Ari, Bibliaca yapata culparijujpi imata rurai ushashcata yachachunmi ayudan (Salmo 32:1-5). Ñucanchicuna pandarishcamanda ciertopacha arripintirijpica Taita Diosca perdonangami. Ashtahuanbash cutinllata ali sintirichunmi ayudanga (Salmo 86:5). Bibliapica culpable sintirinaca huaquinbica ali cashcatami ricuchin. Porque culpable sintirimandami nalita ruranamandaca jarcarita ushanchi. Y nalita rurashca cashpapash ama cutinllata chaita rurachunmi ayudan (Salmo 51:17; Proverbios 14:9). Shinapash Bibliapica na yapata culparijuna cashcatami ricuchin. Shinallata nimata na ali ruraita ushanichu nishpa y Taita Diospapash na valinichu nishpa pensana na ali cashcatami Bibliapica ricuchin. Ñucanchillata yapata culparijuimandami “yapata llaquirita” ushanchiman (2 Corintios 2:7).

•  ¿Imamandata ñucanchillata culparita ushanchiman?

•  Yapata culparijushpaca ¿imatata ruraita ushanchi?

•  Cai textocunapimi culparinamanda y perdonmanda parlan

 Talvez shuj juyashca personata llaquichishcamandami culpable sintirita ushanchiman. Na cashpaca imatapash rurana cashcata sintishpa pero chaita na pactachi ushashca caimandami culpable sintirita ushanchiman. Huaquinbica imapash nalita na rurashca cashpatami culpable sintirita ushanchiman. Por ejemplo imatapash rurangapaj ñucanchillata yapata exigirishpa. Yapata exigirishpaca imatapash rurajushpa, na pactachi ushashpaca ñucanchillatami culpable sintirishun. Chaimandami Bibliapica ñucanchicuna imata ruraita ushashcatalla rurachun animan (Eclesiastés 7:16).

 Culpable sintirijushpapash na chaipilla quidanachu capangui. ¿Imatata ruraita ushapangui?

•   Pandarishcatami reconocina capangui. Jehová a Diosta mañashpa perdonda mañapangui (Salmo 38:18; Lucas 11:4). Quiquin ciertopacha arripintirishca cajpi y nalita ama cutin rurangapaj esforzarijpica Taita Diosca uyangapachami. Chaitaca seguromi caita ushapangui (2 Crónicas 33:13; Salmo 34:18). Jehová Diosllami ñucanchicuna imashna cajtaca ali rijsin. Paica ñucanchicuna nalita ama cutin rurangapaj esforzarijujta ricushpaca “ñucanchi pecadocunataca perdonanmi”. “Taita Diosca cumplij y siempre alita ruraj Taita Diosmi can” (1 Juan 1:9; Proverbios 28:13).

   Pitapash llaquichishca cashpaca pandarishcata reconocishpami shungumanda perdonda mañana capangui. Perdonda mañanaca talvez na fácil cangachu shinapash humildemi cana capangui y perdonda mañanataca na manllanachu capangui. Shungumanda perdonda mañanaca ñucanchillata ali sintirichunmi ayudan. Ashtahuanbash ñucanchicuna llaquichishca personahuan cutinllata amigo tucuchunmi ayudan (Mateo 3:8; 5:23, 24).

•   Taita Dios shuj llaquij Dios cashcapi pensaripai. Por ejemplo 1 Juan 3:19, 20 textocunata liipangui. Chaipica ‘ñucanchi shungumi llaquichin’ nijunmi. Caica ñucanchillata yapata culparishpa Taita Diospash ñucanchita juyachun na miricishcata pensai ushashcatami ricuchin. Pero chai textopica caitapashmi nin: ‘Taita Diosca ñucanchipa shungutapash yalimi can’ ninmi. Cai shimicunaca ¿imatata ningapaj munan? Taita Diosca ñucanchitaca ali alimi rijsin. Ñucanchi imashna sintirijta y imata na ruraita ushashcataca alimi yachan. Shinallata ñucanchicuna pecadorcuna caimanda pandari ushashcatapash alimi yachan (Salmo 51:5). b Chaimandami pipash pandarijpi pero ciertopacha arripintirishpa perdonda mañajpica cutinllata chasquin (Salmo 32:5).

•   Pandarishcapica ama cutin cutin pensarijuichu. Bibliapica huaquin jaricuna y huarmicuna pandarishcatami parlan. Shinapash jipamanga paicunapa causaipi cambiashcatami parlan. Por ejemplo Tarso llactamanda Saulo runamandami parlan. Paitaca jipamanga apóstol Pablo nishpami gentecunaca rijsi callarirca. Paica pundacunapica fariseocunapura caimandami Jesuspa discipulocunataca ninanda llaquichirca (Hechos 8:3; 9:1, 2, 11). Shinapash chaita rurashpa Taita Diospa contra y Mesías o Jesuspa contra tucujushcata cuenta japishpami arripintirirca. Paipa causaipi cambiashpami Jesusta alipacha catij tucurca. Pabloca nalita rurashcamandaca ninandami arripintirishcanga, shinapash ama chaipillata cutin cutin pensajungapami esforzarirca. Taita Dios paita perdonashcamandami Pabloca cushijushpa predicangapaj ninanda esforzarirca. Paica para siempre causai ushanataca siempremi yaipi charirca (Filipenses 3:13, 14).

 Jeremías 31:34: “Ñucallatami, paicuna nalita rurashcataca cungasha. Paicunapaj juchataca, napacha cutinga yarishachu”.

 ¿Imatata ningapaj munan?: Ñucanchi pecadocunata Taita Dios perdonashpaca na cutin cutin yarijunllu. Perdonashpaca cungaitapachami cungan.