Bullying o acoso escolarca shuj jatun problemami can. Por ejemplo, Gran Bretaña llactapi shuj estudiota rurajpica, bullying o acoso escolarmanda 40 por ciento yali jovengunaca paicunallata huañuchirishcatami noticiacunapica villarca.

 Bullyinga shujtacunata macanallaca na canllu. Caicunapashmi can:

•   Ñucanchi parlocunahuan shujcunata llaquichina. 20 huatacunata charij Celine jovenga ninmi: “Huaquin compañeracunaca ninanda llaquichij shimicunatami nin. Ñucataca shuj shuj apodocunatami churan carca. Chaitaca nunca na cungashachu. Paicunapa shimicunaca ñucataca imapapash na valinshna, llaquinaitami sintichihuan carca. Macajpi ñavi verdeyashcarapash uchallami ali tucunman” nin.

•   Shujcunata na ricunayachina. 18 huatacunata charij Haley shuti jovenga ninmi: “Ñuca compañeracunaca paicunahuan tandanajuchunga na munanllu carca. Recreo horaspi paicunahuan micungapaj munajpica, asiento tiajpipash ñami completo canchi, asiento illanmi ninmi carca. Huata enterotami huacai huacai ñucalla micun carcani” ninmi

•   Celularpi o Internetpi llullacunata nina o ciberacoso. 14 huatacunata charij Danielca ninmi: “Computadorapi huaquin shimicunatalla escribishpapash shuj personapa causaitami llaquichi usharin o hasta huañuiman apai usharin” ninmi. Ciberacosoca nali mensajecunata o pinganai fotocunata celularpi cachanapashmi can.

 Llaquichij, burlarij gentecuna imamanda tiai callarishcata huaquin razongunata ricupashunchi.

•   Paicunapashmi llaquichi tucushca. Antonio shuti jovenga ninmi: “Ñucata maltratashpa catichunga ña na aguantarcanichu. Chaimandami shujcunapash ñucata chasquichun shinallata rurai callarircani. Shinapash tiempohuanga shujcunata maltratana nali cashcatami cuenta urmarcani” nin.

•   Mal ejemplotami ricushpa causashca. ‘Ashtaca jovengunaca paicunapa taitacuna, huauquipanicuna o shuj familiacuna shujcunata maltratajta ricushpami shinallata ruran’ (Life Strategies for Dealing With Bullies, de Jay McGraw).

•   Paicunapa manllaitami pacangapaj munan. “Llaquichij o burlarij jovengunaca, huaquinbica paicuna imapapash na sirvijshna, na valinshna sintirishpami pipash ama cuenta urmachun shujcunata llaquichi callarin” (The Bully, the Bullied, and the Bystander, de Barbara Coloroso).

•   Sololla purijcunata. Amigocunata na charij jovengunaca sololla, llaquillami sintirin. Chaimandami paicunata llaquichina o burlarinaca fácil can.

•   Diferente cajcunata. Llaquichij o burlarij jovengunaca razamanda, religionmanda, shuj discapacidadmanda o shuj cosascunamandami burlarin.

•   Na seguro sintirijcunata. Burlarijcunaca picuna na seguro sintirijcunataca jaicatami cuenta japin. Chaimi paicunata fácil llaquin.

•   Paicuna imata nijpipash ama cazuichu. Kylie shuti cuitsaguca ninmi: “Llaquichij jovengunaca llaquillapacha sintirichunmi munan. Paicuna imata nijujpipash na cazujpica, aburririshpami candaca ñana molestanga” nin. Bibliapica “alipacha yachajushca runaca jarcarinmi” ninmi (Proverbios 29:11).

•   Ama vengarichu. Vengarijpica llaquicunaca ashtahuanmi miranga. Biblipica cashnami mandan: “Pipash cangunata nalita rurajpica, na chashnallata tigrachinachu capanguichi” nishpa (Romanos 12:17; Proverbios 24:19).

•   Burlarijcunamanda caruyai. Llaquijcunamanda o burlarijcunamanda caruyajpica paicunaca na llaquichingachu (Proverbios 22:3).

•   Imaguta nishpapash ali shimicunahuan parlai. Por ejemplo Bibliapica ninmi: “Aliguta parlashpa tigrachij shimica, ninanda fiñarishcatapash anchuchinmi” nishpa (Proverbios 15:1).

•   Imatapash nishpa burlarijpica ama culiraichu. Por ejemplo, gordolla cajpi pipash burlarijpica asishpa, hombrostapash cuyuchishpami cashna nita ushan: “Ari, ashata bajarinaca alimi canman”.

•   Chaimanda anchuri. 19 huatacunata charij Noraca ninmi: “Imatapash na nishpa uchalla anchurinaca aliguta pensarij cashcata, jarcarij cashcata, llaquichij jovengunashna na cashcatami ricuchin” ninmi.

•   Seguro sintiringapaj esforzari. Rita shuti jovenga ninmi: “Llaquichijcunaca nervioso, manllaihuan sintirijta ricushpami, ama seguro sintirichun imatapash rurangapaj aprovechan” nin.

•   Pimanbash villai. Shuj encuestata rurashcashnaca, ciberacosota sufrij jovengunaca huaquinbica pingaimanda (ashtahuan jaricuna), imapash pasanga nishpa manllaimandami pipamanbash na villan. Shinapash na villajpica llaquichishpami catinga. Pimanbash villajpica can charishca llaquica tucuringami.