Cai Alpaca nunca na tucuringachu. Bibliapica Taita Diosca cai Alpataca gentecuna para siempre causachun rurashcatami yachachin.

•   “Imatapash cashcatapacha rurajcunami llactataca japinga. Chai llactapica causaitami causanajunga” (Salmo 37:29).

•   “Paimi cai pachataca o cai [Alpataca] callari rumicunapa jahuapi churarca. Shinamandami ima horapash na anchuringa” (Salmo 104:5).

•   “Cai pachaca causaita causaicaman tiajunllami” (Eclesiastés 1:4).

•   “Jahua pachatapash cai pachatapash ruraj Taita Diosca, tucuita juyailla alichishpami churarca. Ashtahuangarin chaipi causanajuchunmi rurarca” (Isaías 45:18).

 Gentecuna cai Alpata mapayachishpa, guerracunahuan, shujta cosascunata rurashpa cai Alpata tucuchichunga Taita Diosca na saquingachu. Ashtahuangarin Bibliapica cai pachata tucuchijcunataca tucuchingami nin (Revelación [Apocalipsis] 11:18). ¿Imashinata caitaca Taita Diosca pactachinga?

 Taita Diosca cai Alpapi tiashca gobiernocunata tucuchishpami paipa con gobierno cai Alpapi mandachun churanga (Daniel 2:44; Mateo 6:9, 10). Taita Diospa gobiernopica paipa Churi Jesusmi mandanga (Isaías 9:6, 7). Jesús cai Alpapi cashpaca milagrocunata rurashpami huairatapash, tamiatapash jarcarca (Marcos 4:35-41). Jesús cai Alpata mandashpaca cai Alpapi tucui tiashcacunatami mandanga. Callaripi jardín de Edenda rurashcashnami cai Alpataca Jesusca mushujyachinga (Mateo 19:28; Lucas 23:43).

 Bibliapica chaitaca na yachachijunllu. Huaquingunaca 2 Pedro 3:7​pi nishcata mana ali intindishpami cai Alpaca rupashpa tucuringa nishpa yuyan. 2 Pedro 3:7​pica cashnami nin: “Cunanbi tiajuj cai pachapash, jahua pachapash, Dios tiachun nishca punllacamanllami tianajun. Chaicunataca, pai rimashpalla ninahuan tucuchingapajmi”. Cai textota intindingapaca ishcai yuyaicunata ricupashun:

1.   Bibliapi cielo, Alpa, nina nishpaca shuj shuj yuyaicunatami ningapaj munan. Génesis 11:1​pica ninmi: ‘Cai pachapi causajcunaca, tucuicunami shujlla rimaita rimanajurca’. Cai pacha nishpaca cai Alpapi causajuj gentecunamandami parlajun.

2.   2 Pedro 3:7​pa punda textocunami “cielo”, “Alpa”, “nina” imata ningapaj munajta intindichin. Versículo 5, 6​pica Noepa punllacunapi Jatun Manllanai Tamia punllacunamandami parlajun. Jatun Manllanai Tamiapi cai Alpapi tucui tiashcacuna tucurishpapash, cai Alpaca na tucurircachu. Jatun Manllanai Tamiapica tucuilla nali gentecunami huañurca. Shinaca, Alpa nishpaca gentecunamandami parlajun (Génesis 6:11). Shinallata cielota tucuchishca nishpaca, chai tiempopi mandajuj gentecunata tucuchishcatami ningapaj munan. Shinaca cai Alpaca na tucurircachu nali gentecunallami tucurirca. Chai Jatun Manllanai Tamiapica Noepash, paipa familiacunapash salvarishpami cai Alpapica cutin jundarca (Génesis 8:15-18).

 Jatun Manllanai Tamia punllacunapica nali gentecunami tucurirca. Shinallata 2 Pedro 3:7​pica ninahuan tucuchina nishpaca cai Alpa tucurinataca na ningapaj munanllu, nali gentecuna tucurinatami parlajun. Taita Diosca ‘jahua pachatapash, cai pachatapash mushujtami carasha nishcami. Chaipica imatapash cashcatapacha ruranami tianga’ (2 Pedro 3:13). Mushuj pachata nishpaca gentecunatami ningapaj munan. Chai gentecunami mushuj jahua pachapi o Taita Diospa Gobierno mandajujpi causanajunga. Taita Diospa Gobierno mandanajujpimi cai Alpaguca juyailla paraíso Alpagu tucunga (Revelación 21:1-4).