Jehová Diosmi gobiernontaqa paqarichiran. Janaq pachapin chay gobiernoqa kashan, chaymi Biblia sutichan “janaq pacha gobierno”, nispa (Marcos 1:14, 15; Mateo 4:17). Diospa gobiernonqa llapan gobiernokunamantapas aswan allinmi.

•   ¿Pikunan Diospa gobiernonpi kamachikunqaku? Diosmi Jesusta ajllaran gobiernonpi rey kananpaq, paymanmi atiyta qoran kamachinanpaq, manan pi kamachikuqpas pay jina atiyniyoqqa kanmanchu (Mateo 28:18). Jesusqa allinkunata ruwananpaqmi atiynintaqa utilizan. Kay pachapi kashaspan rikuchiran khuyapayakuq, confianapaq jina kasqanta (Mateo 4:23; Marcos 1:40, 41; 6:31-34; Lucas 7:11-17). Jesusqa Diospa yanapayninwanmi lliu nacionkunamanta runakunata ajllaran janaq pachamanta paywan kuska kay pachata kamachimunankupaq (Apocalipsis 5:9, 10).

•   ¿Jayk’a tiempon kamachikunqa? Runakunaq gobiernonqa manan wiñaypaqchu kamachin, Diospa gobiernonmi ichaqa wiñaypaq kanqa (Daniel 2:44).

•   ¿Pikunatan kamachimunqa? Diospa gobiernonpiqa payta kasukuq runakunan tiyanqaku, may nacionmantaña kanku chaypas (Hechos 10:34, 35).

•   Diospa gobiernonpi leykuna. Diospa gobiernonpi leykuna otaq kamachikuykunaqa manan mana allin ruwaykunallatachu prohiben; aswanpas runakunatan yanapan allinta kausanankupaq. Ejemplopaq, Biblian nin: “‘Jehová Diosniykitan munakunki tukuy sonqoykiwan, tukuy almaykiwan, tukuy yuyayniykipiwan’. Chaymi ñaupaq kaq aswan jatun kamachikuyqa. Chay kamachikuy jina iskay kaq kamachikuytaq kay: ‘Runamasiykitan munakunki qan kikiykita jina’”, nispa (Mateo 22:37-39). Diospa gobiernonta kasukuqkunaqa Diosta runamasinkutapas munakusqankuraykun lliupaq allin kaqta ruwapunku.

•   Allintan lliu runata yachachinqa. Diospa gobiernonqa allin kamachikuykunata qosqanmantapas yachachinmi chay kamachikuykunata imayna junt’ayta (Isaías 48:17, 18).

•   ¿Imapaqmi Dios gobiernonta paqarichiran? Kay pacha gobiernokunaqa qhapaqyayta munaspan runakunamanta qolqeta ch’utinku. Diospa gobiernonmi ichaqa mana chhaynachu. Diosqa munayninta ruwachinanpaqmi gobiernontaqa paqarichiran. Chaymi munay paraisota qonqa pay sonqo runakunaman (Isaías 35:1, 5, 6; Mateo 6:10; Apocalipsis 21:1-4).