Askha runakunan ninku: “Mana allin ruwaytan nikun ‘Saqra’”, nispa. Chhayna kaqtinqa, ¿imaraykutaq Biblia willan Jesuswanpas Dioswanpas rimasqanta? Chaymantan kunan yachasun.

Jesuspa bautizakusqan qhepallamanmi Saqra kinsa kutita Jesusta tentarqan. Ñawpaqtan nirqan: “Kay rumikunata niy t’antaman tukunanpaq”, nispa. Chaytaqa nisharqan Diosmanta atiy chaskisqanwan munaynillanta ruwananpaqmi. Chaymantan nirqan: “Kay ukhuman saltaykuy”, nispa. Chaytaqa nisharqan runakunawan admirachikunanpaqmi. Qhepamantaq nirqan: “Qonqoriykukuspachus yupaychawanki chayqa, lliw kaykunatan qopusqayki”, nispa. Jesusmi ichaqa mana urmarqanchu chay tentacionkunaman, Diospa simin qelqawantaqmi kutichirqan (Mateo 4:1-11; Lucas 4:1-13).

¿Piwanmi Jesús rimasharqan? ¿Sonqon ukhupi mana allin kaqwanchu? Manan. Bibliaq nisqan hina, pruebakunapiña tarikurqan chaypas, Jesusqa manan hayk’aqpas huchallikurqanchu (Hebreos 4:15). Arí, “payqa manan huchallikurqanchu, manataqmi pitapas q’oturqanchu” (1 Pedro 2:22). Payqa ch’uya runan karqan hunt’aq sonqowantaqmi Taytanta servirqan, chaymi paypa sonqonpiqa manapuni mana allin kaqqa kanchu. Chhaynaqa, ¿piwantaq rimasharqan? Saqrawanmi.

¿Imakunan rikuchillantaq Saqra cheqaqpuni kasqanta? Chaypaq kaykunapi reparasun:

• Ñawpaqpi yachasqanchis hina Saqraqa yupaychachikunanraykun, kay pachapi atiyta qhapaq kaytawan Jesusman munachirqan (Mateo 4:8, 9). Sichus Saqra mana kanmanchu chayqa, ¿pitaq chayta ninman karqan? Hinaspapas Jesusqa manan negarqanchu Saqra kay pachapi atiyniyoq kasqanta.

• Jesuswan rimayta tukuspan Saqraqa “huk kutikama” ripurqan (Lucas 4:13). Huk kutikama ripusqanmi rikuchin Saqra cheqaqpuni kasqanta.

• Chay qhepamanmi ‘angelkuna hamuspa’ Jesusta kallpacharqanku yanaparqanku ima (Mateo 4:11). Chay ruwasqankun rikuchirqan angelkunaqa cheqaq espiritukuna kasqankuta, Saqrapas paykuna hinallataqmi.

Kunanqa yachasun Job runaq tiemponpi sucedesqanmanta. Chay kutipin Jehová * Diosqa Saqrawan iskay kutita rimarqan. Diosqa sumaqtan rimarqan Job runamanta. Saqran ichaqa Jobmanta kay hinata nirqan: “Interesraykullan Diosta servin”, nispa. Diostapas nirqanmi: ‘[Servichikunaykiraykun] lliw ima ruwasqantapas saminchashanki’, nispa. Hinan Diosqa hinallata qhawarqan Jobpa kaqninkunata Saqra qechunanta, wawankunata wañuchinanta, onqochinantapas. Ichaqa qhepamanmi sut’ita yachakurqan Saqra llulla kasqanta, Jobtaq bendecisqa karqan hunt’aq kasqanmanta (Job 1:6-12; 2:1-7).

¿Piwanmi Jehová Dios rimasharqan? ¿Sonqon ukhupi mana allin kaqwanchu? Manan. Biblian nin: “Diospa ñanninqa chaninpunin”, nispa (2 Samuel 22:31). Nillantaqmi: “Ch’uyay-ch’uya, ch’uyapunin Tukuy-atiyniyoq Señor Diosqa”, nispa (Apocalipsis 4:8). Chaypin sut’ita yachanchis Jehová Diospi manapuni ima mana allinpas kasqanta.

Wakin runakunan ninku: “Job runaq tiemponpi sucedesqanqa cuentollan”, nispa. ¿Cuentollachu kanman? Manan. Santiago 5:7-11 textopi willasqanmi rikuchin Job cheqaqpuni kasqanta. Chay textopin llapa cristianokunata kallpachashan ima pruebapiña tarikuqtinkupas Job hina hunt’aq sonqo kanankupaq, aguantasqankumanta bendicionkuna chaskinankumantawan. Sichus Jobmanta willakuy cuentolla kanman chayqa, manachá pitapas chay textopi nisqan kallpachanmanchu. Hinaspapas Ezequiel 14:14, 20 texton willashan Daniel, Noé, Job runamantawan. Chaymi rikuchillantaq Job cheqaqpuni kasqanta. Chay hinaqa sasachayman churaq Saqrapas cheqaqllataqmi.

Qhawarisqanchis hina Bibliaqa sut’itan willan Saqra cheqaqpuni kasqanta. Chayta yachaspa yaqapaschá tapukushanki: “¿Dañota ruwawanmanchu?”, nispa.

¿Iman sucedenman llaqtaykiman millay runakuna hunt’aykamuqtin? Mana allin ruwaykunan astawan yapakunman, runakunapas aswan millaytan kawsankuman. Kunanqa kaypi yuyaykuy, ¿iman sucedenman Saqra, payta qatikuq millay angelkunapas kay pachaman hamuqtinku? Chay tapuyta kutichinapaq qhawarisun kay pachapi kawsay imayna kashasqanta.

• Maytaña autoridadkuna kallpachakunku millay kawsayta tukuchinankupaq chaypas, astawanmi yapakushan.

• Askha tayta-mamakunaña mana munankuchu wawanku espiritismo nisqa ruwaykunawan pukllanankuta chaypas, astawanmi chaykuna paqarimushan.

• Imaymanataña runakuna ruwanku wayrapas, unupas, hukkunapas mana qhellichakunanpaq chaypas, astawanmi qhellichakushan.

• Chaykunan sut’ita rikuchin huk millay espíritu runakunata mana allinman apashasqanta.

Biblian sut’ita willan pi kasqanta, ninmi: “Hinan chay hatun dragonqa angelninkunantin kay pachaman wikch’uykamusqa karqan. Paymi ñawpa mach’aqway, saqra, Satanás nisqa karqan. Paymi kay pachantinta q’otuspa pantachin. [...] ¡Ay, imaynaraqmi kankichis kay pachapi lamar-qochapi tiyaqkuna! Saqran qankunaman uraykamun, sinchi phiñasqan kashan, tiempoqa pisillaña kananta yachaspa”, nispa (Apocalipsis 12:9, 12). Chaykunata yachaspan askha runakuna reparanku Saqraqa sinchi millay kasqanta, runakunata millay ruwaykunaman tanqashasqantapas.

Manan mayqenninchispas munasunmanchu chay millay espirituq makinpi kaytaqa. Chhaynaqa, ¿imaynatan paymanta cuidakusunman? Kunanqa chaymantañataq yachasun.