpi kashani, ñawpaqpiqa 13 predicaqkunallan karqan kunantaq 12 iñiq t’aqakunaña kashan 4 grupokunapiwan (willakun Jason Blackwell).