Shuj profeciaca Taita Dios pundamandallata villashca shuj mensajemi can. Bibliapica ‘Diospaj jucha illaj espíritu yarichijpimi’ profetacunaca jipacunaman ima pasanata villanajushca ninmi (2 Pedro 1:20, 21). Shuj profetaca Taita Dios villachun mandashcatami shuj gentecunaman villan (Hechos 3:18).

Taita Diosca ¿imashinata profetacunahuan comunicarin carca?

 Taita Diosca paipa voluntadta pactachingapaca huaquin cosascunata rurashpami profetacunahuanga comunicarin carca. Imashalla comunicarin cashcata ricupashunchi:

•   Escribishcacunata cushpa. Taita Diosca gentecunahuan comunicaringapaca shuj viajetallapash paipacha escribishcatami curca. Por ejemplo Moisesmanga ishcai tabla rumicunapimi Diez Mandamientocunata curca (Éxodo 31:18).

•   Angelcunata cachashpa. Egiptomanda faraonhuan Moisés parlai ushachunga Taita Diosca shuj angelta cachashpami imacunatalla nina cashcata villarca (Éxodo 3:2-4, 10). Shinallata minishtirijpica angelcuna gentecunaman huaquin shimicunata dictaitapacha dictachunbashmi Taita Diosca mandarca. Por ejemplo Moisestaca: “Canga, cai shimicunata escribi. Cai shimicunapi nijunshnallatami, canhuambash, israelcunahuambash ari nircani” nishpami shuj angelca dictarca (Éxodo 34:27). a

•   Muscuicunapishna visiongunata ricuchishpa. Huaquin viajecunataca profetacunaca juizuhuan, rijcharia cashpapachami chai visiongunataca ricun carca (Isaías 1:1; Habacuc 1:1). Y huaquin viajecunaca chai visiongunata ricujcunapashmi chai visiongunapica imacunatapash nin, tapun, uyan o participan carca (Lucas 9:28-36; Apocalipsis 1:10-17). Y cutin shuj viajecunaca, profetacunaca shuj muscuipishnami imata ninata, imata ruranatapash ricun carca (Hechos 10:10, 11; 22:17-21). Y Taita Diosca gentecuna puñunajujpipashmi muscuchishpa paipa mensajetaca villan carca (Daniel 7:1; Hechos 16:9, 10).

•   Paipa yuyaicunata yarichishpa. Taita Diosca profetacunataca paicunapa pensamientocunata yarichishpami paipa voluntadta rurachunga ayudan carca. Chaimandami: ‘Dios escribichishca tucui Shimicunaca, paillata yarichishpa escribishcami. Chai Shimicunaca yachachingapami’ ali can nin (2 Timoteo 3:16). Taita Diosca paipa yuyaicunata gentecunapa yuyaicunaman yalichingapaca paipa espíritu santotami utilizarca. Shinami Taita Diospa pensamientocuna cajpipash profetacunaca paicuna imasha parlanshna escribirca (2 Samuel 23:1, 2).

¿Tucui profeciacunachu jipacunapi ima pasanata ricuchin?

 Na tucui profeciacunachu jipacunapi ima pasanataca ricuchin. Shinapash Diospa mandashcacunaca cazujpi o na cazujpi ima consecuenciacuna tianatami ricuchin. Por ejemplo israelitacunapa tiempocunapi causashca profetacunaca israelitacuna nalita rurashpa causanajujpimi, llaqui apanguichimi nishpami advirtirca. Cutin alita rurashpa causajpica, Taita Diosllatami cangunataca bendicianga nircami (Jeremías 25:4-6). Cada israelitami paicunapa causaipi imata ruranataca decidina carca. Shinami paicunallata beneficiarin carca o llaqui apan carca (Deuteronomio 30:19, 20).

Huaquin profeciacunaca jipacunaman ima pasanataca na villajurcachu

•   Shuj viajeca israelitacunaca Jehovapa ayudatami mañanajurca. Pero Jehová Diosca shuj profetata cachashpami paicuna na cazushcamandaca paicunata na ayudanata nirca (Jueces 6:6-10).

•   Jesús samaritana huarmiguhuan parlajushpaca, samaritana huarmigu paipa causaipi imata rurashcatami Jehovapa ayudahuanga villarca. Chaimi Jesús jipa punllacunapi ima pasanata na villajpipash samaritanaca Jesús shuj profeta cashcata cuenta japirca (Juan 4:17-19).

•   Jesusta juzganajushpaca gentecunaca, pugllashpa asishpami huactanajurca. Paicunaca “Jesuspaj ñavita finduhuan huatashpami: ¿Pita huactarcanchi? Villayari ninajurca”. Paicunaca Jesús jipacunapi ima pasanata villachunga na mañanajurcachu sino Diospa poderta utilizashpa chai rato paita pi huactashcata nichunmi munanajurca (Lucas 22:63, 64).