FILIPINAS nacionpi kaq Ilocos llaqtapin 1968 watapi 10 diciembre killapi nacerqani. Chunkamanta qanchis kaq wawan karqani. Huch’uychaymantapachan católica religionpi uywasqa karqani, llapa Filipinas nación runakuna hina. 1986 watapin colegioyta tukuspa enfermera kayta munarqani. Ichaqa sinchita onqosqayraykun mana chay munasqayta aypayta atirqanichu. Chaymi Diosta tukuy sonqoymanta rogakurqani yanapawananpaq, hinaspan prometerqani: “Onqoyniymanta qhaliyachiwanki chayqa wañupunaykaman servisqayki”, nispa.

Pisi-pisimanta qhaliyasqaymantan, prometekusqayta hut’anaypaq yuyaykurqani. Chaymi 1991 watapi junio killapi Bibliata estudianaypaq pentecostal escuelaman haykurqani. Chaypin yachachiwarqanku ayunaspapas mañakuspapas llapaykichismi chaskinkichis “santo espirituta”, nispa. Chaytan ñoqaqa munarqanin onqosqakunata hampinaypaq. Huk kutinmi compañeray kunkayoqta mañakusharqan mañakunayku horapi. Hukkuna “santo espíritu” ñoqapi kasqanta yuyaykunankupaqmi mana reparachikuspalla imachus mañakusqanta uyarinaypaq qayllaykurqani. Mañakusqanta tukupaykunanpaq kashaqtinmi usqhaylla qonqorikusqay ladoman kutirinpurqani. Imachus mañakusqanmanta willaqtiytaq payqa yuyaykurqan ñoqapi “santo espíritu” kasqanta.

Chay escuelapi estudiasqayman hinan imaymanamanta iskayayta qallarirqani. Mateo 6:9 textopin Jesús willarqan “Yayamanta”, “sutinmanta”. Chaymi tapukurqani: “¿Pitaq Yayari? ¿Ima sutitataq yupaychakunanri?” nispa. Profesorniykunaq imachus yachachiwasqankutaqa manan entiendeqchu kani. Manañan imaynamantapas yuyaykuyta atiqchu kani, Trinidad nisqamantaña yachachiwaqku chaypas niwaqkun: “Manan chayta hayk’aqpas llapantaqa yachasunmanchu”, nispa. Chaywanpas estudiashallarqanin pastora kanaypaq.

Escuelaypiqa niwaqkun, llapa pantasqa religionkunamantaqa Jehová Diospa testigonkunan aswan millayqa kanku, nispa. Paykunataqa Cristoq contranpi sayaqkuna nispan sutichaqku, chaymi cheqnikurqani.

Iskay wataña chay escuelapi kashaspaymi vacacionniypi tayta-mamayta watukuq rirqani. Hinan kurak ñañay Carmen wasipi kashasqayta yacharuspa hamurqan, payqa Jehová Diospa testigonmi kapusqa tukuy tiemponwan  Diosta serviq. Diosmanta rimapayawayta munaqtinmi sinchi phiñasqa nirqani: “¡Ñoqaqa reqsiniñan servisqay Diosta!” nispa. Kunkayoqta k’amispan, tanqarparispa nirqani: “¡Ama hayk’aqpas chaymanta rimapayawankichu!” nispa.

Escuelayman kutipusqay qhepamanmi ñañay Carmen ¿Debería creer usted en la Trinidad? * nisqa folletota apachimuwarqan. Chayta rikuspay hinan q’aphñuruspa kanarurqani, ñañaywanqa phiñasqaraqmi kasharqani.

Escuelallapiraq kashaspaymi wakin runakunata yanaparqani Iglesiaypi kanankupaq. Anchatan kusikuq kani mamaypas turaypas ñoqa hina pentecostal religionpi kasqankumanta.

1994 watapin marzo killapi chay escuelapi graduakurqani. Ñawpaqpi nisqay hina pentecostal religiomanta predicaqmi visitamuwarqanku. Paypi santo espíritu kasqanta yuyaykusqaykuraykun llapaykupas paywan kayta munarqayku. Plataformaman seqaruspaykun banda tocasqanman hina saltarqayku t’aqllakurqayku. Paypa tupaykusqankunaqa espirituq atiyninwanmi pampaman urmaqku. * Ñoqata tupaykuwaqtinpas yuyayniy chinkawaqtinmi urmallarqanitaq. Manchasqaña riqch’arirqani chaypas, atiyniyoq hinan sientekurqani chaymi anchata kusichiwarqan.

Chay qhepamanmi atiyniyta rikuchirqani fiebrewan kashaq sipaschata hampispa. Mañakushaqtiy hinan chay sipaschaqa hump’iyta qallarirqan, hinaspan manaña fiebreyoqchu kapurqan. Chhaynapin Diosman prometekusqayta hunt’arqani. Chaywanpas ch’usaq sonqoyoqmi sientekurqani, yacharqaniña huk Dioslla kasqanta chaypas, manan reqsirqanichu. Hinaspapas Iglesiaypi yachachisqankumantan iskayaq kani.

Chay tiempopaqqa, astawanmi Jehová Diospa testigonkunata cheqnikurqani. Sapa kutinmi qelqankunata tarispa ruphachiq kani. Chayllamanmi mamayqa manaña munarqanchu pentecostal religionpi kayta, chaytaqa mana hayk’aqpas yuyaykurqanichu. ¡Carmen ñañaymi Bibliamanta yachachishasqa! Chaymi ñañaytaqa mana rikuytapas munaqchu kani.

Huk kutinmi ¡Despertad! revistata mamaypa wasinpi tarirqani. Chay kutipipas ruphachiymanni karqan. Ichaqa mamay imachus leesqanta yachayta munaspan leeyta qallarirqani. Leesqayman hinan tarirqani huk sumaq temata, chaypin willasharqan huk wiraqochamanta, payqa allintan iñisqa religionninpi kaq yachachikuykunapi. Ichaqa Jehová Diospa testigonkunaq qelqankunawanmi Bibliata t’aqwirisqa. Chhaynapin sut’ita entiendesqa Trinidadmanta, infiernomanta, mana wañuq almamanta yachachikuykunaqa mana Bibliamantachu kasqanta. Chayta leesqaymi sonqoyman chayarqan; chaytapunin entiendeyta munarqani. Hinaspan  astawan Bibliaq yachachisqanmanta t’aqwiriyta munarqani.

Huk ¡Despertad! revistapitaq tarirqani huk wiraqocha Bibliata estudiaspa alcohol ukyayninta drogakuyninta saqepusqanmanta. Chay willakuykunata leesqaymantan astawan Testigonkunaq qelqanta leeyta qallarirqani. Chaymantapas, tarirqanin El nombre divino que durará para siempre * nisqa folletota, chaypin yacharqani Diospa sutin Jehová kasqanta. Cheqaq Diosta reqsisqayqa anchatan kusichiwarqan (Deuteronomio 4:39; Jeremías 10:10).

Mana piqpa yachasqallanmi Bibliapi cheqaq yachachikuykunata t’aqwishallarqani. Pentecostal escuelapiqa “Jesusqa Diosmi” nispan yachachiwarqanku. Bibliapin ichaqa yacharqani Jesusmanta kay nisqanta: “Qanqa kawsaq Diospa Churin Criston kanki”, nispa (Mateo 16:15, 16).

Ñañay Carmenwan hukmanta tupaspan, askha qelqakunata mañakurqani hukninmi El nombre divino que durará para siempre nisqa folleto karqan, payqa musphasparaq qhawawarqan. Askha watakunaña pentecostal escuelapi kasharqani chaypas, manan cheqaq kaqtaqa yachachiwarqankuchu. Tutayaqpi hinan sientekurqani. Sonqoypin ichaqa ancha kusisqa sientekurqani Bibliamanta yachashasqayrayku. Ñoqapin hunt’akusharqan Jesuspa kay nisqan: “Cheqaqkaqtan reqsinkichis, chay cheqaqkaqtaqmi kacharichisunkichispas”, nispa (Juan 8:32). Chayraqpas kawsayta qallarishayman hinan sientekurqani.

Huk tiempon yuyaykurqani pakallapi Jehová Diosta yupaychaspa pastora hina llank’ayniytapas aparishanallaypaq. Ichaqa chay qhepallamanmi repararqani Iglesiaypi askha yachachikuykunata manaña yachachinaypaq. Ichaqa manchakurqanin chaymi tapukurqani: “¿Imawanmi kawsasaq Iglesiayta saqespa?” nispa. Manan munarqanichu Iglesiayta p’enqayman churayta, pastora kashaspa Jehová Diospa testigonman tukupuspa. Chaymi decidikurqani plataformamanta yachachishanallaypaq, ichaqa pantasqa yachachikuykunataqa manaña rimanaypaq.

Wakmantan ñañay Carmenwan tupallarqanitaq, chay kutipin kallpachawarqan Testigokunaq huñunakuyninman rinaypaq. Laoag llaqtapi kaq Iglesiaymanmi sapa kutilla rinay karqan. Chayman viajaspan mana piqpa yachasqallan Jehová Diospa testigonkunaq Huñunakunanku Wasita rirqani. Chaypin Alma Preciosa Villarin sipasta reqsirqani payqa Diospaq tukuy tiemponwan llank’aqmi kasqa, ichaqa llapankun Precious nispa sutichaqku (inglés rimaypi Preciosa). Cheqnikurqaniña  Testigokunata chaypas, paywan Bibliata estudianaypaqmi decidikurqani.

Ñañayqa pacienciawanmi tratawarqan, Preciouspas kaqllataqmi karqan. Anchatan Biblia entiendenaypaq yanapawarqan phiñakuqña, kutipakuqña, kunkawan rimaqña karqani chaypas, hinaspapas ñawpaq creenciaykunatan defiendeq kani. Preciouspas huk testigokunapas ñoqapi interesakusqanku, huch’uyyaykukuq, samp’a kasqankun anchata yanapawarqan. Chaymi Jehová Diosta serviyta munarqani.

1995 watapin julio killapi reparakurqani Iglesiayta saqepunaypaq. ¿Imarayku? Apocalipsis 18:4 textopin llapa pantasqa religionkunamanta nin: “Llaqtalláy, chay llaqtamanta lloqsipuychis, ama huchallikuqmasin kanaykichispaq, amataq manchay ñak’arichisqa-masin kanaykichispaqwan”, nispa; ichaqa pastora kasqayta saqespa, ¿imamantan kawsayman karqan? Hebreos 13:5 textopin yacharqani Jehová Dios kay prometesqanta: “Manan saqerparisqaykichu, manataqmi wikch’urparisqaykipaschu”, nispa.

Contraypiña papaywan turaywan kasharqanku chaypas, iskay semanallaña Testigo hina bautizakunaypaq kashaqtinmi, kallpata hap’ispa wasiyman rirqani pastora hina utilizasqay cosaskunata ruphachinaypaq. Chay qhepamantaq ñoqapi kaq atiy chinkapurqan. Manaraq chayta ruwashaqtiyqa puñushaqtiymi imapas ñit’iykuwashanman hina sientekuq kani, chaykunapas chinkapurqanmi. Chaymatapachan manaña hayk’aqpas ventanaypi llanthukunatapas rikurqanichu. Bibliapin yacharqani hampinaypaq atiy chaskisqayqa mana Diosmantachu kasqanta, aswanpas millay espiritukunamanta. Anchatan kusikuni chaykuna saqesqaymanta, imaynan apóstol Pablo huk sipasta ‘watuq espiritumanta’ kacharichirqan hinata (Hechos 16:16-18).

Anchatan kusikurqani 1996 watapi setiembre killapi mamaywan kuska bautizakusqaymanta. Pisi tiempomantaqa tukuy tiempoywanmi Diosta servirqani, chay ruwasqayqa anchatan kusichiwarqan.

Kunanqa Silver qosaywanmi kallpachakuyku Bibliamanta cheqaq kaqta wawaykuman yachachinaykupaq. Kinsa ñañaykunapas Testigon kapunku. Sonqoyqa nanawanraqmi unay watakuna Diosmanta mana yachasqaymanta, chaywanpas ancha kusisqan kashani servisqay Diosta reqsispa.