“Sexteo” nishpaca shuj jarihuan shuj huarmihuan puñuna munaicunata charichun, pinganayai fotocunata, videocunata, nali, mapa mensajecunata escribishpa cachanatami nijun. Shuj jovenga nircami: “Cunanbica tucuicunami pihuanbash mensajecunata cachai callarishpaca jipamanga, paicunallata pinganayai, nali fotocunata cachamunlla” nishpa.

 The New York Times nishca libropica cashnami nin: Huaquin jovengunaca “Igual puñushcata jariyajungapami paipa noviopa o noviapa lluchulla fotota charingapaj munan”. Shinallata ninmi: “Huaquin jovengunaca pensanmi, paipa noviapa fotota lluchullata celularpi charijta shujcuna ricushpaca, paica shuj huarmihuan ña pacta puñushca yachunllami shina charin. Shina rurashpami jariyashca sintirin” nishpa. Shuj joven huarmica ninmi: “Lluchulla fotocunata cachashpaca pihuanbash pacta puñushcashnami sintiririn. Chaica ni vijsayu ni ima ungüipash na japinllu ninmi” nishpa.

 Lluchulla fotocunata cachanamandaca shuj jovengunaca nishcami:

•   Shina fotocunata cachashpaca pihuanbash novio tucuchunmi ayudan.

•   Lluchulla fotocunata pipash cachamujpimi, shinallata cachangapaj munarin.

 Quiquinba fotota celularpi cachajpica shujcunapashmi quiquinba fotohuanga imatapash rurai ushaman. Shinami quiquinmanda nalicachishpa shujcunaca parlai callaringa. Centro de Investigación Pew nishcapi trabajaj shuj huarmica nircami: “Shujcuna pandaimanda cachamushca fotocunata shujcunaman cachanaca facilmi” can nishpa.

 Lluchulla fotocunata cachashpaca, huaquin jovengunaca cai llaquicunapimi urmashca:

•    Lluchulla fotota cachamujpimi, chai fototallata shujcunaman cachan. Paicuna asichun nishpa.

•    Ñana noviocuna caimandami chai fototaca tucuicunaman cachan.

 ¿YACHAPASHCANGUICHU? Lluchulla fotocunata celularpi cachanaca huaquin llactacunapica pornografía infantil nishcami can. Lluchulla fotocunata cachashcamandami huaquin jovengunaca denuncia tucushca.

 Bibliapica cazarashca cashpallami pacta puñuna can ninmi (Proverbios 5:​18). Shinapash cazarashcacuna imashna causanatami Bibliapica yachachin. Chaipaca Biblia ima nijta ricupashunchi:

•   Cangunapurapica: ‘Huainayashpa causanata, tucui mapata ruranata, charijyanatalla munashpa causanaca napacha alichu. [...] Pinganayai shimicunata, napash rimana shimicunata, mapa parlocunataca na parlanachu canguichi’ (Efesios 5:​3, 4).

•   “Cai pachapajta rurachun yarichijuj munaicunataca, tucuitami huañuchinshna saquina canguichi: Huainayanata, Diospaj ñaupajpi mapayanata, nalita rurana yuyaicunata, nali munaicunata, charijyanataca na munanachu canguichi” (Colosenses 3:​5).

  Bibliapica ninmi, nara cazarashpallata pacta puñunaca jatun jucha cashcata. Shinallata ninmi, ‘tucui mapata ruranata’, ‘nalita rurana yuyaicunapashmi’ juchacuna can. Tucui mapata ruranaca Taita Diospa ñaupajpi nalipacha cashcatami ricuchin. Shinallata Taita Dioshuan amigo caitapash na usharinllu. Cutin nalita rurana yuyaicunaca, ñucanchi aicha munaicunatami rurachin. Chaicunataca napacha ruranachu canguichi. Shinapash cusahuarmi pacta puñuna nali cashcataca na nijunllu nishpa.

 Tapuripai:

•   Celularpi lluchulla fotocunata cachanaca ¿imamandata ‘mapa ruraicuna’ can?

•   Celularpi lluchulla fotocunata chasquishpaca ¿nachu pihuanbash pacta puñuna ‘munaita’ charinguiman?

•   Lluchulla fotota ricushpa, shujcunaman chai fototallata cachashpaca ¿alitachu rurajunguiman?

 Celularpi lluchulla fotocunata cachanaca ¿imamandata nali can? Chaipaca Bibliapi ima nijta ricupashun:

•   Taita Diospa ñaupapi ali ricuringapaj imata cashpapash rurangui. “Shina causashpa na pingai tucujpimi, Taita Diosca candaca alicachinga” (2 Timoteo 2:​15).

•    “Taita Diostalla tucui shunguhuan yariashpa, paipalla causana canguichi” (2 Pedro 3:​11).

 Cai textopica alita rurangapaj ninanda esforzarina cashcatami ricuchijun. Shinaca Taita Diospa ñaupajpi ali ricuringapaj esforzarishpaca nali munaicunatapashmi ñana rurangui. Shina rurashpaca ashtaca llaquicunamandami jarcaringui. Ali concienciatapash charingui (Gálatas 6:​7).

 Tapuripai:

•    Ñucaca ¿imashinata cani?

•    ¿Shujcunapapash ali canatachu mascani?

•    ¿Asichingapajlla pitapash llaquichinatachu gushtani?

•    Lluchulla fotocunata cachajpica gentecunaca ¿imatashi ñucamandaca pensanga?

•    Lluchulla fotocunata cachashcata ñuca taitamama yachaj chayashpaca ¿ñucapi confiashpa catingacha?

 SHUJ JOVENGA NINMI: “Ñucapa amigaca noviota pacallami charirca. Shuj punllaca randimandami lluchulla fotota cachashca. Nara ishcai punlla yalijpillatami na yashcapi ñuca amigapaj taitaca celularpi fotocunata ricushcarca. Chai fotocunata ricushpaca, paipa taitaca ninandami llaquirirca. Chaimi, nalita rurashcani nishpa taitahuanga parlarca. Ñuca amiga shungumanda arripintirishca cajpipash taitamamaca cunangamanmi llaquilla sintirin. Shinallata ñana paipica confianllu”.

 Huaquin jovengunahuanga ¿imata pasashca?: Lluchulla fotocunata cachanaca pinganayai, mapa ruraicunami can. Shina pinganayai fotocunata cachashpa o ricushpaca quiquinllatami nali, mapa sintiringui. Shuj jovenga ninmi: ñuca novioca celularpi lluchulla fotocunata cachamuchunmi atichirca. Chashna fotocunata cachashca jipallaca “mapa, nalimi sintirircani” nishpa.

 Lluchulla fotocunata cachashpaca, Taita Dioshuan, amigocunahuan, autoridadcunahuanbashmi nali caita ushangui. Shinaca ama llaquicunapi urmangapaca Bibliapa consejocunata ricupashun:

•   “Chairalla viñaicuna nalita ruranajujmandaca, anchurinami cangui” (2 Timoteo 2:​22).

•   “Ñuca ñavitapash, imapash yangacunatara ricunamandaca anchuchihuayari” (Salmo 119:​37).

 Bibliapa consejocunata quiquinba causaipi pactachinata pensaripai. Janet jovenhuan ima pasashcata ricupashun. Quiquinga ¿imatata ruranguiman?

 “Shuj punllaca shuj jovendami rijsircani. Randimandami celularpa numerocunata villarircanchi. Semana jipallami paica piscinaman rina ropahuanlla fotocunata cachamui nishpa mañahuarca”​ (Janet).

 Janetca ¿imata rurashpashi ali canman carca? Quiquinga ¿imatashi ruranguiman?

•  YUYAI 1: Pai mañashca fotota cachana. Tal vez pensaringuipashchari, piscinaman rijpica tucuicunami ricun. Imapash juchaca na canllu nishpa.

•  YUYAI 2: Na pinganayai fotota cachana o joven ima nijta shuyana. O pensaringuipashchari, chai jovenga imapash nalita rurangapami munajun yarin nishpa.

•  YUYAI 3: Mensajeta borrana. Chai jovenga imapash nalipami fotacunataca mañajun nishpa pensarinaca alimi can.

 Shinaca ¿nachu ultimo yuyai ashtahuan ali can? Bibliapica ninmi: “Ali yuyaita charij runaca, ima llaqui japinata ricushpaca pacajunmi. Ashtahuangarin na yachajushca runacunaca, yangata rishpa llaquichi tucunllami” (Proverbios 22:3).

 Janetpa causaipi, shuj jovengunapa causaipi llaquicunaca, nali amigocunata charishcamandami llaqui aparca. Nali amigocunahuan puri callarishpaca paicunashnami nalicunata rurangui. Shinaca ¿picunata quiquinba amigocuna can? (Proverbios 13:​20). Sara jovenga ninmi: “Alita ruraj amigocunatami mascana cangui” nishpa. Delia shuti jovenbash ninmi: “Can ali purichun ayudanapa randica nali amigocunaca paicunashna nalicunata rurachunmi munan. Shinallata Diospa ñaupajpi ali ricurichun na ayudanata yachashca jahua llevarishpaca, quiquinbashmi paicunashnallata nalicunata rurai callaringuiman” nishpa. ¿Paicunashna cangapachu munanguiman?