WAKIN runakunan tentacionkunata munapayanku. Wakintaqmi imaymanata ruwanku ayqenankupaq. ¿Qanri ima ninki? ¿Ayqenachu icha munapayanachu?

Wakin tentacionkunaqa manan sasachakuykunatachu apamun. Huk galletata munapayaspa mikhurunki chayqa manan imanasunkipaschu. Ichaqa qhelli ruwayta munapayaspa chayta ruwanki chayqa hatun sasachakuykunapi rikukuwaq. Proverbios 6:32, 33 textopi nisqan hina wasanchay huchata ruwaqqa mana yuyayniyoqmi, llakipitaq tarikunqa.

¿Imatan ruwawaq tentacionpi tarikuspa? Biblian nin: “Diosqa munanmi paypaq hina ch’uyatapuni kawsanaykichista. Chayrayku, ama pipas qhelli huchapi kawsaychischu”, nispa (1 Tesalonicenses 4:3). Chayta ruwananchispaqmi kinsa ruwaykuna yanapawasun.

Qhelli ruwaykunata qhawayqa mana allin ruwaykunata munapayachiwasunman. Jesuspas chayta sut’ita nirqan: “Pipas huk warmita munapakuspa qhawaqqa ñan sonqonpi chay warmiwan wasanchay huchata ruwanña. Chayrayku, paña ñawiykichus huchaman urmachisunkiman chayqa, horqokuspa wikch’uy”, nispa (Mateo 5:28, 29). ¿Imatan Jesús chay nisqanwan yachachisharqan? Tentacionkunaman mana urmanapaqqa decidisqan kashananchis, manataqmi ni huk ratollapas qhelli ruwaykunata qhawananchischu.

Sichus huk runaq soldasqan k’anchayta rikuwaq chayri, ¿qhawallawaqchu? Manan riki, aswanpas  huk ladoman qhawarinki otaq ñawiykita tapakunki. Chhaynallatataqmi huk ladoman qhawarinayki qhelli ruwayta periodicopi, televisionpi, hukkunapipas rikuqtiyki. Amapuni yuyayniykita qhellichaychu. Juanmi qhelli ruwaykunata qhawarqan, paymi nin: “Sumaq rikch’ayniyoq sipasta rikuspaymi askha kutita qhawapayayta munaq kani, ichaqa huk ladoman qhawaspa nikuni: ‘¡Jehová Diosman kunallan mañakuy!’, nispa. Chay qhepamanmi manaña munanichu qhawayta”, nispa (Mateo 6:9, 13; 1 Corintios 10:13).

Jobpa nisqanta yuyariy, paymi nirqan: “Ñoqa kikiymi allintapuni yuyaykurqani soltera sipaskunatapas mana munapayanaypaq”, nispa (Job 31:1). Qanpas decidikuy chayta ruwanaykipaq.

Kaytan ruwawaq: Hayk’aqllapas qhelli ruwayta rikunki chayqa huk ladoman qhawariypacha. Chaymantapas Salmo librota qelqaq hina Diosmanta mañakuy: “Hark’aykuway ama yanqa kaqkunata qhawanaypaq”, nispa (Salmo 119:37).

Pantaq runa kasqanchisraykun mayninpi mana allin munapayaykuna hamuwasun. Biblia willan: “Pipas kikinpa millay munayninwan aysachikuspa sonqontapas suwachikun, chaymi wateqasqa-kayqa. Chay millay munaymi saphichakuspa huchata paqarichin”, nispa (Santiago 1:14, 15). ¿Imatan ruwasunman millay munapayaykuna yuyayninchisman hamuqtin?

Qhelli ruwaykuna yuyayniykiman hamusunki chayqa qanllan decidiwaq ima ruwayta. Yuyayniykimanta wikch’uy. Mana chayqa aswan sasa kanqa horqonaykipaq. Tomasmi Internetpi qhelli ruwaykunata qhawarqan, paymi nin: “Sasaña karqan chaypas kallpachakurqani qhelli ruwaykunata yuyayniymanta horqonaypaq, chaypaqmi allin kaqpi yuyaykurqani. Chaywanpas yuyaykusharqaniraqmi qhelli ruwaykunapi, pisi-pisimanta ichaqa manaña”, nispa. Elsan, sipas kashaspa  sapa kutilla tentacionpi mana urmananpaq kallpachakurqan, paymi nin: “Iskay ruwaymi yanapawarqan: imaymana ruwanayoq kasqay, Jehová Diosmanta mañakusqay ima”, nispa.

Kaytan ruwawaq: Qhelli ruwaykuna yuyayniykiman hamun chayqa kaqpacha Diosmanta mañakuy. Biblian niwanchis: “Tukuy cheqaqkaqpi, tukuy allinkaqpi, tukuy chaninkaqpi, tukuy ch’uyakaqpi, tukuy sumaqkaqpi, tukuy allin qhawarinapaq kaqpi yuyaychis, ima allinpas yupaychanapaq hina kanmanraq chayqa, chaykunapi yuyaychis”, nispa (Filipenses 4:8).

Sichus pipas qhelli ruwayta munapayan, hinaspa tentasqa kanman, manataq pipas rikushanmanchu chayqa urmanmanmi huchaman (Proverbios 7:6-23). ¿Imatan ruwawaq chhaynapi mana tarikunaykipaq?

Biblian niwanchis: “Yuyayniyoqqa mana allin kaqtan reparan hinaspan pakakun, pisi yuyayniyoqkunan ichaqa pasallanku hinaspan k’irisqa rikukapunku”, nispa (Proverbios 22:3). Chaymi ñawpaqmantapacha qhawarinayki imakuna tentacionman apasunkiman, hinaspa chaykunamanta ayqenayki (Proverbios 7:25). Felipe qhelli ruwaykunata manaña qhawanñachu. Paymi nin: “Computadoratan llapa rikusqanpi churarqani, huk programatawan instalarqani qhelli mensajekuna mana rikhurinanpaq. Wasipi pipas kallaqtinmi Internetman haykuni”, nispa. Tomaspas nin: “Sichus peliculapi qhelli ruwaykuna kan chayqa mana qhawanichu, qhelli ruwaykunamanta rimaqkunamantapas karunchakuni. Chhaynapi mana tentasqa tarikunaypaq”, nispa.

Kaytan ruwawaq: Sut’illanta qhawarikuy imaynachus kasqaykita, hinaspa ñawpaqmanta yuyaykuy imakunas tentacionman apasunkiman chaykunata, chhaynapin atinki chaykunamanta ayqeyta (Mateo 6:13).

Sichus hukmanta tentacionman urmarqanki chayqa, ama pisipaychu kallpachakushallay. Biblian nin: “Qanchis kutitaña chanin runa urmanqa chaypas, payqa sayaripullanqapunin”, nispa (Proverbios 24:16). Taytanchisqa yanapaytan munawanchis. Chay yanapayninta chaskinaykipaqqa Paymanta mañakushallay, Bibliata leespa iñiyniykita wiñachiy, huñunakuykunapas yanapasunkin. Diosmi prometewanchis: “Ñoqan kallpachasqaykipas yanapasqaykipas”, nispa (Isaías 41:10).

Qallariypi Carlosmanta rimarqanchis, paymi nillantaq: “Qhelli ruwaykuna qhawayta saqenaypaqqa manan facilchu karqan. Yapa-yapamanta qhawashallarqanin, Jehová Diospa yanapayninwanmi ichaqa atiparqani”, nispa. Jorgepas nillantaqmi: “Chay sipaswanqa puñuymanmi karqan, ichaqa kallpata hap’ispa ‘manan’ nirqani. Allin concienciayoq kayqa allinmi. Chay ruwasqaymantaqa Jehová Diosqa anchatachá kusikurqan”, nispa.

Sichus kallpachakunki tentacionkunata atipanaykipaq chayqa, Jehová Diosmi kusikunqa chay ruwasqaykiwan (Proverbios 27:11).