Sapa watanmi millonninpi runakuna navidadta festejanku. Chay p’unchaypin wakinqa familiankuwan amigonkuwan huñunakunku, hukkunataq Diosta yuyarispa necesitaqkunata yanapanku. Allinkunataña chay p’unchaypi ruwanku chaypas, chay fiestaqa mana allin ruwaykunawanmi chhaqrusqa kashan.

Askhan ninku: “Navidadpin Jesuspa nacesqan p’unchayta yuyarikun”, nispa. Ichaqa ñawpa tiempomanta yachaq askha runakunan ninku Jesuspa ima p’unchaypi nacesqantaqa mana yachakusqanta. Huk libron nin: “Ñawpa tiempopi cristianokunaqa manan hayk’aqpas rimarqankuchu Jesús ima p’unchaypi nacesqanmanta”, nispa. ¿Imarayku? Manan chhaqrukuyta munarqankuchu “ñawpa tiempopi pantasqa religionkunapi costumbrekunawan”. Hinaspapas Jesusqa manan hayk’aqpas paypa hukkunaq cumpleañontapas festejarqanchu. Aswanmi qatikuqninkunata kamachirqan wañupusqan p’unchayta yuyarinankupaq (Lucas 22:19).

Chaymantapas investigaq runakunan ninku: “Navidad fiestapi ruwaykunaqa ñawpa tiempopi pantasqa religionkunaq costumbrenkunawanmi chhaqrusqa kashan. Wakinmi kaykuna: navidadpi adornasqa sach’akuna, regalokuna, velakuna, takikuna, Papa Noel, mikhuykuna ima”, nispa. Católica religionmanta willaq libron nin: “Pisillan yachanchis navidadpi regalo qoy, wasikunaq iglesiakunaq punkunpi churakusqan coronakunapas pantasqa religionkunapi costumbrekunawan tupasqanta”, nispa (The Externals of the Catholic Church).

Yaqapaschá nishanki: “Chay costumbrekunawanña chhaqrusqa kashan chaypas allillanmi navidadta festejayqa”, nispa. Ichaqa, ¿ima ninmi Dios? Chaypaq qhawarisun ñawpa tiempopi munayninkuman hinalla Diosta serviq runakunaman nisqanta, nirqanmi: “Millakunin fiestaykichiskunataqa [...] Karunchawaychis askhallaña takiyniykichiskunata”, nispa (Amós 5:21, 23).

¿Imaraykun Dios chayta nirqan? Chay tiempopiqa rey Jeroboammi Israelpi kamachikusharqan. Paymi iskay qori torillokunata ruwachispa, hukninta Betel llaqtapi churarqan huknintataq Dan llaqtapi. Runakunatan kamachirqan Jerusalén llaqtaman rinankutaqa, chay llaqtakunallapiña Diosta yupaychanankupaq. Hinaspapas huk fiestakunatan paqarichirqan, munasqan runakunatataq akllarqan sacerdote kanankupaq (1 Reyes 12:26-33).

Israel runakunaqa Diosta yupaychanankupaqmi chay fiestakunata ruwarqanku. Jehová Diosmi ichaqa willachirqan chay ruwasqanku mana allin kasqanta. Unay watakuna qhepamanmi nirqan: “Señor Diosmi kani, kaqllapunin kashani”, nispa (Malaquías 3:6). Arí, kunanpas Jehova Diosqa kaqllatan yuyaykun. Chhaynaqa, ¿ima ninmantaq navidad fiestapi costumbrekunamanta?

Chaykunata yachaspan askha runakuna mana navidadta festejankuchu. Ichaqa huk p’unchaykunapin tiempota t’aqanku familiankuwan amigonkuwan huñunakuspa kusirikunankupaq, hukkunaman regalota qoykunankupaq ima.