Shuj runaguca, cuerpo enteropi llaga jundashcami alpapi tiajurca. Cumurishcami umatapash huarcushca tiajurca. Paillagumi carca. Fuerzapash illami carca. Chaimi paita muyunajuj chuspicunata carcuitapash na ushajurca. Llaquillapacha caimandami uchufacuna jahuapi tiajurca. Chugrishcatapash alpa manga faqui pedazohuanllami aspirishca tiajurca. Tucui ima charishcatami pirdirca. Paipa amigocuna, vecinocuna y familiacunapash jichushpami saquirca. Mayor gentecunapash y hasta huahuacunapashmi chai runagutaca burlarishpa ricunajurca. Chai runaguca, Taita Diosca ñucatallami saquihuashca yashpami pensajurca. Pero shina pensashpaca pandatami pensajurca (Job 2:8; 19:18, 22).

 Chai runaguca Jobmi carca. Taita Diosca ‘alpapica paishnaca pipash na tianllu’ nircami (Job 1:8). Ashtaca huatacuna jipapashmi Jehová Diosca Job runaguca alita ruraj runagumi can nirca (Ezequiel 14:14, 20).

 ¿Quiquinbashchu llaqui apajupangui? ¿O shinlli problemacunatachu charipangui? Jobpa causai imashina cashcata ricushpami consolarita ushapangui. Shinallata, completamente juyana ima cashcatapashmi yachajupashun. Jehová Diosta sirvijcunaca, ima llaquicuna ricurijpipash Taita Diospa voluntadta rurashpami completamente juyashcata ricuchipanchi. Shinaca Jobpa ejemplomandaca yachajupashun.

 Job huañushca jipami, Moisesca Jobpa causai imashina cashcata escribishca yarin. Moisespash Jehová Diostaca nunca na saquircachu. Moisesca na solo Jobpa causaitallachu escribirca. Sino jahua cielopi ima pasashcatapashmi escribirca.

 Callaripica, Jobca cushilla, alimi causajurca. Shinallata charij charijmi carca. Paitaca tucuicunami rijsirca. Uz llactamanda gentecunaca paitaca respetanmi carca. Uz llactaca cunanbi península arábiga jahua ladomanmi cashca yarin. Jobca pobre gentecunahuanga generosomi carca. Pi difindinata na charij gentecunataca cuidariajunmi carca. Jehová Diosca Jobta, paipa huarmita y paicunapa 10 huahuacunatapash bendiciajunmi carca. Ashtahuangarin, Job runaguca Taita Diostaca yariami causan carca. Paipa caru familia Abrahán, Isaac, Jacob y Joseshnami Jehová Diospa ñaupapi siempre ali ricuringapaj esforzarirca. Jobca paicunapa ejemplota catishpami, shuj sacerdote cuenda paipa familiacunapa favor sacrificiocunata Jehová Diosman caran carca (Job 1:1-5; 31:16-22).

 Cunanga jahua cielopi ima pasashcata ricupashun. Jobca chai cosascuna pasajujtaca na yacharcachu. Angelcunaca Jehová Dioshuanmi tandanajurca. Chaipimi na cazungapaj munaj Diabloca chayarca. Jobta Diablo na ricunayachijtaca Jehová Diosca alimi yacharca. Chaimandami cai alpapica Jobshna nipipash na tianllu nirca. Pero Diabloca nimata na pinganayachishpami “Job runaca, ¿yangamandachu Taita Diosta manllan? ¿Nachu canllata paitapash, paipaj huasi ucu puratapash, tucui imatalla pai charishcatapash, tucuilla muyundita cuidajungui?” nirca. Diabloca Taita Diospa voluntadta ruraj gentecunataca odiaitami odian. Gentecuna Taita Diosta tucui devoción catishpaca, Diabloca nali, traicionero cashcatami ricuchin. Cunanga Jobmanda cutin parlapashun. Diabloca, Jobca solo paipillami pensarin, tucui ima charishcata pirdishpaca, Taita Diosta maldicishpami huañunga nircami (Job 1:6-11).

 Chaimi Jehová Diosca, Diablo llullajushcata ricuchina oportunidadta Jobmanga cujurca. Pero chai oportunidadta Jehová Dios cujushcataca Jobca na yacharcachu. Diabloca Job tucui ima charishcatami quichungapaj munarca. Tucuita quichuchun permitishpapash, Jobta huañuchichunga na concindishachu nircami. Chaimi Diabloca jatun nali cosascunata rurai callarirca. Jobca solo shuj punllapillami shuj shuj jatun llaquicunata charirca. Por ejemplo, paipa animalcuna huañushcatami yachaj chayarca. Primeroca paipa jari huagracuna, burrocuna, jipamanga paipa llamacuna y chai jipaca paipa camellocunami huañurca. Paipa sirvientecunapashmi huañurca. Shuj mensajero shamushpami, “Taita Diospaj nina jahua pachamanda urmamushpami” llamagucunatapash y sirvientecunatapash huañuchirca nirca. Talvez shuj rayomi cashcanga. Tauca gentecuna y animalcunami huañurca. Jobca pobre pobremi quidajurca. Critapash na cri ushashca shayajujpillatami, quiquinba 10 churicunaca tucuillami huañuchirca nishpa villangapaj shamurca. Paicunaca rucu huauquipa huasipimi tucuillacuna tandanajushca cashcarca. Chai ratopimi ninan huaira jatarishpa, huasita shitashpa tucuillata huañuchirca (Job 1:12-19).

 Job imashina sintirishcataca ni imaginaritapash na ushapanchichu. Jobca paipa ropatapash liquirishpa, paipa ajchatapash ruturishpami alpaman shitarirca. Paica imashinami Jehová Dios carahuarca, shinallatami cunanga quichujuhuan yashpami pensarirca. Diabloca Taita Diosmi chai tucui llaquicunata cachamujun yashpami pensachunmi chai cosascunataca Jehová Dios rurashcatashna ricuchirca. Shinapash Jobca, Taita Diostaca na maldicircachu. Chaipa randica “Mandaj Diospaj shutica, aligumari ni tucushca cachun” nircami (Job 1:20-22). Diabloca llullapimi quidarca.

 Diabloca ninanda culirashcami carca. Jobtaca imashinapash fallachingapami munarca. Chaimi Diabloca, angelcunahuan Jehová Dios tandanajushca ratopi ricurigrirca. Jobca llaquipi cashpapash, Jehová Diosta completamente juyashcamandami, Jehová Diosca cutin Jobmandaca ali cosascunatalla parlarca. Pero Diabloca ‘runaca, caramandaca caratallatami cun. Runaca paipa causaimandaca tucui imata charishcatami cunman. Ashtahuangarin cunanda canba maquita chutashpa, paipa tullupipash, aichapipash unguita cuyari. Shina rurajpica, ¿nachu candaca canba ñaupapillata nalicachishpa, nali shimicunata riman?’ nircami. Diabloca, shuj grave unguita Job charishpaca, Taita Diostaca maldicingami yashpami shina nijurca. Pero Jehová Diosca, Job paita completamente juyajtaca seguromi carca. Chaimi Diablotaca, aunque Jobman shuj grave unguita cuchun concindishpapash, Jobta huañuchichunga na saquishachu nirca (Job 2:1-6).

 Shina pasashca jipami Jobca, cai tema callari parrafopi nishcashna tiajurca. Cunanga Jobpa huarmipi pensaripashun. 10 huahuacuna huañushcamanda, paipa cusa imasha sufrijujta ricushpa y paita na ayudai ushashcamandaca ninandami nali sintirijurianga. Desesperadapacha cashpami “¿cunangamanllu Diosta cazujunguilla? Taita Diosta nalicachishpa rimashpa, huañushpachari ali canguiman” nirca. Na jatun llaquipi cashpaca, Job rijsishca, Job juyashca huarmiguca nunca na shinaca ninmanllu carca. Jobca paipa huarmigu ñana aliguta pensari ushashcataca alimi yacharca. Shinapash Taita Diostaca Jobca na maldicircachu. Paipa parlohuanga na imapash pecadota rurarcachu (Job 2:7-10).

 Jobpa causaica ciertomi can. Ñucanchicunatapashmi afectan. Diabloca na solo Jobtallachu juchachijurca, sino tucuilla gentecunatami juchachijurca. Paica “runaca paipa causaimandaca tucui imata charishcatami cunman” nircami. “Runa” nishpaca Diabloca tucuilla gentecunamandami parlajurca. Gentecunaca Taita Diosta completamente juyaitaca na ushanllu nishpami Diabloca juchachijurca. Paica cada unotami, paica na Taita Diostaca ciertopacha juyanllu, huañuna peligropi cashpaca, Taita Diostaca ladoman saquingallami nijunmi. Diabloca paipashmi ñucashnallata egoísta, mitsami can nijun. Shinaca ¿nachu Diablo llullajushcata ricuchingapaj munapanguiman? Tucuicunallatami Diablo llullajushcata ricuchina oportunidadta charipanchi (Proverbios 27:11). Jobca shuj llaquitapashmi charirca. Ricupashun ima llaquita charishcata.

 Jobpa quimsa rijsicunatami, Bibliapica Jobpa amigocuna o cumbacuna nin. Job llaqui apajujta yachaj chayashpami, paicunaca Jobta visitashpa consolangapaj rirca. Carumanda ricushpaca Jobtaca na rijsi usharcachu. Ninandami nanachijurca. Paipa cuerpo aichapash unguimandaca yana yanami tucushcarca. Punda tiempohuan ricujpica Jobca ashtacatami cambiashcarca. Jobta visitangapaj rishca quimsa runacunaca, Elifaz, Bildad y Zofar shuticunami carca. Paicunaca yangata llaquiyaj tucushpami, polvo alpata umapi shitarinajurca. Semana enterotami na imatapash nishpa tuta y punlla shina yalinajurca. Pero na animaimandachu upalla carca, sino na imatapash tapungapaj munaimanda, shinallata Job sufrijujta ricuita ricuimandallami upalla carca (Job 2:11-13; 30:30).

 Na imatapash nishpa tianajujpillatami Jobca parlai callarirca. Ninanda llaquirishpami, paipa nacirishca punllatapash maldicijurca. Chai jipami paica Taita Dios llaquichijpimi cashnapacha sufrijuni nirca (Job 3:1, 2, 23). Shinapash Jobca Taita Diospi confianataca na saquircachu. Pipash consolachunmi ninanda munajurca. Paipa cumbacuna parlanajujpica, imapashi parlajurcani, mejor upalla quidashparapashmi ali caiman carcani yariangami (Job 13:5).

 Primeroca Elifazmi parlai callarirca. Paimi quimsandi cumbacunamanda y Jobmandapash ashtahuan mayor cashcanga. Elifaz parlashca jipaca, paipa ishcai cumbacunapashmi parlarca. Paicunaca na aliguta pensashpatami Elifaz imata nishcatallata apoyashpa parlarca. Huaquin cosascunataca ciertotami nirca. Por ejemplo, Taita Diosca jatun Taita Diosmi can, nalicunataca castiganmi, alicunataca bendicianmi nishpami parlarca. Pero paicunaca na Jobmandaca ciertopacha preocuparinajurcachu. Por ejemplo, paicunaca Taita Diosca alimi can pero malocunataca castiganmi nishpami nirca. Shina nishpaca, Jobca imapash nalita ruraimanda castigai tucujushcatami intindichinajurca (Job 4:1, 7, 8; 5:3-6).

 Chaimi Jobca paicuna imata ninajujtaca na uyangapaj munarca (Job 6:25). Paicunaca, Jobca imapash pecadotallatami pacajunga yashpami ashtahuan ashtahuan pensanajurca. Chaimi Jobca razonbimi castigai tucujunga ninajurca. Elifaz runacarin Jobtaca cridoyashca, malomi cangui, Taita Diostaca na manllanguichu nishpami culpajurca (Job 15:4, 7-9, 20-24; 22:6-11). Zofarpash Jobtaca, nalita ruranata saquinami cangui, ñana pecadopi causanachu cangui nishpami nijurca (Job 11:2, 3, 14; 20:5, 12, 13). Bildad runacarin, quiquinba churicunaca pecadota ruraimandami huañuchi tucurianga nishpami Jobtaca astahuan llaquichirca (Job 8:4, 13).

 Chai quimsa cumbacunaca ashtahuan nalitami portarirca. Paicunaca Jobca na Taita Diostaca completamente juyanllu ninajurcami. Ashtahuangarin, Taita Diosta tucui shungu sirvingapaca, ni esforzaritallapash na esforzarinachu can nishpami ninajurca. Primera vez Elifaz parlajushpaca, shuj demonio ayahuan tuparishpa parlashcatami nirca. Chai demoniohuan tuparishca punllamandami Elifazca pandacunata pensai callarirca. Elifazca, Taita Diosca paipa sirvijcunapica na confianllu, paicunataca na yarinllu, paipa angelcunapash paipa ñaupapi ali ricuritaca na ushanllu nijurcami. Si chai shimicuna cierto cashca cajpica, gentecunaca nunca na Taita Diospa ñaupapi ali ricuritaca ushanchimanllu. Jipamanga Bildadca nircami, gentecunaca, alita rurashpapash Taita Diospa ricuipica yanga jurushnallami can nishpa (Job 4:12-18; 15:15; 22:2, 3; 25:4-6).

 ¿Ima horapash ninanda sufrijuj personata consolapashcanguichu? Ninanda sufrijuj personata consolanaca na facilchu can. Shinapash Jobpa cumbacuna imata nishcata ricushpami, pitapash consolangapaj munajushpaca, imata na nina cashcata yachajupanchi. Por ejemplo, chai quimsa cumbacunaca pandacunatami pensanajurca. Shuj shuj palabracunatami nirca. Ashtaca palabracunata ninajushpapash, nunca na Jobtaca shutipi parlarcachu. Jobca llaqui apajunmari, aliguman parlachunmi munajunga yashpapash, nimata na pensarcachu. a Shinaca quiquinba juyashca amigo o cumba desanimarishca cajpica, juyaihuan, llaquishpa, considerashpami parlana capangui. Animangapaj, paipa feta ashtahuan shinlliyachingapami esforzarina capangui. Juyaj, misericordioso, justo caj Jehová Diospi confiachunmi ayudana capangui. Jobca shina aliguta tratachunmi munajushcanga (Job 16:4, 5). Taita Diostaca na completamente juyanllu nishpa cutin cutin ninajujpica ¿imatata Jobca rurarca?

 Quimsa cumbacuna cutin cutin parlanajujpica, Jobca ñami desanimarishca carca. Jobca parlai callarishca ratomandami, na aliguta pensashpami parlajuni, imata ruraitapash na ushajunichu nishpa nirca (Job 6:3, 26). Jobca paipa shungupi ninanda nali sintirishpami shina nijurca. Imamanda shina sufrijushcatapash Jobca na yacharcachu. Lo único que yacharca es que chai llaquicuna cungashcapi ñapash chayamushcata y ashtaca fuerzata charij persona paita chashnapacha llaquichijushcata. Shina pensashpami Jobca, Jehová Dios llaquicunata cachamushcamandami ñucapash y ñuca familiapash sufrinajunchi yarca. Jobca importante cosascunata na yachaimandami, huaquin cosascunapica pandata pensarirca.

 Shina cashpapash, Jobca shinlli fetami charirca. Shinlli feta charishcatami paipa parlocunapica ricuchirca. Job parlashca juyailla shimicunaca cunangamanmi ñucanchitaca animan. Jehová Dios rurashca cosascunamanda parlashpaca, Jehová Dios ayudajpimi gentecuna na yachashca cosascunata escribirca. Por ejemplo, “cai pachataca, imapillapash na huarcurcachu” nircami. b (Job 26:7). Shamuj punllacunapi chasquina esperanzamanda parlashpaca, Jehová Diosta ali sirvinajushca gentecunashna esperanzata charishcatami parlarca. Jobca pai huañujpica, Taita Diosca yarihuangami, cutin ricungapami munahuanga, causachihuangami yashpami pensarca, chaitaca seguromi carca (Job 14:13-15; Hebreos 11:17-19, 35).

 Taita Diosta completamente juyanamanda cutin parlapashun. Elifaz y paipa ishcai cumbacunaca, ima pandatapash na rurashpa causangapaj esforzarinajuj gentecunaca Taita Diospaca nima na importanllu nishpami ninajurcami. Pero Jobca paicuna shina ninajujtaca na crircachu. Jobca ima pandatapash na ruraj gentecuna Taita Diospa importante cashcataca seguromi carca. Chaimi ‘Taita Diosca ñuca ali cajtaca ricuhuangami’ nirca (Job 31:6). Paica paipa amigocuna pandacunata pensashpa, Taita Diosmanda caruyachingapaj munanajujtaca cuenta japircami. Chaimi paipash huaquin shimicunata nishpa paipa cumbacunataca upalla quidachirca.

 Jobca Taita Diosta cada punlla completamente juyashpa causana cashcataca alimi yacharca. Chaimi yanga dioscunataca na adorarca. Shuj gentecunatapash llaquishpa, respetohuanmi tratarca. Cadano huarmicunatapash na ricujurcachu. Paipa huarmihuanlla ali causangapami esforzarirca. Ashtahuanbachaca único Taita Dios Jehovamandaca nunca na caruyarcachu. Chaimi ñucaca huañungacamanmi ima pandatapash na rurashpa causashca nirca (Job 27:5; 31:1, 2, 9-11, 16-18, 26-28).

 Jobpaca Taita Diosta completamente juyanaca importantemi carca. Quiquinbapash Taita Diosta completamente juyanaca ¿importantechu can? Aunque llaquicuna ricurijpipash, Taita Diosta cazushpa, pai imata mandashcata cada punlla rurashpami Taita Diosta completamente juyashcataca ricuchishun. Shina causashpami Jehová Diostapash cushichishun y Diablo llullajushcatapash ricuchishun. Jobca Taita Diosta completamente juyashpami causarca. Ñucanchicunapash Jobpa ejemplotami catina capanchi.

 Jobmandaca shuj cosascunatapashmi parlaita ushapanchi. Jobca asha ratotaca na aliguta pensarishpami, Jehová Diospa shutipi pensarinapa randica paipa shutipira pensarirca. Jobca paita espiritualmente pipash ayudachun, paita corregichunmi minishtijurca. Ashtahuangarin, paipa huahuacuna huañushcamandaca todaviami llaquilla carca. Pipash uchashpa consolachunmi minishtijurca. ¿Imashinashi Jehová Diosca paita completamente juyaj, paimanda nunca na caruyashca Job runagutaca ayudarca? Chai tapuita y shuj tapuicunataca cati temapimi yachajupashun.