¿Taita Diosca tucui ladocunapi, tucui cosascunapichu can?

Cai idiomapi uyangapaj o ricungapaj

Bibliapica caitami yachachin

Taita Diosca tucuitami ricui ushan. Pai munashpaca paipa podertaca ima ratopash utilizaita ushanmi (Proverbios 15:3; Hebreos 4:13). Shinapash Bibliapica Taita Dios tucui ladocunapi, tucui cosascunapimi can nishpaimanga na yachachinllu. Chaipa randica, Taita Dios shuj espíritu caimandaca shuj pushtupilla causajtami yachachin.

Taita Diosca ¿imashinata can? Taita Diosca shuj espiritumi can (Juan 4:24). Paitaca ni shuj gentellapash nunca na ricushcachu (Juan 1:18). Bibliapi Taita Dios shuj muscuipishna ricurishcata parlashpaca, shuj pushtupilla cashcatami ricuchin. Tucui ladocunapi cajtaimanga na ricuchinllu (Isaías 6:1, 2; Apocalipsis 4:2, 3, 8).
Taita Diosca ¿maipita causan? Taita Diosca shuj espiritual pushtugupimi causan. Shinapash chai pushtugutaca ñucanchica mana ricuita ushapanchichu. Paica ‘jahua cielopimi’ causan (1 Reyes 8:30). Bibliapica shuj punlla angelcuna tandanajushcatami ricuchin. Paicunaca Jehová a Diospa ‘ñaupapi ricuringapami shamurca’ ninmi. Caita ricushpami Taita Diosca shuj pushtugupi causajushcataca yachapanchi (Job 1:6).

¿Taita Dios na tucui ladocunapi cashpaca ñucanchitaca ciertopachachu cuidai ushan?

Taita Dios shuj espiritual pushtugupi causajushpapash, cai alpapi causanajuj gentecunamandaca ninandami preocuparin. Shinallata paita cazungapaj munajcunatapash ricujunmi y ayudangapapash listomi can (1 Reyes 8:39; 2 Crónicas 16:9). Pero ¿imashinata ñucanchipi preocuparishcata, cuidangapaj munashcatapash ricuchishca?

Mañanajujpi: Ñucanchi mañanajujpica, Jehová Diosca uyajunmi (2 Crónicas 18:31).
Ninanda llaquilla cajpi: Jehová “Diosca, shungupi ninanda llaquirishpa causajcunapaj ladopimi. Shungupi ninanda llaquirishpa causajcunatami quishpichin” (Salmo 34:18).
Shuj consejota minishtijujpi: Bibliahuanmi Jehová Diosca ali yachaita cun y maita rina ñandapash ricuchishpa ayudan (Salmo 32:8).

Taita Dios tucui ladocunapimi can nishpa panda crishcacuna

Huaquingunaca nishcami: Taita Diosca tucui cosascunapimi can nishpa.

Bibliapica ninmi: Taita Diosca mana cai alpapi o shuj ladocunapi o shuj cosascunapimanga na causajunllu (1 Reyes 8:27). Bibliapica estrellacuna o tucui ima tiashcacunapash “Taita Dios punchapamba cajtami villajun” ninmi (Salmo 19:1). Shinapash Taita Dios paipa rurashcacunapi cashcataimanga na ricuchijunllu. Imashinami shuj pintorca cuadrocunata pintashpapash, chai cuadrocunapica na causan. Shinallatami Jehová Diosca tucui cosascunata rurashca cashpapash. Paipa rurashcacunapica na causanllu. Ashtahuangarin paipa rurashcacunami Jehová Dios ali yachaita charishcata, tucui ushaita charishcata, juyashcatapash ricuchin (Romanos 1:20).

Huaquingunaca nishcami: Taita Diosca na tucui ladocunapi caita ushaimandami tucui ushaita charita, tucuita yachaitapash na ushangachu nishpa.

Bibliapica ninmi: Taita Diosca paipa espíritu santota o poderta charimandami tucuita ricujun. Maipi cashpapash o imata cashpapash ruraita ushanmi. Taita Dios shuj pushtupipacha canaca na minishtirinllu (Salmo 139:7).

Huaquingunaca nishcami: Taita Diosca tucui ladocunapi, tucui cosascunapimi can. Chaitami Salmo 139:8pica ricuchijun: “Jahua pachaman vichai rijpipash, canga chaipimi cangui. Ñuca samanata Seolpi [o pantionbi] churajpipash, canga chaipimi cangui” nishpa.

Bibliapica ninmi: Cai textoca Taita Dios tucui ladocunapi cashcataimanga na ricuchijunllu. Sino que ñucanchicuna maipi cajpipash Taita Dios ñucanchita ayudai ushashcatami ricuchingapaj munan.

a Bibliapica Taita Diospa shuti Jehová cajtami yachachin.