Manan, Bibliaqa manan yachachinchu “Mariaqa Diospa mamanmi” nispaqa nitaq “Mariata adorana” ninpaschu. a Kaypi piensay:

•   Maríaqa manan jayk’aqpas niranchu “Diospa mamanmi kani” nispaqa. Aswanpas Bibliapiqa nishanmi: Mariaqa Diospa churinpa mamanmi, nispa (Lucas 1:32, 35).

•   Jesusqa manan jayk’aqpas niranchu: “Mariaqa Diospa mamanmi, adorananchismi”, nispaqa. Juj kutinmi juj warmi Jesusta niran: “Kusisqa kachun onqokuqniyki warmiqa”, nispa. Jesustaq ichaqa niran: “Manan, aswanpas Diospa siminta uyarispa waqaychaqkuna kusisqaqa kachunku”, nispa (Lucas 11:27, 28).

•   “Diospa maman” nisqa simiqa manan Bibliapiqa rijurinchu.

•   “Janaq Pacha Reina” nisqa simin Bibliapiqa rijurishan ichaqa manan Mariamantachu rimashan, aswanpas juj pantasqa diosamantan rimashan, chaytan Diosmanta t’aqakuq israelitakuna adoraranku (Jeremías 44:15-19). Yaqapaschá kay “Janaq Pacha Reina” nisqaqa, Istar (Astarté) nisqa sutiyoq Babilonia runakunaq diosanku kanman karan.

•   Ñaupa tiempomanta estudiaq runaq nisqanman jinaqa manas Mariataqa ñaupa tiempopi cristianokunaqa jatunchaqkuchu, chayta ruwankuman karan chayqa Diosta jinapas adorashankuman jinas kanman karan, chaymi qelqasqa kashan (In Quest of the Jewish Mary), nisqa qelqapi.

•   Bibliaq nisqanman jinaqa Diosqa kallaranpunis (Salmos 90:1, 2; 93:2). Manataq qallariynin kanchu chayqa manan mamayoqqa kanmanchu. Chaymantapas Mariaqa manan Diostaqa wijsanpi apayta atinmanchu karan, Bibliaq nisqanman jinaqa Diostaqa manas janaq pachapas chaskiyta atinmanchu (1 Reyes 8:27).

Jesuspa mamanmi Mariaqa karan manan Diospa mamanchu

 Mariaqa Judea llaqtamantan karan rey Davidpa mirayninmanta (Lucas 3:23-31). Diosqa Mariata ancha sumaqta qhawariran allin iñiyniyoq, pay sonqo kasqanrayku (Lucas 1:28). Diosmi Mariataqa ajllaran Jesuspa maman kananpaq (Lucas 1:31, 35). Chay qhepamanmi Mariaqa qosan Josewan juj wawakunayoq karan (Marcos 6:3).

 Bibliaqa willanmi María Jesuspa qatikuqnin kapusqanmanta ichaqa manañan astawanqa paymanta willanñachu (Hechos 1:14).