Askha runakunan ninku: “Yanqapaqmi mañakuni, manan pipas uyariwanchu”, nispa. Hukkunan ninku: “Diosqa manan kutichimuwanchu mañakusqayman”, nispa. Diospi mana creeq runan nirqan: “Huk kutinmi Diosmanta mañakurqani, ichaqa manan ima nispallapas kutichimuwarqanchu”, nispa.

Ichaqa Diosqa uyariwanchismi. Ñawpa tiempopin Israel llaqtata huk profeta nirqan: “Diosqa anchatan khuyapayasunkipacha, waqyakuqtiyki hinan kutichimusunkipacha”, nispa (Isaías 30:19). Huk textopin nillantaq: ‘Chanin runa mañakuqtinmi [Dios] kusikun’, nispa (Proverbios 15:8).

Bibliaqa willallantaqmi runakunaq mañakusqanman Diospa kutichimusqanta. Huk kutinmi Jesusqa “qaparispa waqaspa wañuymanta payta qespichiy atiq Diosmanta mañakuspa rogakurqan, hinan Diosqa uyarirqan”. Chaymi Diosqa kawsarichirqan (Hebreos 5:7). Huk ejemplokunatan tarillawaqtaq Daniel 9:20, 21; 2 Crónicas 7:1 textokunapi.

Chhaynaqa, ¿imaraykun wakin runakuna ninku: “Diosqa manan uyariwanchu”?, nispa. Jehová * Dios uyariwananchispaqqa, payllamantan mañakunanchis. Manan wañupuqkunamanta nitaq wak dioskunamantachu mañakunanchis. Hinaspapas Diosqa munanmi paypa “munayninman hina” mañakunanchista. Chayta ruwasun chayqa, uyariwasunmi (1 Juan 5:14). Chaypaqmi ichaqa Diosta reqsinanchis kamachikusqantapas kasukunanchis.

Askha runakunan reparanku Diospa uyarisqanta. Kenia nacionmanta Isaac runan nin: “Diosmantan mañakurqani Bibliapi leesqayta entiendenaypaq. Chay qhepallamanmi huk runa wasiyman hamurqan, hinaspa yanapawarqan Bibliata entiendenaypaq”, nispa. Filipinas nacionmanta Hildan manaña munarqanchu cigarro fumayta. Askha kutipin saqepuyta munarqan, ichaqa manan atirqanchu. Hinan qosan kallpacharqan Diospa yanapayninta mañakunanpaq. Hilda nin: “Diosmanta mañakusqay qhepamanmi repararqani yanapayninta. Manañan cigarro fumayta munarqaniñachu. Chaymantapachan fumayta saqepurqani”, nispa.

Diospa munayninman hina imatapas mañakusun chayri, ¿uyariwasunmanchu?