Taita Dioshuan, cai Alpapi gobiernocunahuan macanajunatami Armagedón nin. Chai gobiernocunapash, paicunata apoyajcunapash Taita Diospa autoridadta na cazungapaj munaimandami Diospa contra ricurin (Salmo 2:2). Gente gobiernocuna cai Alpata ña ama mandachunmi Armagedonga paicunata tucuchinga (Daniel 2:44).

 Armagedón shimitaca, Har–Magedón nishpapashmi escribin. Chai shimitaca Bibliapica shuj viajetallami escribishca, Revelación o Apocalipsis libropillami ricurin. Apocalipsis libropi shuj profeciaca ninmi: ‘tucui cai pachapi causaj jatun mandajcunatami, Tucui Ushaita Charij Taita Dios ninanda llaquichimui punllapi macanajugrichun tandachinga’ Chai macanajuica ‘hebreo rimaipica, Armagedón shuti pambapimi’ canga (Revelación [Apocalipsis] 16:14, 16).

 Armagedonbica ¿picunata macanajunga? Ashtaca ashtaca angelcunami, Jesucristo ñaupaman pushajpi macanajushpa Diospa contracunata mishanga (Revelación 19:11-16, 19-21). Diospa gobiernota na cazujcuna, Diostapash nalicachishpa rimajcunami mishai tucushca canga (Ezequiel 39:7).

 ¿Armagedón jatun macanajuica maipash shuj pushtupichu canga? Mana. Armagedón jatun macanajuica na shuj pushtupilla cangachu, ñucanchi Alpa muyundipimi canga (Jeremías 25:32-34; Ezequiel 39:17-20).

 Armagedón shimica (hebreo shimipica Har Meghiddóhn) ‘Meguidó shuti pueblo’ nisha ninmi. Ñaupa tiempopi israelitacuna causashca pushtupimi, Meguidó shuti pueblo tiarca. Chai pueblo ladollapi shuj shuj macanajuicuna tiashcatami gentecunaca parlan. Chai pushtupi tiashca huaquin macanajuicunataca Bibliapipashmi parlana (Jueces 5:19, 20; 2 Reyes 9:27; 23:29). Shinapash, Armagedón nishpaca punda tiempopi tiashca Meguidó pueblo ladollapi canataca na nijunllu. Chaipica chaipura urcuca na tianllu. Ashtahuanbash Meguidó pueblo tiashca Jezreel pambapica, Dioshuan macanajungapaj tandanajujcunaca na pactangachu. Shinaca, Armagedonga muyundi Alpapi causaj jatun mandajcuna tandanajushpa Diospa gobiernopa contra tucushpa macanajunatami shina nin.

 Armagedón jatun macanajuipica ¿imata pasanga? Taita Dios paipa poderta imashina utilizanataca na yachapanchichu. Ñaupa tiempopi utilizashcashna paipa poderta utilizanataca seguromi capanchi. Runduta, alpa chujchuita, manllanai tamiata, nina rupajuj azufreta, rayota, millai ungüitachari utilizanga (Job 38:22, 23; Ezequiel 38:19, 22; Habacuc 3:10, 11; Zacarías 14:12). Imapacha pasajujta na atinaimandami, Diospa huaquin contracunaca paicunapura huañuchiringa. Shinapash jipamanga, paillata paicunahuan macanajujujtami cuenta japinga (Ezequiel 38:21, 23; Zacarías 14:13).

 ¿Armagedonga cai mundotachu tucuchinga? Armagedonga ñucanchi Alpataca na tucuchingachu. Cai Alpataca gentecuna chaipi para siempre causachunmi rurarca (Salmo 37:29; 96:10; Eclesiastés 1:4). Shinaca, Armagedonga tucuilla Alpataca na tucuchingachu. Armagedonga, pipash na cuentai ushanalla Taita Diosta ali sirvij ashtaca gentecuna salvarichunmi ayudanga (Revelación 7:9, 14; Salmo 37:34).

 ¿Bibliapica nachu nijun Armagedonga cai mundotami tucuchinga nishpa? Ciertomi can, Bibliapi huaquin textocunapica cai Alpamanda parlashpami pacha o mundo nin. Shinapash, Diospa contra tucushca tucuilla gentecunamanda parlashpapashmi pacha nin (1 Juan 2:15-17). Shinaca, Armagedonga ‘cai pachata’ o Diospa contra tucushca tucuilla gentecunatami tucuchinga (Mateo 24:3).

 ¿Imaurata Armagedón jatun macanajuica callaringa? ‘Ninan manllanai llaqui punllacunapa’ último tiempopimi Armagedón jatun macanajuica callaringa. Chaimanda parlashpami Jesusca nirca: “Ima punlla, ima horas ñuca tigramunataca, pipash na yachanllu. Jahua pachapi tiaj angelcunapash na yachanllu. Ñuca tigramunataca, ñuca Taitallami yachan” nishpa (Mateo 24:21, 36). Armagedón jatun macanajuica, Jesús shamuna tiempopi canatami Bibliapica yachachin. Jesús shamuna tiempoca huata 1914​pimi callarirca (Mateo 24:37-39).