Imatapas ruwanapaqqa ñawpaqtan tapukunchis: “¿Chay ruwasqaymanta ima allinkunan ñoqapaq kanqa?”, nispa. ¿Huchachu kanman Diosmanta mañakunapaq chay hinata tapukuy? Manan huchachu. Llapanchispas yachaytan munanchis Diosmanta mañakuy imapi yanapawasqanchista.

Qhawarisqanchis hina Diosmanta mañakuyqa manan llakikuyninchista pisiyachinallapaqchu, nitaq religionkuna yachachisqanraykullachu mañakunchis. Sichus allin kaqllata, Jehová Diospa munayninman hinataq mañakusun chayqa uyariwasunmi. Hinaspapas Diospunin munan payman asuykunanchista (Santiago 4:8). Chay hinaqa, ¿ima allinkunatan chaskisun sapa kuti mañakusqanchismanta? Chaymanta kunan yachasun.

Sinchi sasachakuypi tarikuspaqa nishutan llakikunchis. Biblian niwanchis: “Diosmantaqa mañakushallaychispuni”, “tukuy ima necesitasqaykichistapas Diosmanta mañakuychis”, nispa (1 Tesalonicenses 5:17; Filipenses 4:6). Diospa yanapayninta mañakuqkunatan Biblian nin: “Diosqa thak-kayta qosunkichis runakunaq mana aypay atisqan thak-kayta, chay hinapin sonqoykichistapas yuyayniykichistapas [...] Diosqa waqaychanqa”, nispa (Filipenses 4:7). Tukuy llakikuyninchista hanaq pacha Taytanchisman willaqtinchisqa thakmi sientekusun. Bibliapunin kallpachawanchis chayta ruwanapaq, ninmi: “Señor Diosman llakipakuyniykikunata saqey, paymi qaqata sayachisunki”, nispa (Salmo 55:22).

 Millonninpi runakunan thak sientekunku Diosmanta mañakuspa. Corea del Sur nacionmanta Hee Ran señoran nin: “Imaymana llakikuypin tarikuni, chaywanpas Diosmanta mañakusqay qhepamanmi llasa q’epiypas pisiyashanman hina sientekuni”, nispa. Filipinas nacionmanta Cecilia señorapas ninmi: “Ususiykunatan cuidanay hinaspapas mamaymi onqorapun, manañan ñoqatapas reqsipuwanchu, chaymi paytapas cuidanay. Diosmanta mañakusqaymi yanapawan paykunata cuidanaypaq. Ñoqaqa yachanin Jehová Dios paykunata cuidaypi yanapawananta”, nispa.

Llakisqa kaspa, wañuy patapi otaq llakipi tarikuspa Diosmanta mañakunki chayqa Diosmi kallpachasunki. Biblian nin: ‘Diosmi tukuy llakikuyninchispi sonqochawasun’, nispa (2 Corintios 1:3, 4). Huk kutinmi Jesús sinchi llakisqa kaspa,  ‘qonqoriykukuspa Diosmanta mañakurqan’. Hinan “hanaq pachamanta huk ángel rikhurimurqan payta kallpachananpaq” (Lucas 22:41, 43). Nehemiaspas Dios sonqo runan karqan, paytapas millay runakunan amenazarqanku Diospa munayninta amaña ruwananpaq. Chaymi payqa mañakurqan: “Diosnilláy, kallpachaway llank’anaypaq”, nispa. Chay qhepamanmi Diospa yanapayninwan mana manchakuspa llank’ananta tukurqan (Nehemías 6:9-16). Ghana nacionmanta Reginald sutiyoq runan nin: “Sinchi llakipi tarikuspan Diosmanta mañakuni. Hinan yanapawananpaq kallpachawananpaq atiyniyoq runawanpas parlashayman hina sientekuni”, nispa. Arí, Diosmanta mañakuqtinchisqa kallpachawasunmi.

Ima decidisqanchispas familianchistawanmi afectan. ¿Iman yanapawasunman allinta decidinapaq? Biblia nin: “Mayqenniykichispas pisi yachayniyoq kashan chayqa, mana phiñarispa lliwman askhatapuni qoq Diosmanta mañakuchun, hinan Diosqa payman yachayta qonqa”, nispa (Santiago 1:5). Sichus Diosmanta yachayta mañakusun chayqa, Diosmi santo espiritunta qowasun imatapas yachaywan decidinanchispaq. Jesusmi nirqan: “Yayaykichisqa mañakuqninkunaman Santo Espiritunta qonqa”, nispa (Lucas 11:13).

Kikin Jesuspas Diospa yanapaynintan mañakurqan imatapas allinta decidinanpaq. Huk kutinmi “tutantin Diosmanta mañakurqan” 12 apostolninkunata akllananpaq (Lucas 6:12).

Jesús hinan kunanpas askha runakuna Diospa yanapayninwan allinta imatapas decidinku. Filipinas nacionmanta Regina sutiyoq señoran imaymana sasachakuykunapi tarikurqan. Qosanpa wañupusqan qhepamanmi, ususinkunata paylla uywanan karqan, hinaspapas llank’anamantan wikch’umurqanku. ¿Iman payta yanaparqan? Paymi nin: “Jehová Diosmantan mañakuni yanapawananpaq”, nispa. Ghana nacionpi Kwabena sutiyoq runapas Diospa yanapaynintan sapa kuti mañakun, paymi nin: “Contruccionpi allin llank’anayoq kashaqtiymi wikch’upuwarqanku. Chaymi Diosta mañakurqani imapi llank’anaytapas allin yuyaywan decidikunaypaq. Kunanqa huk llank’anayoqmi kani, tukuy necesitasqaymi kapuwan kantaqmi tiempoy Diosta servinaypaq. Diospunin yanapawan imatapas allinta decidenaypaq”, nispa. Dioswan allinpi kayta munaspa imatapas mañakunki chayqa, yanapasunkin.

Diosmanta mañakuyqa hukkunapipas yanapasunkimanmi (leey “ ¿Imakunapin Diosmanta mañakuy yanapawanchis?” nisqa recuadrota). Ichaqa mañakusqaykita Dios uyarinasuykipaqqa, Diosmanta promesanmanta iman astawan yachanayki. Yaqapaschá huk Testigota niwaq Bibliamanta yachachinasuykipaq. * Chay hinapin ‘mañakusqata uyariq’ Diosman asuykunki (Salmo 65:2).