Jehová Diospa llaqtanpiqa askha warmikunan Diosmanta yachachinku. Bibliaqa Diospa gobiernonmanta askha warmikuna willasqankumantan rimashan. Biblian nin: “Jehová Diosmantan kamachikuyqa jamun. Allin willakuykunata willaq warmikunaqa askhan kanku”, nispa (Salmos 68:11).

Jehová Diospa testigon warmikunaq ruwasqankuqa jujniraymi juj religionkunapi warmikunaq ruwasqankumantaqa. ¿Imaynapin jujniray?

Iglesiakunapi umalliq warmikunaqa religionninkupi runakunatan yachachinku. Jehová Diospa testigon warmikunan ichaqa mana iñiq t’aqapichu yachachinku, aswanpas paykunaqa jawapi predicaspa lliu tarisqanku runakunamanmi yachachinku, jinallataq wasin-wasinta rispa.

Chaymantapas juj religionkunapi umalliq warmikunaqa iñiq t’aqankutan umallinku yachachinkupas. Jehová Diospa testigon warmikunan ichaqa mana jayk’aqpas iñiq t’aqapiqa yachachinkuchu, sichus bautizasqa qharikuna chaypi kashanku chayqa. Iñiq t’aqapiqa umalliqkunallan yachachinku, yachachinankupaq nombrasqa qharikuna (1 Timoteo 3:2; Santiago 3:1).

Bibliaq willasqanman jinaqa iñiq t’aqapiqa qharikunallan yachachinku. Chaytan apóstol Pabloqa willarqan iñiq t’aqapi Tito sutiyoq umalliqman. Nirqanmi: “Cretapiqa saqemurqayki [...] sapanka llaqtapi umalliqkunata churanaykipaqmi”, nispa (Tito 1:5). Chaymantataq nirqan “umalliqqa kanan mana juchachana, juj esposallayoq iman”, nispa (Tito 1:6). Apóstol Pabloqa yaqa chay jinatan kamachillarqantaq Timoteoman apachisqan cartapipas. Nirqanmi: “Pipas iñiqkuna qhawariq kayta munashan chayqa, ancha allin ruwaytan munashan. Iñiqkunata qhawariqkunan ichaqa kananku: mana juchachana, juj esposallayoq, [...] yachachinanpaq allin preparasqa ima”, nispa (1 Timoteo 3:1, 2).

¿Imaraykun qharikunalla iñiq t’aqapi umalliq kankuman? Apóstol Pablon nirqan: “Manan munanichu warmiq yachachinantaqa, ni qharita kamachinantapas, aswanpas warmikunaqa ch’inllan kananku. Adanmi ñaupaqtaqa ruwasqa karqan, chaymantañan Evaqa”, nispa (1 Timoteo 2:12, 13). Chaywanmi niwashanchis Diosqa qharikunata yachachinankupaq umallinankupaqpas churasqanta. Chaytan rikuchirqan imayna ordenpi runata kamasqanpi.

Diosta serviqkunaq umalliqninqa Jesucriston, chaymi paykunaqa ejemplonta qatikunku. Discípulo Lucaspa willasqanman jinaqa, Jesusqa llaqtan-llaqtantan purirqan Diospa gobiernonmanta allin willakuykunata willaspa. ¿Imatan discipulonkuna ruwarqanku chayta ruwanankupaq Jesús kamachiqtin? Paykunapas llaqtan-llaqtantan purirqanku jinantinpi allin willakuykunata willaspa (Lucas 8:1; 9:2-6).

Chhaynallataqmi kay tiempopas Jehová Diospa serviqninkunaqa warmipas qharipas tukuy sonqowan runakunaman willamushanku Mateo 24:14 nisqanman jina. Chaypin Jesús nirqan: “Diospa gobiernonmanta allin willakuykunan pachantinpi willasqa kanqa llapa nacionkuna yachananpaq, jinan tukukuyqa chayamunqa”, nispa.